സെന്റ് ജോൺസ് : ന്യൂഫൗണ്ട്ലാൻഡ് ആൻഡ് ലാബ്രഡോർ പ്രവിശ്യയെ നടുക്കിയ 14-കാരി ഡാന ബ്രാഡ്ലിയുടെ കൊലപാതകം 45 വർഷം പിന്നിടുമ്പോഴും ഇന്നും തെളിയിക്കപ്പെടാത്ത ദുരൂഹതയായി തുടരുന്നു. കേസിൽ 2016-ൽ പോലീസ് വലിയ മുന്നേറ്റം പ്രഖ്യാപിക്കുകയും നിർണായക ഡി.എൻ.എ തെളിവുകൾ കൂടുതൽ പരിശോധനയ്ക്ക് അയക്കുകയും ചെയ്തിരുന്നു. എന്നാൽ, ഡി.എൻ.എ തെളിവുകൾക്ക് കൊലപാതകവുമായി യാതൊരു ബന്ധവുമില്ലെന്ന് റോയൽ കനേഡിയൻ മൗണ്ടഡ് പോലീസ് (RCMP) ഇപ്പോൾ വ്യക്തമാക്കിയതോടെ അന്വേഷണം വീണ്ടും വഴിമുട്ടിയിരിക്കുകയാണ്.
1981 ഡിസംബർ 14-നാണ് സെന്റ് ജോൺസ് നഗരത്തിലെ ബസ് സ്റ്റോപ്പിൽ നിന്ന് ലിഫ്റ്റ് ചോദിച്ചു യാത്ര ചെയ്ത ഡാന ബ്രാഡ്ലിയെ കാണാതാകുന്നത്. നാല് ദിവസങ്ങൾക്ക് ശേഷം നഗരത്തിൽ നിന്ന് 10 കിലോമീറ്റർ അകലെയുള്ള വനപ്രദേശത്ത് സ്കൂൾ യൂണിഫോം ധരിച്ച നിലയിൽ പെൺകുട്ടിയുടെ മൃതദേഹം കണ്ടെത്തുകയായിരുന്നു. പ്രവിശ്യയിലെ ഏറ്റവും സുരക്ഷിതമായ ഇടമെന്ന് കരുതപ്പെട്ടിരുന്ന നഗരത്തെ ഭീതിയിലാഴ്ത്തിയ ഈ സംഭവം കൗമാരക്കാരുടെ ഹിച്ച്ഹൈക്കിംഗ് (ലിഫ്റ്റ് ചോദിച്ചുള്ള യാത്ര) രീതിക്ക് വലിയ തോതിൽ മാറ്റം വരുത്താൻ കാരണമായി.
ഈ കൊലക്കേസ് അന്വേഷണത്തിനിടയിൽ നിരവധി വിവാദ വഴിത്തിരിവുകളും ഉണ്ടായിട്ടുണ്ട്. 1986-ൽ ഒരാളെ അറസ്റ്റ് ചെയ്തെങ്കിലും പോലീസിന്റെ സമ്മർദ്ദം മൂലമാണ് കുറ്റം സമ്മതിച്ചതെന്ന് വ്യക്തമായതോടെ ഇയാളെ വിട്ടയച്ചു. പിന്നീട് പൊതുജനങ്ങളുടെ പങ്കാളിത്തത്തോടെ ഫേസ്ബുക്ക് കൂട്ടായ്മകൾ രൂപീകരിക്കുകയും സംശയമുള്ള പഴയ വാഹനങ്ങൾ പുറത്തെടുത്ത് പരിശോധന നടത്തുകയും ചെയ്തെങ്കിലും ഫലമുണ്ടായില്ല. കേസ് ഇപ്പോഴും സജീവമായി അന്വേഷിക്കുകയാണെന്നും പൊതുജനങ്ങൾക്ക് ലഭിക്കുന്ന ചെറിയ വിവരങ്ങൾ പോലും കൈമാറണമെന്നും പോലീസ് അഭ്യർത്ഥിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
DNA evidence also changed course; Dana Bradley murder case that shook Newfoundland is facing another setback, the case enters its 45th year
