ടെഹ്റാൻ: ആഗോള സമുദ്ര വ്യാപാര പാതകളിൽ നിർണായകമായ ഹോർമുസ് കടലിടുക്കിലൂടെയുള്ള ഗതാഗതത്തിന് കപ്പലുകളിൽ നിന്ന് ഫീസ് ഈടാക്കാൻ ഇറാൻ പുതിയ പദ്ധതി ആവിഷ്കരിക്കുന്നു. ഹോർമുസ് കടലിടുക്കിന്റെ നിയന്ത്രണം ശക്തമാക്കുന്നതിന്റെ ഭാഗമായാണ് ഈ നടപടിയെന്ന് ഇറാനിയൻ നിയമനിർമ്മാതാവ് ഇബ്രാഹിം അസീസിയുടെ പ്രസ്താവനയെ ഉദ്ധരിച്ച് പ്രമുഖ വാർത്താ ഏജൻസിയായ റോയിട്ടേഴ്സ് റിപ്പോർട്ട് ചെയ്തു. തങ്ങളുമായി സഹകരിക്കുന്ന രാജ്യങ്ങളുടെ കപ്പലുകൾ മാത്രമേ കടത്തിവിടുകയുള്ളൂ എന്നും, ഇറാനെതിരെ സൈനിക നടപടികളെ പിന്തുണച്ച രാജ്യങ്ങൾക്ക് ഈ പാത തുറന്നുനൽകില്ലെന്നുമാണ് ഇറാന്റെ പുതിയ നയം. എന്നാൽ, ഈ കടുത്ത നിയന്ത്രണങ്ങൾക്കിടയിലും ചൈന, പാകിസ്ഥാൻ, ജപ്പാൻ എന്നീ രാജ്യങ്ങളുടെ കപ്പലുകൾ ഇറാൻ നിലവിൽ കടത്തിവിടുന്നുണ്ട്.
അതേസമയം, മേഖലയിൽ ഇറാന് നേരെയുള്ള സൈനിക ആക്രമണം പുനരാരംഭിക്കുന്നത് അമേരിക്കയും ഇസ്രയേലും ഗൗരവമായി ആലോചിക്കുന്നതായാണ് പുറത്തുവരുന്ന റിപ്പോർട്ടുകൾ സൂചിപ്പിക്കുന്നത്. ചൈന സന്ദർശനത്തിന് ശേഷം തിരിച്ചെത്തിയ അമേരിക്കൻ പ്രസിഡന്റ് ഡൊണാൾഡ് ട്രംപ്, ഇറാന് നേരെ വീണ്ടും ആക്രമണം നടത്താനുള്ള പദ്ധതികൾ ആസൂത്രണം ചെയ്യുന്നതായി സൂചനയുണ്ട്. സൈനിക ബലം ഉപയോഗിച്ച് നയതന്ത്ര പ്രതിസന്ധി മറികടക്കാൻ ഇറാൻ ശ്രമിച്ചാൽ, അവർക്കെതിരെ ‘ഓപ്പറേഷൻ എപ്പിക് ഫ്യൂറി 2.0’ നടപ്പാക്കാൻ ട്രംപ് ഉന്നത സൈനിക ഉദ്യോഗസ്ഥർക്ക് നിർദ്ദേശം നൽകിയതായി ന്യൂയോർക്ക് ടൈംസ് റിപ്പോർട്ട് ചെയ്യുന്നു. കഴിഞ്ഞ മാസം ഇറാനെതിരെ വെടിനിർത്തൽ പ്രഖ്യാപിച്ചിരുന്നെങ്കിലും, പുതിയ സാഹചര്യത്തിൽ ഈ സൈനിക നീക്കം പുനരാരംഭിക്കാനുള്ള സാധ്യതയാണ് പ്രതിരോധ വകുപ്പ് പരിശോധിക്കുന്നത്.
മേഖലയിലെ യുദ്ധസാഹചര്യം ഒഴിവാക്കാനും സമാധാനം പുനഃസ്ഥാപിക്കാനുമുള്ള ചർച്ചകൾ തുടരാൻ പാകിസ്ഥാൻ ആഭ്യന്തര മന്ത്രി നിലവിൽ ഇറാനിൽ ക്യാമ്പ് ചെയ്യുന്നുണ്ട്. എന്നാൽ, ഹോർമുസ് കടലിടുക്കിലെ ഇറാന്റെ പുതിയ സാമ്പത്തിക-നയതന്ത്ര നീക്കങ്ങൾ അന്താരാഷ്ട്ര തലത്തിൽ വലിയ പ്രതിസന്ധിക്ക് കാരണമായേക്കാം എന്നാണ് വിലയിരുത്തപ്പെടുന്നത്. അമേരിക്കയെയും മറ്റ് പാശ്ചാത്യ രാജ്യങ്ങളെയും പ്രതിരോധത്തിലാക്കാൻ ഇറാൻ സമുദ്രപാതയെ ആയുധമാക്കുമ്പോൾ, അത് ആഗോള ഇന്ധന വിപണിയെയും ചരക്കുനീക്കത്തെയും എങ്ങനെ ബാധിക്കുമെന്ന ആശങ്കയിലാണ് ലോകരാജ്യങ്ങൾ.
Iran Plans Strait of Hormuz Fees for Passing Ships
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
