ഗാന്ധിനഗർ: വികസിത രാജ്യങ്ങളായ കാനഡ, അമേരിക്ക എന്നിവിടങ്ങളേക്കാൾ വേഗത്തിൽ ഗുജറാത്തിലെ പൊതുജനാരോഗ്യ സംവിധാനം ചികിത്സ ലഭ്യമാക്കുന്നുണ്ടെന്ന് ആരോഗ്യ മന്ത്രി പ്രഫുൽ പൻഷേറിയ. ഗാന്ധിനഗറിലെ ജി.എം.ഇ.ആർ.എസ് മെഡിക്കൽ കോളേജിലും സിവിൽ ആശുപത്രിയിലുമായി സംഘടിപ്പിച്ച ‘അന്താരാഷ്ട്ര നഴ്സസ് ദിന’ ആഘോഷങ്ങളിൽ പങ്കെടുത്ത് സംസാരിക്കുകയായിരുന്നു അദ്ദേഹം. ഇന്ത്യയിലെ ആരോഗ്യ സംവിധാനത്തെ ആഗോള തലവുമായി താരതമ്യം ചെയ്തുകൊണ്ടാണ് മന്ത്രി ഈ പരാമർശം നടത്തിയത്.
കാനഡയും അമേരിക്കയും പോലുള്ള രാജ്യങ്ങളിൽ അത്യാധുനിക അടിസ്ഥാന സൗകര്യങ്ങൾ ഉണ്ടെങ്കിലും, ചികിത്സയ്ക്കായുള്ള നീണ്ട കാത്തിരിപ്പ് പട്ടിക രോഗികൾക്ക് വെല്ലുവിളിയാണെന്ന് മന്ത്രി ചൂണ്ടിക്കാട്ടി. എന്നാൽ ഗുജറാത്തിലെ 108 ആംബുലൻസ് സേവനവും സർക്കാർ ആശുപത്രികളും അടിയന്തര സാഹചര്യങ്ങളിൽ സമയബന്ധിതമായ ചികിത്സ ഉറപ്പാക്കുന്നുണ്ട്. കോവിഡ് കാലത്ത് വികസിത രാജ്യങ്ങൾ പോലും പ്രതിസന്ധിയിലായപ്പോൾ, ഗുജറാത്തിലെ നഴ്സുമാർ ‘ആയിരക്കണക്കിന് ഫ്ളോറൻസ് നൈറ്റിംഗേലുകൾ’ ആയി മാറി നിരവധി ജീവനുകൾ രക്ഷിച്ചതായും മന്ത്രി അനുസ്മരിച്ചു.
നഴ്സിംഗ് എന്നത് കേവലം സാങ്കേതിക മികവ് മാത്രമല്ലെന്നും രോഗികളോടുള്ള കരുണയും സഹാനുഭൂതിയും സേവന മനോഭാവവുമാണ് ഈ മേഖലയുടെ കരുത്തെന്നും അദ്ദേഹം പറഞ്ഞു. ആധുനിക നഴ്സിംഗിന്റെ സ്ഥാപകയായ ഫ്ലോറൻസ് നൈറ്റിംഗേലിന്റെ ജന്മവാർഷികത്തോടനുബന്ധിച്ച് നടന്ന ചടങ്ങിൽ നഴ്സിംഗ് സ്റ്റാഫും വിദ്യാർത്ഥികളും ഉന്നത ഉദ്യോഗസ്ഥരും പങ്കെടുത്തു. ചടങ്ങിന്റെ ഭാഗമായി കായിക മത്സരങ്ങളിൽ വിജയിച്ച വിദ്യാർത്ഥികൾക്ക് സമ്മാനങ്ങൾ വിതരണം ചെയ്യുകയും നഴ്സിംഗ് വിദ്യാർത്ഥികൾ സാംസ്കാരിക പരിപാടികൾ അവതരിപ്പിക്കുകയും ചെയ്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Health revolution that rivals America and Canada; Minister discusses Gujarat model
