മോണ്ടേഗ്; കഠിനാധ്വാനം നിറഞ്ഞ ജീവിതത്തിനിടയിലേക്ക് അപ്രതീക്ഷിതമായി എത്തിയ ഭാഗ്യത്തിന്റെ ആവേശത്തിലാണ് പ്രിൻസ് എഡ്വേർഡ് ഐലൻഡ് (P.E.I.) സ്വദേശിയായ മൈക്കൽ കോളിൻസ്. ലോട്ടോ മാക്സ് (Lotto Max) നറുക്കെടുപ്പിലൂടെ ഒരു മില്യൺ ഡോളറിന്റെ (ഏകദേശം 8.3 കോടിയിലധികം ഇന്ത്യൻ രൂപ) വൻതുകയാണ് മോണ്ടേഗ് സ്വദേശിയായ ഇദ്ദേഹം സ്വന്തമാക്കിയത്. തിങ്കളാഴ്ചയാണ് ലോട്ടറി അധികൃതർ ഔദ്യോഗികമായി വിജയിയെ പ്രഖ്യാപിച്ചത്. മെയ് ഒന്നിന് നടന്ന നറുക്കെടുപ്പിലാണ് മൈക്കൽ കോളിൻസിനെ തേടി ഭാഗ്യദേവത എത്തിയത്.
ഗതാഗത മേഖലയിൽ ജോലി ചെയ്യുന്ന മൈക്കൽ, എല്ലാ വർഷവും കൊയ്ത്തുകാലത്ത് ഉരുളക്കിഴങ്ങ് കൃഷിയിലും സജീവമായി ഏർപ്പെടാറുണ്ട്. സമ്മാനവാർത്ത അറിഞ്ഞപ്പോൾ തനിക്കുണ്ടായ വികാരം വിവരിക്കാനാവാത്തതാണെന്ന് അദ്ദേഹം പറഞ്ഞു. “ഇതൊരു പ്രത്യേക അനുഭവം തന്നെയാണ്. ഇതിനുമുമ്പ് ഇങ്ങനെയൊന്ന് സംഭവിച്ചിട്ടില്ല, ഇനിയൊരിക്കൽ കൂടി സംഭവിക്കണമെന്നുമില്ല. അതുകൊണ്ടുതന്നെ ഈ സന്തോഷം ഞാൻ പൂർണ്ണമായും ആസ്വദിക്കാൻ പോവുകയാണ്,” കോളിൻസ് വാർത്താക്കുറിപ്പിൽ വ്യക്തമാക്കി.
വിശ്രമമില്ലാത്ത ജോലിത്തിരക്കുകളിൽ നിന്ന് അല്പം പിന്നോട്ട് മാറാൻ ഈ സമ്മാനത്തുക സഹായിക്കുമെന്നാണ് മൈക്കൽ കരുതുന്നത്. ലഭിച്ച തുകയുടെ ഭൂരിഭാഗവും സമ്പാദ്യമായി മാറ്റിവയ്ക്കാനാണ് തീരുമാനം. എങ്കിലും, തന്റെ കുടുംബവുമായി സന്തോഷം പങ്കുവെക്കാനും പ്രിയപ്പെട്ട കായിക ടീമുകളുടെ മത്സരങ്ങൾ നേരിട്ട് കാണാനായി യാത്രകൾ നടത്താനും അദ്ദേഹം പദ്ധതിയിടുന്നുണ്ട്. തന്റെ ആഗ്രഹങ്ങളുടെ പട്ടികയിലുള്ള (Bucket List) പ്രധാന കാര്യങ്ങൾ ഇനി ഓരോന്നായി നടപ്പിലാക്കാനൊരുങ്ങുകയാണ് ഈ ഭാഗ്യശാലി.
ശരിയായ പ്രായത്തിലാണ് ഈ ഭാഗ്യം തന്നെ തേടിയെത്തിയതെന്നാണ് മൈക്കലിന്റെ വിലയിരുത്തൽ. “ജോലിയിൽ നിന്ന് വിരമിക്കാൻ തയ്യാറെടുക്കുന്ന പ്രായത്തിലാണ് ഞാൻ. നിലവിൽ 70 വയസ്സായിട്ടും ജോലി ചെയ്യുന്ന പലരെയും എനിക്കറിയാം. ഈ പണം ലഭിച്ചില്ലായിരുന്നെങ്കിൽ ഒരുപക്ഷേ ഞാനും അവരിൽ ഒരാളാകുമായിരുന്നു. എന്നാൽ ഇപ്പോൾ എനിക്ക് നേരത്തെ തന്നെ വിശ്രമജീവിതത്തിലേക്ക് പ്രവേശിക്കാൻ സാധിക്കും,” അദ്ദേഹം കൂട്ടിച്ചേർത്തു. മൈക്കൽ ടിക്കറ്റെടുത്ത മോണ്ടേഗിലെ ‘സർക്കിൾ കെ’ (Circle K) എന്ന വ്യാപാര സ്ഥാപനത്തിനും സമ്മാനത്തുകയുടെ ഒരു ശതമാനം കമ്മീഷനായി ലഭിക്കും.
Millions won through Lotto Max
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
