മാനിറ്റോബ നിയമസഭയിൽ ചില വാക്കുകൾക്ക് വിലക്ക്; സ്പീക്കറുമായി കൊമ്പുകോർത്ത് പ്രീമിയർ! സഭയിൽ പോര് മുറുകുന്നു

വിന്നിപെഗ്: മാനിറ്റോബ നിയമസഭയിൽ ചില പ്രത്യേക പദങ്ങൾ ഉപയോഗിക്കുന്നതിന് സ്പീക്കർ ഏർപ്പെടുത്തിയ വിലക്കിനെച്ചൊല്ലി പ്രീമിയർ വാബ് കിന്യുവും സ്പീക്കർ ടോം ലിൻഡ്സെയും തമ്മിലുള്ള ഭിന്നത രൂക്ഷമാകുന്നു. സഭയിൽ ‘വർഗീയവാദി’ (Racist), ‘അസഹിഷ്ണുത പുലർത്തുന്നയാൾ’ (Bigot) തുടങ്ങിയ പദങ്ങൾ ഉപയോഗിക്കുന്നത് നിരോധിച്ച സ്പീക്കറുടെ തീരുമാനം അടിയന്തരമായി പിൻവലിക്കണമെന്ന് പ്രീമിയർ ആവശ്യപ്പെട്ടു.

നിയമസഭയിലെ അമിതമായ പരിഹാസവിളികളും ചട്ടവിരുദ്ധമായ ഭാഷാപ്രയോഗങ്ങളും നിയന്ത്രിക്കുന്നതിന്റെ ഭാഗമായി കഴിഞ്ഞ തിങ്കളാഴ്ചയാണ് സ്പീക്കർ ടോം ലിൻഡ്സെ പുതിയ നിയന്ത്രണങ്ങൾ കൊണ്ടുവന്നത്. എന്നാൽ, പ്രതിപക്ഷത്തുനിന്നും ഉണ്ടാകുന്ന വംശീയ അധിക്ഷേപങ്ങൾക്കെതിരെ പ്രതികരിക്കാനുള്ള അവകാശത്തെ ഈ വിലക്ക് തടയുന്നു എന്നാണ് പ്രീമിയറുടെ നിലപാട്.

കഴിഞ്ഞ മാസം നിയമസഭയിൽ നടന്ന ഒരു തർക്കമാണ് ഇപ്പോഴത്തെ പ്രശ്നങ്ങൾക്ക് തുടക്കമിട്ടത്. പ്രതിപക്ഷ അംഗമായ വെയ്ൻ ഇവാസ്കോ, പ്രീമിയർ വാബ് കിന്യു മദ്യപിച്ചിട്ടുണ്ടോ എന്ന് സംശയിക്കുന്ന രീതിയിൽ സംസാരിച്ചിരുന്നു. എന്നാൽ താൻ മദ്യപിക്കുന്ന ആളല്ലെന്നും, ഫസ്റ്റ് നേഷൻസിനെ മോശക്കാരായി ചിത്രീകരിക്കുന്ന പഴയ ചില തെറ്റായ ധാരണകളുടെ ഭാഗമായാണ് ഇവാസ്കോ ഇങ്ങനെ പറഞ്ഞതെന്നും പ്രീമിയർ ആരോപിച്ചു. സഭയിൽ ഇത്തരം വംശീയമായ അധിക്ഷേപങ്ങൾ ഉണ്ടാകുമ്പോൾ അതിനെ ‘വംശീയത’ എന്ന് തന്നെ വിളിക്കാൻ തനിക്ക് അനുവാദം വേണമെന്നാണ് പ്രീമിയറുടെ വാദം.

സ്പീക്കർ ടോം ലിൻഡ്സെ പ്രീമിയറുടെ അതേ പാർട്ടിയിൽ (എൻഡിപി) നിന്നുള്ള ആളാണെങ്കിലും, സ്പീക്കർ സ്ഥാനത്തിരിക്കുന്നത് കൊണ്ട് അദ്ദേഹം ഇപ്പോൾ മധ്യസ്ഥനായാണ് പ്രവർത്തിക്കുന്നത്. സ്പീക്കർ വാക്കുകൾക്ക് വിലക്ക് ഏർപ്പെടുത്തിയതിനെ പ്രതിപക്ഷമായ പ്രോഗ്രസീവ് കോൺസർവേറ്റീവ് പാർട്ടി സ്വാഗതം ചെയ്തു. സ്വന്തം പാർട്ടിയിൽപ്പെട്ട സ്പീക്കറിൽ പോലും പ്രീമിയർക്ക് വിശ്വാസമില്ലാതായി എന്നാണ് പ്രതിപക്ഷം പരിഹസിക്കുന്നത്.

സ്പീക്കറെ പിന്തുണയ്ക്കുന്നുണ്ടോ എന്ന ചോദ്യത്തിന് ഡെപ്യൂട്ടി പ്രീമിയർ ഉസോമ അസഗ്വാര വ്യക്തമായ മറുപടി നൽകിയില്ല. എന്നാൽ പ്രീമിയറുടെ നിലപാടിനൊപ്പമാണ് താനെന്ന് അവർ മാധ്യമങ്ങളോട് പറഞ്ഞു. സ്പീക്കർ തന്റെ തീരുമാനത്തിൽ ഉറച്ചുനിന്നാൽ ഭരണഘടനപരമായ പ്രതിസന്ധിയുണ്ടാകുമോ എന്ന കാര്യത്തിൽ ഇതുവരെ വ്യക്തത വന്നിട്ടില്ല. വിഷയത്തിൽ പ്രതികരിക്കാൻ സ്പീക്കറുടെ ഓഫീസും തയ്യാറായിട്ടില്ല.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Manitoba legislature bans certain words; Premier clashes with speaker! Fight intensifies in the assembly