ഒട്ടാവ: കാനഡയിൽ മുതിർന്ന പൗരന്മാർക്കിടയിൽ സാമ്പത്തിക തട്ടിപ്പുകൾ വർദ്ധിക്കുന്ന സാഹചര്യത്തിൽ, സാമ്പത്തിക ഇടപാടുകൾ നിരീക്ഷിക്കാൻ ഒരു Trusted Contact Person – TCP നിയോഗിക്കണമെന്ന് വിദഗ്ധർ നിർദ്ദേശിച്ചു. കനേഡിയൻ ആന്റി ഫ്രോഡ് സെന്ററിന്റെ കണക്കുകൾ പ്രകാരം കഴിഞ്ഞ വർഷം 704 മില്യൺ ഡോളറിലധികം തുക രാജ്യത്ത് തട്ടിപ്പിലൂടെ നഷ്ടപ്പെട്ടു. 2024-ൽ ഇത് 645 മില്യൺ ഡോളറായിരുന്നു. 2022 മുതൽ ഇതുവരെ റിപ്പോർട്ട് ചെയ്യപ്പെട്ട ആകെ നഷ്ടം 2.4 ബില്യൺ ഡോളർ കവിഞ്ഞതായും റിപ്പോർട്ടുകൾ വ്യക്തമാക്കുന്നു.
60 വയസ്സിന് മുകളിലുള്ളവർ തട്ടിപ്പിന് ഇരയാകാൻ 18-29 പ്രായക്കാരെ അപേക്ഷിച്ച് രണ്ട് മടങ്ങ് കൂടുതൽ സാധ്യതയുണ്ടെന്ന് ആംഗസ് റീഡ് ഇൻസ്റ്റിറ്റ്യൂട്ട് നടത്തിയ പഠനം ചൂണ്ടിക്കാട്ടുന്നു. ജനസംഖ്യയിൽ മുതിർന്നവരുടെ എണ്ണം വർദ്ധിക്കുന്നതും ആർട്ടിഫിഷ്യൽ ഇന്റലിജൻസ് സാങ്കേതികവിദ്യയുടെ വളർച്ചയുമാണ് തട്ടിപ്പുകൾ കൂടാൻ കാരണമായി വിലയിരുത്തപ്പെടുന്നത്. പലപ്പോഴും കുടുംബാംഗങ്ങളിൽ നിന്ന് തന്നെ മുതിർന്നവർ സാമ്പത്തിക ചൂഷണം നേരിടുന്നുണ്ടെന്നും റിപ്പോർട്ടിലുണ്ട്. കേസ് റിപ്പോർട്ട് ചെയ്യുന്നവരുടെ എണ്ണം അഞ്ചു മുതൽ പത്ത് ശതമാനം വരെ മാത്രമായതിനാൽ യഥാർത്ഥ നഷ്ടം ഇതിലും വലുതാകാനാണ് സാധ്യത.
സാമ്പത്തിക തട്ടിപ്പുകൾ തടയുന്നതിനായി ഇടപാടുകാർ ഒരു വിശ്വസ്ത വ്യക്തിയെ (TCP) നാമനിർദ്ദേശം ചെയ്യണമെന്ന് കനേഡിയൻ സെക്യൂരിറ്റീസ് അഡ്മിനിസ്ട്രേറ്റേഴ്സ് (CSA) സാമ്പത്തിക ഉപദേശകർക്ക് നിർദ്ദേശം നൽകി. ഉപഭോക്താവിന്റെ സാമ്പത്തിക തീരുമാനങ്ങളെടുക്കാനുള്ള കഴിവിൽ സംശയമുണ്ടാവുകയോ ചൂഷണം ചെയ്യപ്പെടുന്നു എന്ന് തോന്നുകയോ ചെയ്താൽ ഉപദേശകർക്ക് ഈ വ്യക്തിയുമായി ബന്ധപ്പെടാം. ഉപഭോക്താവിന് ഡിമെൻഷ്യ (മറവിരോഗം) പോലുള്ള ആരോഗ്യപ്രശ്നങ്ങൾ സംശയിക്കുന്നുണ്ടെങ്കിൽ ഇടപാടുകൾ താൽക്കാലികമായി നിർത്തിവെക്കാൻ ഉപദേശകർക്ക് അധികാരം നൽകിയിട്ടുണ്ട്.
ഒരു വ്യക്തിയെ വിശ്വസ്തനായി തിരഞ്ഞെടുക്കുമ്പോൾ അയാൾക്ക് അക്കൗണ്ടുകളിൽ നേരിട്ട് പ്രവേശനമുണ്ടാകില്ലെന്ന് അതോറിറ്റി വ്യക്തമാക്കി. ഗുണഭോക്താവല്ലാത്ത (Beneficiary), പക്വതയുള്ള ഒരാളെ വേണം ഈ സ്ഥാനത്തേക്ക് തിരഞ്ഞെടുക്കാൻ. ഇതുകൂടാതെ പവർ ഓഫ് അറ്റോർണി (POA) നൽകാനുള്ള ഓപ്ഷനും നിലവിലുണ്ട്. സാമ്പത്തിക രേഖകൾ കൃത്യമായി പരിശോധിക്കുക, ഒപ്പിടുന്ന രേഖകളുടെ പകർപ്പ് സൂക്ഷിക്കുക, കുടുംബാംഗങ്ങളിൽ നിന്നുള്ള സാമ്പത്തിക സമ്മർദ്ദങ്ങൾക്ക് വഴങ്ങാതിരിക്കുക തുടങ്ങിയ മുൻകരുതലുകൾ മുതിർന്ന പൗരന്മാർ സ്വീകരിക്കണമെന്ന് അധികൃതർ അറിയിച്ചു.
Financial fraud against seniors on the rise in Canada; CSA issues new guidelines
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
