വാഷിംഗ്ടൺ: ലോകത്തെ ഏറ്റവും വലിയ വ്യാപാര കരാറുകളിലൊന്നായ യുണൈറ്റഡ് സ്റ്റേറ്റ്സ്-മെക്സിക്കോ-കാനഡ എഗ്രിമെന്റ് (USMCA) 2026-ൽ നിർണ്ണായകമായ പുനപരിശോധനയിലേക്ക് കടക്കുന്നു. കരാർ നടപ്പിലാക്കി ആറ് വർഷം പിന്നിടുമ്പോൾ, അമേരിക്കയും അയൽരാജ്യങ്ങളും തമ്മിലുള്ള ബന്ധം മുമ്പെങ്ങുമില്ലാത്തവിധം വഷളായിരിക്കുകയാണ്. പ്രത്യേകിച്ച് കാനഡയുമായി അമേരിക്ക പുലർത്തുന്ന കടുത്ത വ്യാപാര നിയന്ത്രണങ്ങൾ വടക്കേ അമേരിക്കൻ സാമ്പത്തിക മേഖലയിൽ വലിയ അനിശ്ചിതത്വത്തിന് വഴിമാറുന്നു.
തന്റെ ആദ്യ ഭരണകാലത്ത് ‘ഏറ്റവും മികച്ച വ്യാപാര കരാർ’ എന്ന് ഡോണാൾഡ് ട്രംപ് വിശേഷിപ്പിച്ച USMCA-യോട്, രണ്ടാം ഊഴത്തിൽ അദ്ദേഹം സ്വീകരിക്കുന്ന നിലപാടുകൾ കാനഡയെയും മെക്സിക്കോയെയും ഒരുപോലെ പ്രകോപിപ്പിച്ചിട്ടുണ്ട്. കഴിഞ്ഞ വർഷം മുതൽ സ്റ്റീൽ, അലുമിനിയം തുടങ്ങിയ ഉൽപ്പന്നങ്ങൾക്ക് മേൽ അമേരിക്ക ഏർപ്പെടുത്തിയ അധിക നികുതികൾ കരാറിന്റെ അന്തഃസത്തയ്ക്ക് വിരുദ്ധമാണെന്നാണ് ഇരുരാജ്യങ്ങളുടെയും വാദം. ഇതിന് മറുപടിയായി കാനഡയും മെക്സിക്കോയും കൈകോർത്ത് ‘കോംപ്രിഹെൻസീവ് സ്ട്രാറ്റജിക് പാർട്ണർഷിപ്പ്’ പ്രഖ്യാപിച്ചതോടെ വാഷിംഗ്ടണും അയൽരാജ്യങ്ങളും രണ്ട് തട്ടിലായി.
മുൻകാലങ്ങളിൽ മെക്സിക്കോയുമായായിരുന്നു അമേരിക്കയ്ക്ക് കൂടുതൽ തർക്കങ്ങളുണ്ടായിരുന്നതെങ്കിൽ, നിലവിൽ കാനഡയാണ് പ്രധാന വെല്ലുവിളിയെന്ന് യുഎസ് ട്രേഡ് പ്രതിനിധികൾ വ്യക്തമാക്കുന്നു. കാനഡയിലെ രാഷ്ട്രീയ നേതൃത്വത്തെ പരോക്ഷമായി വിമർശിച്ചുകൊണ്ട് അമേരിക്കൻ ഉദ്യോഗസ്ഥർ രംഗത്തെത്തിയത് നയതന്ത്ര ബന്ധത്തെ കൂടുതൽ ഉലച്ചിട്ടുണ്ട്. അമേരിക്കൻ ഉൽപ്പന്നങ്ങൾ ബഹിഷ്കരിക്കാനുള്ള ആഹ്വാനങ്ങൾ കാനഡയിൽ ശക്തമാകുന്നതും, ‘കാനഡ ഫസ്റ്റ്’ എന്ന പുതിയ ദേശീയവാദം ഉയരുന്നതും ഇരുരാജ്യങ്ങളും തമ്മിലുള്ള വ്യാപാര ടൂറിസം മേഖലകളെ പ്രതികൂലമായി ബാധിച്ചു തുടങ്ങിയിട്ടുണ്ട്.
ജൂലൈ ഒന്നിന് നടക്കാനിരിക്കുന്ന പുനപരിശോധനയിൽ ചൈനയുമായുള്ള വ്യാപാര ബന്ധങ്ങളിൽ കാനഡയും മെക്സിക്കോയും അമേരിക്കയുടെ അതേ നിലപാട് സ്വീകരിക്കണമെന്ന ആവശ്യം ട്രംപ് ഭരണകൂടം മുന്നോട്ട് വെച്ചേക്കും. ഉൽപ്പന്നങ്ങളുടെ ഉത്ഭവത്തെ അടിസ്ഥാനമാക്കിയുള്ള നിലവിലെ നിബന്ധനകൾ മാറ്റി, ചൈനീസ് കമ്പനികൾ കാനഡയിലോ മെക്സിക്കോയിലോ നിർമ്മിക്കുന്ന ഉൽപ്പന്നങ്ങൾക്ക് പോലും നിരോധനം ഏർപ്പെടുത്തുന്ന തരത്തിലുള്ള കർശന നിയന്ത്രണങ്ങൾ അമേരിക്ക ലക്ഷ്യമിടുന്നുണ്ട്.
ഇറാൻ യുദ്ധവും അന്താരാഷ്ട്ര തലത്തിലെ ഇന്ധനവില വർദ്ധനവും ലോക സമ്പദ്വ്യവസ്ഥയെ ബാധിച്ചിരിക്കുന്ന സാഹചര്യത്തിൽ, വടക്കേ അമേരിക്കയിലെ ഈ വ്യാപാര പ്രതിസന്ധി മറ്റൊരു ആഗോള സാമ്പത്തിക തകർച്ചയ്ക്ക് കാരണമാകുമോ എന്ന ആശങ്ക ശക്തമാണ്. പുനപരിശോധനയിൽ ഏകകണ്ഠമായ തീരുമാനം ഉണ്ടായില്ലെങ്കിൽ, കരാർ റദ്ദാക്കപ്പെടില്ലെങ്കിലും എല്ലാ വർഷവും നടത്തുന്ന പരിശോധനകൾ ബിസിനസ്സ് നിക്ഷേപങ്ങളെ സാരമായി ബാധിക്കും. വരും മാസങ്ങളിൽ നടക്കുന്ന ചർച്ചകൾ അമേരിക്കയുടെയും അയൽരാജ്യങ്ങളുടെയും സാമ്പത്തിക ഭാവിയെ സംബന്ധിച്ച് നിർണ്ണായകമാകും.
Cracks in Trump's trade policies; Open war with Canada; Is the USMCA agreement in crisis?
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
