ടൊറന്റോ: കാനഡയിൽ സ്ഥിരതാമസമാക്കാൻ ആഗ്രഹിക്കുന്നവർക്ക് വലിയ ആശ്വാസം പകർന്ന് ഒന്റാറിയോ ഇമിഗ്രന്റ് നോമിനി പ്രോഗ്രാമിന്റെ (OINP) ഏറ്റവും പുതിയ നറുക്കെടുപ്പ് ഫലം പുറത്തു വന്നു. ഏപ്രിൽ 30-ന് നടന്ന ഈ പ്രത്യേക ഡ്രോയിലൂടെ ഗ്രേറ്റർ ടൊറന്റോ ഏരിയയിൽ (GTA) ജോലി ചെയ്യുന്ന 997 ഉദ്യോഗാർത്ഥികൾക്കാണ് കാനഡ പിആർ അപേക്ഷ നൽകാനുള്ള ക്ഷണം ലഭിച്ചത്. ഫോറിൻ വർക്കർ സ്ട്രീം വഴി 720 പേർക്കും ഇന്റർനാഷണൽ സ്റ്റുഡന്റ് സ്ട്രീം വഴി 277 പേർക്കുമാണ് ഇത്തവണ നറുക്കെടുപ്പിലൂടെ അവസരം ലഭിച്ചിരിക്കുന്നത്.
ഇത്തവണത്തെ നറുക്കെടുപ്പിൽ സ്കോർ നിലവാരം കുറഞ്ഞത് ഒട്ടേറെ ഉദ്യോഗാർത്ഥികൾക്കും ഗുണകരമാകും. ഫോറിൻ വർക്കർ വിഭാഗത്തിൽ 57 പോയിന്റും ഇന്റർനാഷണൽ സ്റ്റുഡന്റ് വിഭാഗത്തിൽ 81 പോയിന്റുമാണ് കട്ട് ഓഫ് ആയി നിശ്ചയിച്ചിരിക്കുന്നത്. മുൻപ് നടന്ന നറുക്കെടുപ്പുകളെ അപേക്ഷിച്ച് ഇത് വളരെ കുറവാണെന്നത് ശ്രദ്ധേയമാണ്. ടൊറന്റോ, പീൽ, യോർക്ക്, ദുർഹം, ഹാൽട്ടൺ എന്നീ മേഖലകളിൽ ജോലി ചെയ്യുന്ന ഐടി പ്രൊഫഷണലുകൾ, ആരോഗ്യ പ്രവർത്തകർ, കൺസ്ട്രക്ഷൻ മാനേജർമാർ എന്നിവർക്കാണ് ഈ നറുക്കെടുപ്പിൽ പ്രധാനമായും മുൻഗണന ലഭിച്ചത്.
ക്ഷണം ലഭിച്ച ഉദ്യോഗാർത്ഥികൾ സമയം വൈകാതെ തന്നെ അപേക്ഷാ നടപടികൾ ആരംഭിക്കേണ്ടതുണ്ട്. തൊഴിലുടമകൾക്ക് അവരുടെ ഭാഗത്തുനിന്നുള്ള രേഖകൾ സമർപ്പിക്കാൻ 14 ദിവസത്തെ സമയവും ഉദ്യോഗാർത്ഥികൾക്ക് അപേക്ഷ പൂർത്തിയാക്കാൻ 17 ദിവസത്തെ സമയവുമാണ് അനുവദിച്ചിരിക്കുന്നത്. മെയ് 30-ന് ഒന്റാറിയോ ഇമിഗ്രേഷൻ നിയമങ്ങളിൽ വലിയ പരിഷ്കാരങ്ങൾ വരാനിരിക്കുന്നതിനാൽ, നിലവിലെ രീതിയിലുള്ള അവസാന അവസരങ്ങളിൽ ഒന്നായാണ് ഇതിനെ കണക്കാക്കുന്നത്. ഏപ്രിൽ മാസത്തിൽ മാത്രം എണ്ണായിരത്തിലധികം പേർക്ക് ക്ഷണം നൽകിക്കൊണ്ട് ഒന്റാറിയോ പിഎൻപി ചരിത്രത്തിലെ ഏറ്റവും തിരക്കേറിയ മാസമായി ഇത് മാറിയിരിക്കുകയാണ്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
2 New Ontario OINP Draws On April 30
