ഹാലിഫാക്സ്: നോവ സ്കോഷ്യയിലേക്ക് കുടിയേറാൻ ആഗ്രഹിക്കുന്നവർക്കായി പുതിയ സെലക്ഷൻ മുൻഗണനകൾ പ്രഖ്യാപിച്ചു. നോവ സ്കോഷ്യ നോമിനി പ്രോഗ്രാം (NSNP) വഴി ഇനി മുതൽ ആരോഗ്യമേഖലയിലുള്ളവർക്കും വിദഗ്ധ തൊഴിലാളികൾക്കുമായിരിക്കും ഏറ്റവും കൂടുതൽ പ്രാധാന്യം ലഭിക്കുക. ഏപ്രിൽ 27-ന് പുറത്തിറക്കിയ പുതിയ വിജ്ഞാപന പ്രകാരം മൂന്ന് തലങ്ങളിലായാണ് അപേക്ഷകരെ പരിഗണിക്കുന്നത്.
ആരോഗ്യമേഖലയിലെ ജീവനക്കാർക്കും പ്ലംബിംഗ്, ഇലക്ട്രീഷ്യൻ തുടങ്ങിയ വിദഗ്ധ തൊഴിൽ ചെയ്യുന്നവർക്കുമാണ് പ്രവിശ്യാ ഭരണകൂടം ഒന്നാം പരിഗണന നൽകുന്നത്. നിലവിൽ നോവ സ്കോഷ്യയിൽ ഉള്ളവർക്കും വിദേശത്തുനിന്ന് അപേക്ഷിക്കുന്നവർക്കും ഈ വിഭാഗത്തിൽ അപേക്ഷിക്കാൻ സാധിക്കും. എന്നാൽ മറ്റ് തൊഴിൽ മേഖലകളിൽ ഉള്ളവർക്ക് നിബന്ധനകൾ കടുപ്പിച്ചിരിക്കുകയാണ്. സയൻസ്, വിദ്യാഭ്യാസം, കൃഷി, മാനുഫാക്ചറിംഗ് തുടങ്ങിയ മേഖലകളിൽ ജോലി ചെയ്യുന്നവർ നിലവിൽ പ്രവിശ്യയിൽ താൽക്കാലിക താമസക്കാരായി ജോലി ചെയ്യുന്നവരാണെങ്കിൽ മാത്രമേ അവരെ രണ്ടാം തലത്തിൽ പരിഗണിക്കുകയുള്ളൂ. മറ്റ് സാധാരണ തൊഴിലുകളിൽ ഏർപ്പെട്ടിരിക്കുന്നവർക്ക് മൂന്നാം തലത്തിൽ വളരെ പരിമിതമായ അവസരങ്ങൾ മാത്രമേ ലഭ്യമാകൂ.
TEER 5 വിഭാഗത്തിൽപ്പെട്ട സാധാരണ ലേബർ ജോലികൾ ചെയ്യുന്നവരെ നിലവിൽ നോമിനേഷനായി പരിഗണിക്കുന്നതല്ല എന്ന കാര്യവും ഉദ്യോഗാർത്ഥികൾ ശ്രദ്ധിക്കണം. ആരോഗ്യമേഖലയിലോ ട്രേഡ്സ് മേഖലയിലോ അല്ലാത്തവർക്ക് വിദേശത്തുനിന്ന് നേരിട്ട് അപേക്ഷിക്കാനുള്ള അവസരം ഈ പുതിയ മാറ്റത്തോടെ പരിമിതപ്പെടും. അതേസമയം ഡോക്ടർമാർക്കായി പ്രത്യേക ‘ലേബർ മാർക്കറ്റ് പ്രയോറിറ്റീസ്’ സ്ട്രീം വഴി അപേക്ഷിക്കാനുള്ള സൗകര്യം തുടരും. പ്രവിശ്യയിലെ തൊഴിൽ വിപണിയിലെ ഒഴിവുകൾ വേഗത്തിൽ നികത്താനാണ് ഭരണകൂടം ഈ പുതിയ മുൻഗണനാ പട്ടിക തയ്യാറാക്കിയിരിക്കുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Nova Scotia nominee program to prioritize workers in healthcare, trades, and select other sectors
