ശ്രീലങ്കയിലെ ബന്ദാരനായകെ അന്താരാഷ്ട്ര വിമാനത്താവളത്തിൽ വൻ ലഹരിമരുന്ന് ശേഖരം പിടികൂടി. തായ്ലൻഡിലെ ബാങ്കോക്കിൽ നിന്ന് മടങ്ങിയെത്തിയ 22 ബുദ്ധസന്യാസിമാരിൽ നിന്നാണ് ഏകദേശം 110 കിലോഗ്രാം കഞ്ചാവും ഹാഷിഷും പോലീസ് നാർക്കോട്ടിക് ബ്യൂറോ പിടിച്ചെടുത്തത്. വിമാനത്താവളത്തിന്റെ ചരിത്രത്തിലെ തന്നെ ഏറ്റവും വലിയ മയക്കുമരുന്ന് വേട്ടയാണിതെന്ന് അധികൃതർ സ്ഥിരീകരിച്ചു. അന്താരാഷ്ട്ര വിപണിയിൽ ഏകദേശം 31.8 കോടിയിലധികം രൂപ വിലമതിക്കുന്ന ‘കുഷ്’ ഇനത്തിൽപ്പെട്ട മയക്കുമരുന്നാണ് സന്യാസിമാരുടെ ലഗേജുകളിൽ നിന്ന് കണ്ടെടുത്തത്.
നാല് ദിവസത്തെ തായ്ലൻഡ് സന്ദർശനം കഴിഞ്ഞ് മടങ്ങുകയായിരുന്നു സന്യാസി സംഘം. ഇവരുടെ കൈവശമുണ്ടായിരുന്ന സ്യൂട്ട്കേസുകളിൽ പ്രത്യേക അറകൾ നിർമ്മിച്ചാണ് ലഹരിമരുന്ന് ഒളിപ്പിച്ചിരുന്നത്. തായ്ലൻഡിൽ നിന്ന് ചിലർ ദാനമായി നൽകിയ പാർസലുകളാണിവയെന്നും വിമാനത്താവളത്തിന് പുറത്ത് ഒരാൾ ഇത് കൈപ്പറ്റാൻ വരുമെന്നുമാണ് പിടിയിലായവർ മൊഴി നൽകിയത്. എന്നാൽ, കൃത്യമായ ആസൂത്രണത്തോടെയാണ് ലഹരിക്കടത്ത് നടന്നതെന്ന് പോലീസ് സംശയിക്കുന്നു. സംഭവവുമായി ബന്ധപ്പെട്ട് യാത്ര ആസൂത്രണം ചെയ്ത മറ്റൊരു സന്യാസിയെയും പനഗോഡയിൽ നിന്ന് പോലീസ് അറസ്റ്റ് ചെയ്തിട്ടുണ്ട്.
പിടിയിലായവരിൽ ഭൂരിഭാഗവും 19-നും 28-നും ഇടയിൽ പ്രായമുള്ള ഉന്നത വിദ്യാഭ്യാസം നേടിയ യുവ സന്യാസിമാരാണ്. ഇവരുടെ മൊബൈൽ ഫോണുകൾ പരിശോധിച്ച പോലീസിന് ഞെട്ടിക്കുന്ന വിവരങ്ങളാണ് ലഭിച്ചത്. സന്യാസിവേഷം ഉപേക്ഷിച്ച് സാധാരണ വസ്ത്രങ്ങൾ ധരിച്ച് തായ്ലൻഡിൽ ഉല്ലാസയാത്ര നടത്തുന്ന ഇവരുടെ ദൃശ്യങ്ങൾ മൊബൈലിൽ നിന്ന് കണ്ടെടുത്തിട്ടുണ്ട്. സന്യാസത്തിന്റെ മറവിൽ ആഡംബര ജീവിതവും നിയമവിരുദ്ധ പ്രവർത്തനങ്ങളും നടത്തിവന്ന സംഘമാണിതെന്ന് ഇതോടെ വ്യക്തമായി. നെഗോമ്പോ മജിസ്ട്രേറ്റ് കോടതി പ്രതികളെ മെയ് രണ്ട് വരെ കസ്റ്റഡിയിൽ വിട്ടു.
സംഭവം പുറത്തുവന്നതോടെ ശ്രീലങ്കയിലെ മുതിർന്ന ബുദ്ധമത നേതാക്കൾ കടുത്ത പ്രതിഷേധവുമായി രംഗത്തെത്തി. ബുദ്ധസന്യാസി എന്ന പവിത്രമായ പദവിയെ ദുരുപയോഗം ചെയ്ത ഇവർ സന്യാസി സമൂഹത്തിന് ആകെ അപമാനമാണെന്ന് നേതാക്കൾ പ്രതികരിച്ചു. പിടിയിലായവരെ ഉടനടി സന്യാസി പദവിയിൽ നിന്ന് പുറത്താക്കണമെന്നും നിയമപരമായ കർശന നടപടികൾ സ്വീകരിക്കണമെന്നും അവർ ആവശ്യപ്പെട്ടു. സംഭവത്തിൽ കൂടുതൽ അന്വേഷണം നടക്കുകയാണെന്നും ഇതിന് പിന്നിൽ വലിയ ലഹരി മാഫിയകൾക്ക് പങ്കുണ്ടോ എന്ന് പരിശോധിക്കുമെന്നും ലങ്കൻ പോലീസ് അറിയിച്ചു.
22 Buddhist monks arrested at Sri Lanka airport with 110 kg of cannabis on ‘sponsored excursion’ to Thailand
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
