ഡൽഹി : ഐപിഎല്ലിൽ ഡൽഹി ക്യാപിറ്റൽസിനെ തകർത്തെറിഞ്ഞ് റോയൽ ചലഞ്ചേഴ്സ് ബെംഗളൂരു ഒൻപത് വിക്കറ്റിന്റെ ആധികാരിക ജയം സ്വന്തമാക്കി. അരുൺ ജയ്റ്റ്ലി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഡൽഹി ഉയർത്തിയ 76 റൺസ് വിജയലക്ഷ്യം വെറും 6.3 ഓവറിൽ ഒരു വിക്കറ്റ് മാത്രം നഷ്ടപ്പെടുത്തി ബെംഗളൂരു മറികടന്നു. ഐപിഎൽ ചരിത്രത്തിലെ തന്നെ ഏറ്റവും മോശം പവർപ്ലേ പ്രകടനത്തിനാണ് ഡൽഹി ഇന്ന് സാക്ഷ്യം വഹിച്ചത്. പവർപ്ലേ അവസാനിക്കുമ്പോൾ ആറ് വിക്കറ്റ് നഷ്ടത്തിൽ വെറും 13 റൺസ് മാത്രമാണ് ടീമിന് നേടാനായത്. ഒരു ഘട്ടത്തിൽ എട്ട് റൺസിന് ആറ് വിക്കറ്റ് എന്ന നിലയിൽ തകർന്നടിഞ്ഞ ഡൽഹിയെ 30 റൺസെടുത്ത അഭിഷേക് പോറലും 19 റൺസെടുത്ത ഡേവിഡ് മില്ലറും ചേർന്നാണ് 75 റൺസിലെങ്കിലും എത്തിച്ചത്. ബെംഗളൂരുവിനായി ജോഷ് ഹേസൽവുഡ് നാല് വിക്കറ്റും ഭുവനേശ്വർ കുമാർ മൂന്ന് വിക്കറ്റും വീഴ്ത്തി ഡൽഹി ബാറ്റിങ് നിരയെ നിഷ്പ്രഭമാക്കി. മൂന്ന് ഓവറിൽ വെറും അഞ്ച് റൺസ് മാത്രം വഴങ്ങിയാണ് ഭുവനേശ്വർ മൂന്ന് വിക്കറ്റുകൾ എറിഞ്ഞിട്ടത്.
മറുപടി ബാറ്റിങ്ങിനിറങ്ങിയ ബെംഗളൂരുവിന്റേത് മികച്ച തുടക്കമായിരുന്നു. വിരാട് കോലിയും ജേക്കബ് ബെത്തലുമാണ് ഇന്നിങ്സ് ഓപ്പൺ ചെയ്തത്. രണ്ടോവറിൽ 13 റൺസാണ് ടീമെടുത്തത്. എന്നാൽ മൂന്നാം ഓവറിൽ കൈൽ ജാമിസണെ ബെത്തൽ രണ്ട് തവണ അതിർത്തികടത്തി. അഞ്ചാം പന്തിൽ താരം പുറത്തായി. 11 പന്തിൽ 20 റൺസാണ് ബെത്തലിന്റെ സമ്പാദ്യം. വൺഡൗണായി ഇറങ്ങിയ ദേവ്ദത്ത് പടിക്കലും അടിച്ചുകളിച്ചതോടെ ടീം അതിവേഗം ലക്ഷ്യത്തോടടുത്തു.
നാലാം ഓവറിൽ 12 റൺസാണ് പിറന്നത്. അഞ്ചാം ഓവറിലും കത്തിക്കയറിയ പടിക്കൽ ടീമിനെ അമ്പത് കടത്തി. രണ്ട് വീതം സിക്സറും ഫോറുമടക്കം 21 റൺസാണ് ഓവറിൽ ആർസിബി അടിച്ചെടുത്തത്. പവർപ്ലേ അവസാനിക്കുമ്പോൾ ഒരു വിക്കറ്റ് നഷ്ടത്തിൽ 65 റൺസെന്ന നിലയിലായിരുന്നു ബെംഗളൂരു. ഏഴാം ഓവറിൽ രണ്ട് സിക്സറടിച്ച് കോലി ടീമിന് ജയം സമ്മാനിച്ചു. കോലി 15 പന്തിൽ നിന്ന് 23 റൺസും പടിക്കൽ 13 പന്തിൽ നിന്ന് 34 റൺസുമെടുത്തു. ജയത്തോടെ ആത്മവിശ്വാസം വർധിപ്പിച്ച ബെംഗളൂരു പോയിന്റ് പട്ടികയിലും നില മെച്ചപ്പെടുത്തി.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Delhi Capitals lost 6 wickets for only 8 runs in a disastrous powerplay start
