മോണ്ട്പെലിയർ: അതിർത്തിക്കപ്പുറത്തെ പഴയ വേരുകൾ തേടിപ്പോകുന്ന വെർമോണ്ട് നിവാസികൾക്ക് ശുഭവാർത്ത. കാനഡയുടെ പൗരത്വ നിയമത്തിൽ വന്ന പുതിയ ഭേദഗതിയോടെ, അമേരിക്കൻ സംസ്ഥാനമായ വെർമോണ്ടിലെ ജനസംഖ്യയുടെ ഏകദേശം 30 ശതമാനത്തോളം പേർക്ക് കനേഡിയൻ പൗരത്വത്തിന് അർഹത ലഭിച്ചു. വംശാവലി അടിസ്ഥാനമാക്കി പൗരത്വം നൽകുന്നതിലുണ്ടായിരുന്ന ‘ഒന്നാം തലമുറ പരിധി’ (First-generation limit) കാനഡ എടുത്തുമാറ്റിയതാണ് ഈ വലിയ മാറ്റത്തിന് വഴിയൊരുക്കിയത്.
2025 ഡിസംബർ 15-നാണ് കാനഡ പൗരത്വ നിയമത്തിൽ നിർണ്ണായകമായ ഭേദഗതി വരുത്തിയത്. ഇതനുസരിച്ച്, ഡിസംബർ 15-ന് മുൻപ് ജനിച്ച ആർക്കും തങ്ങളുടെ പൂർവ്വികർ കനേഡിയൻ പൗരന്മാരായിരുന്നു എന്ന് തെളിയിക്കാൻ സാധിച്ചാൽ പൗരത്വത്തിന് അപേക്ഷിക്കാം. മുൻപ് ഇത് ഒരു തലമുറയ്ക്ക് മാത്രമായി പരിമിതപ്പെടുത്തിയിരുന്നു. വെർമോണ്ടിലെ ജനങ്ങളിൽ വലിയൊരു വിഭാഗം 1840-നും 1930-നും ഇടയിൽ ക്യൂബെക്കിൽ നിന്നും കുടിയേറിയ ഫ്രഞ്ച്-കനേഡിയൻ വംശജരുടെ പിൻഗാമികളാണ്. ഈ ചരിത്രപരമായ ബന്ധമാണ് ലക്ഷക്കണക്കിന് ആളുകൾക്ക് ഇപ്പോൾ തുണയാകുന്നത്.
അമേരിക്കയും കാനഡയും ഇരട്ട പൗരത്വം അനുവദിക്കുന്ന രാജ്യങ്ങളാണ്. അതിനാൽ പൗരത്വം നേടിയെടുക്കുന്നത് വഴി വെർമോണ്ട് നിവാസികൾക്ക് തങ്ങളുടെ അമേരിക്കൻ പൗരത്വം നഷ്ടപ്പെടാതെ തന്നെ കാനഡയിലെ അവകാശങ്ങളും ആസ്വദിക്കാൻ സാധിക്കും. കാനഡയിൽ ജീവിക്കാനും ജോലി ചെയ്യാനും വോട്ട് ചെയ്യാനും തിരഞ്ഞെടുപ്പിൽ മത്സരിക്കാനും ഇവർക്ക് അവകാശമുണ്ടാകും. ലോകത്തിലെ ഏറ്റവും ശക്തമായ പാസ്പോർട്ടുകളിൽ ഒന്നായ കനേഡിയൻ പാസ്പോർട്ട് സ്വന്തമാക്കാം എന്നതും വലിയ ആകർഷണമാണ്. കൂടാതെ, കാനഡയിൽ കുറഞ്ഞത് മൂന്ന് വർഷം താമസിച്ചവർക്ക് തങ്ങളുടെ വിദേശത്ത് ജനിക്കുന്ന കുട്ടികൾക്കും പൗരത്വം കൈമാറാൻ സാധിക്കും.
നിയമം നിലവിൽ വന്നതോടെ പൂർവ്വികരുടെ രേഖകൾ തേടിയുള്ള നെട്ടോട്ടത്തിലാണ് പലരും. ക്യൂബെക്കിലെ നാഷണൽ ആർക്കൈവ്സിൽ (BAnQ) രേഖകൾക്കായി എത്തുന്നവരുടെ എണ്ണത്തിൽ 3000 ശതമാനം വർദ്ധനവാണ് രേഖപ്പെടുത്തിയിരിക്കുന്നത്. പെല്ലെറ്റിയർ (Pelletier), ലാഫ്ലാം (LaFlamme), മാർട്ടൽ (Martel), ഒല്ലെറ്റ് (Ouellette), ലെക്ലെയർ (LeClair) തുടങ്ങിയ കുടുംബപ്പേരുകളുള്ളവർക്കും കുടുംബത്തിൽ ഫ്രഞ്ച് സംസാരിക്കുന്ന പാരമ്പര്യമുള്ളവർക്കും പൗരത്വത്തിന് അർഹതയുണ്ടാകാൻ സാധ്യത കൂടുതലാണ്. ജനന സർട്ടിഫിക്കറ്റ്, മാമോദീസ രേഖകൾ, വിവാഹ സർട്ടിഫിക്കറ്റുകൾ തുടങ്ങിയവയാണ് പൂർവ്വികരുമായുള്ള ബന്ധം തെളിയിക്കാൻ ഹാജരാക്കേണ്ടത്.
യോഗ്യരായ വ്യക്തികൾക്ക് നേരിട്ടോ കനേഡിയൻ ഗവൺമെന്റ് അംഗീകരിച്ച ഇമിഗ്രേഷൻ അഭിഭാഷകർ വഴിയോ ‘പ്രൂഫ് ഓഫ് സിറ്റിസൺഷിപ്പ്’ (Proof of Canadian Citizenship) സർട്ടിഫിക്കറ്റിനായി അപേക്ഷിക്കാം. നിലവിൽ അപേക്ഷകൾ പരിഗണിക്കാൻ ഏകദേശം 10 മാസത്തെ സമയമാണ് എടുക്കുന്നത്. ഈ സർട്ടിഫിക്കറ്റ് ലഭിച്ചു കഴിഞ്ഞാൽ പാസ്പോർട്ടിനായി അപേക്ഷിക്കാം. വെർമോണ്ടിലെ പലരും കാനഡയിലേക്ക് താമസം മാറാൻ ഉദ്ദേശിക്കുന്നില്ലെങ്കിലും, ഭാവിയിലേക്കുള്ള സുരക്ഷിതമായ ഒരു കരുതൽ (Back-up option) എന്ന നിലയിലാണ് ഈ അവസരത്തെ കാണുന്നത്. അമേരിക്കൻ പൗരന്മാർക്ക് അധിക നികുതി ബാധ്യതകൾ ഇല്ലാതെ തന്നെ കനേഡിയൻ പൗരത്വം നേടിയെടുക്കാം എന്നത് ഇതിന്റെ പ്രധാന സവിശേഷതയാണ്.
One-third of Vermont residents now have Canadian citizenship; Canada makes historic change in law
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
