മലമുകളിൽ പങ്കാളിയെ തനിച്ചാക്കി കടന്നുകളയും; വില്ലനായി ‘ആൽപൈൻ ഡിവോഴ്സ്’, നടുക്കുന്ന വെളിപ്പെടുത്തലുമായി സ്ത്രീകൾ

വിയന്ന: സാഹസിക യാത്രകൾക്കിടയിലും മലകയറ്റത്തിനിടയിലും പങ്കാളിയെ അപകടകരമായ സാഹചര്യത്തിൽ ഒറ്റപ്പെടുത്തി കടന്നുകളയുന്ന ‘ആൽപൈൻ ഡിവോഴ്സ്’ (Alpine Divorce) എന്ന പുതിയ പ്രവണത ആഗോളതലത്തിൽ ചർച്ചയാകുന്നു. ടിക് ടോക്ക്, ഇൻസ്റ്റാഗ്രാം തുടങ്ങിയ സോഷ്യൽ മീഡിയ പ്ലാറ്റ്‌ഫോമുകളിലൂടെ നിരവധി സ്ത്രീകളാണ് തങ്ങൾക്കുണ്ടായ ഞെട്ടിപ്പിക്കുന്ന അനുഭവങ്ങൾ വെളിപ്പെടുത്തി രംഗത്തെത്തിയത്. വൈകാരികമായ വിയോജിപ്പുകൾ മുതൽ മരണത്തിന് വരെ കാരണമായേക്കാവുന്ന ക്രിമിനൽ കുറ്റകൃത്യങ്ങൾ വരെ ഈ പട്ടികയിൽ ഉൾപ്പെടുന്നു.

ഈ വർഷം ആദ്യം ഓസ്ട്രിയയിലെ ഏറ്റവും ഉയർന്ന കൊടുമുടിയായ ഗ്രോസ്‌ഗ്ലോക്‌നറിൽ (Grossglockner) ഉണ്ടായ ദാരുണമായ ഒരു മരണമാണ് ഈ ചർച്ചകൾക്ക് വീണ്ടും തിരികൊളുത്തിയത്. തോമസ് പി. എന്ന മലകയറ്റക്കാരൻ തന്റെ കാമുകിയെ അതിശൈത്യമുള്ള മലനിരകളിൽ ഉപേക്ഷിച്ചുപോവുകയായിരുന്നു. സഹായം തേടി പോകുന്നു എന്നായിരുന്നു ഇയാളുടെ വാദമെങ്കിലും, രക്ഷാപ്രവർത്തകരുടെ കോളുകൾക്ക് മറുപടി നൽകാനോ കൃത്യസമയത്ത് വിവരം കൈമാറാനോ ഇയാൾ തയ്യാറായില്ല. ഒടുവിൽ അതിശൈത്യത്തെത്തുടർന്ന് യുവതി മരണത്തിന് കീഴടങ്ങി. തുടർന്ന് നടന്ന വിചാരണയിൽ ഇയാൾ കുറ്റക്കാരനാണെന്ന് കണ്ടെത്തുകയും കോടതി ശിക്ഷ വിധിക്കുകയും ചെയ്തു.

എന്താണ് ‘ആൽപൈൻ ഡിവോഴ്സ്’?

മലകയറ്റം പോലുള്ള കായിക വിനോദങ്ങളിൽ ഏർപ്പെടുമ്പോൾ അനുഭവപരിചയം കുറഞ്ഞ പങ്കാളിയെ (പ്രധാനമായും സ്ത്രീകളെ), അനുഭവപരിചയമുള്ള പുരുഷൻ അപകടകരമായ അവസ്ഥയിൽ ഒറ്റപ്പെടുത്തുന്നതിനെയാണ് ഈ പദം കൊണ്ട് അർത്ഥമാക്കുന്നത്. 1893-ൽ ഒരു ചെറുകഥയിലാണ് ഈ പദം ആദ്യമായി ഉപയോഗിക്കപ്പെട്ടതെങ്കിലും ഇന്ന് സോഷ്യൽ മീഡിയയിൽ ഇതൊരു ഹാഷ്‌ടാഗ് ക്യാമ്പയിനായി മാറിയിരിക്കുകയാണ്. ബന്ധങ്ങളിൽ അപ്രമാദിത്വം സ്ഥാപിക്കാനോ അല്ലെങ്കിൽ പങ്കാളിയോടുള്ള ദേഷ്യം തീർക്കാനോ ആണ് ഇത്തരം ക്രൂരതകൾ പ്രവർത്തിക്കുന്നത്.

“അവനോടൊപ്പം മലകയറാൻ പോയതായിരുന്നു ഞാൻ, പക്ഷേ എന്നെ അവിടെ ഒറ്റയ്ക്കാക്കി അവൻ പോയി. അവന് എന്നോട് സ്നേഹമേ ഉണ്ടായിരുന്നില്ല എന്ന് അപ്പോഴാണ് എനിക്ക് മനസ്സിലായത്,” എന്ന അടിക്കുറിപ്പോടെ ടിക് ടോക്കിൽ പങ്കുവെക്കപ്പെട്ട ഒരു വീഡിയോ ഇതിനോടകം അഞ്ച് ദശലക്ഷത്തോളം പേരാണ് കണ്ടത്.

മനഃശാസ്ത്രപരമായ വിശകലനം

പങ്കാളിയെ മലമുകളിൽ ഉപേക്ഷിക്കുന്ന പ്രവണതയ്ക്ക് പിന്നിൽ വ്യക്തമായ മനഃശാസ്ത്രപരമായ കാരണങ്ങളുണ്ടെന്ന് വിദഗ്ധർ ചൂണ്ടിക്കാട്ടുന്നു. മാനസിക സമ്മർദ്ദമുണ്ടാകുമ്പോൾ പ്രശ്നങ്ങളെ അഭിമുഖീകരിക്കുന്നതിന് പകരം അവിടെ നിന്നും ഒളിച്ചോടാൻ ശ്രമിക്കുന്ന ‘അവോയിഡന്റ് അറ്റാച്ച്മെന്റ് സ്റ്റൈൽ’ (Avoidant Attachment Style) ഉള്ളവരിലാണ് ഇത്തരം സ്വഭാവം കൂടുതലായി കാണുന്നത്. ഇത്തരക്കാർക്ക് സഹാനുഭൂതി കുറവാണെന്നും ബന്ധങ്ങളിൽ ആധിപത്യം സ്ഥാപിക്കാൻ ഇവർ ശ്രമിക്കുമെന്നും റിലേഷൻഷിപ്പ് കോച്ച് ആയ ജോ ഹെമ്മിംഗ്സ് പറയുന്നു.

സ്വയം രക്ഷാമാർഗങ്ങൾ പ്രധാനം

ലോറി സിംഗർ എന്ന യാത്രികയുടെ അനുഭവം ഈ വിഷയത്തിൽ വലിയൊരു പാഠമാണ്. തന്റെ ഉറ്റ സുഹൃത്തിനൊപ്പം യാത്ര ചെയ്യവെ അസുഖ ബാധിതയായ ലോറിയെ വെറും ഒരു എനർജി ബാർ മാത്രം നൽകി മലമുകളിൽ ഉപേക്ഷിച്ച് അയാൾ നടന്നുപോയി. തലച്ചോറിലെ നീർക്കെട്ടും ശാരീരിക അവശതകളുമായി മരണത്തെ മുഖാമുഖം കണ്ട ലോറി മറ്റ് യാത്രികരുടെ സഹായത്തോടെയാണ് ജീവിതത്തിലേക്ക് തിരിച്ചുവന്നത്. “പങ്കാളി എത്ര പരിചിതനാണെങ്കിലും സാഹസിക യാത്രകളിൽ സ്വന്തം സുരക്ഷയിൽ സ്വയം പര്യപ്തത നേടേണ്ടത് അനിവാര്യമാണെന്നാണ് ലോറി ഓർമ്മിപ്പിക്കുന്നത്.

ട്രെക്കിംഗിനും മറ്റും പോകുന്നവർ റൂട്ട് മാപ്പുകൾ സ്വന്തമായി കയ്യിൽ കരുതണമെന്നും, യാത്രാ വേഗതയെക്കുറിച്ച് മുൻകൂട്ടി ധാരണയിലെത്തണമെന്നും വിദഗ്ധർ നിർദ്ദേശിക്കുന്നു. പങ്കാളിയുടെ ഭാഗത്തുനിന്ന് എന്തെങ്കിലും തരത്തിലുള്ള വൈകാരിക വിമുഖതയോ അനാവശ്യ ദേഷ്യമോ ശ്രദ്ധയിൽപ്പെട്ടാൽ ഇത്തരം റിസ്കുള്ള യാത്രകൾ ഒഴിവാക്കുന്നതാണ് ഉചിതമെന്നും ഇവർ ചൂണ്ടിക്കാട്ടുന്നു.

Leaving your partner alone on a mountaintop; 'Alpine Divorce' as the villain, women make shocking revelations

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt