പ്യോങ്യാങ്: ഉത്തര കൊറിയ വികസിപ്പിച്ചെടുത്ത സ്വന്തം ഒപ്പറേറ്റിംഗ് സിസ്റ്റമായ ‘റെഡ് സ്റ്റാർ’ (Red Star OS) സംബന്ധിച്ച ഞെട്ടിക്കുന്ന വിവരങ്ങൾ പുറത്ത്. നമ്മൾ സാധാരണ ഉപയോഗിക്കുന്ന വിൻഡോസിനും ആപ്പിളിനും പകരമായി ഉത്തര കൊറിയൻ സർക്കാർ നിർമ്മിച്ച ഈ സോഫ്റ്റ്വെയർ, ഉപയോക്താക്കളെ നിരന്തരം നിരീക്ഷിക്കാനുള്ള സജ്ജീകരണങ്ങളോടെയാണ് പ്രവർത്തിക്കുന്നത്. ഈ ഓഎസ് പരീക്ഷണാത്മകമായും അറിയാതെയും ഇൻസ്റ്റാള് ചെയ്തവർ പങ്കിട്ട ചില ദുരനുഭവങ്ങളാണ് ഇപ്പോൾ പുറത്തുവന്നിരിക്കുന്നത്.
ലിനക്സ് പ്ലാറ്റ്ഫോമിനെ അടിസ്ഥാനമാക്കി നിർമ്മിച്ച റെഡ് സ്റ്റാർ ഒഎസ് കാഴ്ചയിൽ ആപ്പിളിന്റെ മാക് ഒഎസിനോട് സാമ്യമുള്ളതാണ്. എന്നാൽ ഇതിലെ ‘അംഗേ’ (Angae) എന്ന ആന്റിവൈറസ് പ്രോഗ്രാം ഉൾപ്പെടെയുള്ളവ ഉപയോക്താക്കളുടെ ഓരോ നീക്കവും നിരീക്ഷിക്കുന്നു. കമ്പ്യൂട്ടറിൽ ഘടിപ്പിക്കുന്ന പെൻഡ്രൈവുകളിലെ ഫയലുകളിൽ പോലും ‘ഡിജിറ്റൽ വാട്ടർമാർക്കിംഗ്’ പതിപ്പിക്കാൻ ഈ സിസ്റ്റത്തിന് സാധിക്കും. പിന്നീട് ആ ഫയൽ ആരെല്ലാം കണ്ടു എന്നോ എവിടെയെല്ലാം കൈമാറി എന്നോ സർക്കാരിന് എളുപ്പത്തിൽ കണ്ടുപിടിക്കാൻ സാധിക്കും. കൂടാതെ, സർക്കാരിന് ഇഷ്ടപ്പെടാത്ത എന്തെങ്കിലും ഫയലുകൾ കമ്പ്യൂട്ടറിൽ ഉണ്ടെങ്കിൽ അവ ഉടമസ്ഥൻ അറിയാതെ തന്നെ താനേ ഡിലീറ്റ് ചെയ്യാനും ഈ സോഫ്റ്റ്വെയറിന് പ്രത്യേക അധികാരമുണ്ട്.
ഈ സുരക്ഷാ വലയത്തിൽ നിന്ന് പുറത്തുകടക്കാൻ ആർക്കും കഴിയില്ല എന്നതാണ് മറ്റൊരു വസ്തുത. കമ്പ്യൂട്ടറിലെ സെക്യൂരിറ്റി സംവിധാനങ്ങൾ ഓഫ് ചെയ്യാൻ ശ്രമിച്ചാൽ കമ്പ്യൂട്ടർ ഉടൻ തന്നെ ഓഫായി വീണ്ടും ഓണാകും. അതുപോലെ തന്നെ, പുറംലോകത്തെ ഇന്റർനെറ്റ് ഉപയോഗിക്കാൻ ഈ കമ്പ്യൂട്ടറുകൾ അനുവദിക്കില്ല. പകരം സർക്കാർ അനുവദിച്ച് നൽകിയിട്ടുള്ള സൈറ്റുകൾ മാത്രമേ ഇതിൽ ലഭിക്കൂ. ഇത്തരം ചാരപ്പണികൾ ഉള്ളതിനാൽ സാധാരണക്കാർ ഈ സോഫ്റ്റ്വെയർ പരീക്ഷിക്കുന്നത് പോലും അപകടമാണെന്ന് വിദഗ്ധർ മുന്നറിയിപ്പ് നൽകുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Unknowingly installed 'Red Star OS'; then the North Korean government's blunder happened
