വിന്നിപെഗ്: കാനഡയിലെ ചർച്ചിൽ തുറമുഖത്തിന്റെ വിപുലീകരണവുമായി ബന്ധപ്പെട്ട് മാനിറ്റോബ പ്രവിശ്യയ്ക്ക് കർശന നിർദ്ദേശവുമായി ഫെഡറൽ സർക്കാർ. 2030-ഓടെ ചർച്ചിൽ തുറമുഖം വഴി ദ്രവീകൃത പ്രകൃതിവാതകം (LNG) കയറ്റുമതി ചെയ്യണമെന്നും അല്ലാത്തപക്ഷം പദ്ധതിക്കുള്ള ഫെഡറൽ സഹായം പിൻവലിക്കുമെന്ന സൂചനയുമാണ് പ്രധാനമന്ത്രി മാർക്ക് കാർണി നൽകിയിരിക്കുന്നത്. മാനിറ്റോബ പ്രീമിയർ വാബ് കിന്യൂ ഒട്ടാവയിൽ വെച്ച് പ്രധാനമന്ത്രിയുമായി നടത്തിയ കൂടിക്കാഴ്ചയിലാണ് ഈ നിർണ്ണായക നീക്കം.
വടക്കൻ മാനിറ്റോബ വഴി ഒരു വ്യാപാര ഇടനാഴി വികസിപ്പിക്കുക എന്ന ലക്ഷ്യത്തോടെയാണ് ചർച്ചിൽ തുറമുഖ വിപുലീകരണം വിഭാവനം ചെയ്യുന്നത്. അടുത്ത നാല് വർഷത്തിനുള്ളിൽ എൽ.എൻ.ജി കയറ്റുമതി ആരംഭിക്കണമെന്ന ‘അഗ്രസീവ്’ ടൈംലൈൻ ആണ് പ്രധാനമന്ത്രി മുന്നോട്ടുവെച്ചിരിക്കുന്നതെന്ന് വാബ് കിന്യൂ മാധ്യമങ്ങളോട് പറഞ്ഞു. പടിഞ്ഞാറൻ കാനഡയിൽ നിന്ന് ഊർജ്ജ സ്രോതസ്സുകൾ എത്തിക്കുന്നതിനായി പുതിയ പൈപ്പ്ലൈൻ നിർമ്മാണം ഉൾപ്പെടെയുള്ള ബൃഹദ് പദ്ധതികൾ ഇതിന്റെ ഭാഗമായി പരിഗണനയിലുണ്ട്.
2030-ഓടെ പ്രതിവർഷം 50 ദശലക്ഷം ടൺ എൽ.എൻ.ജി ഉൽപ്പാദനം എന്ന ലക്ഷ്യത്തിലേക്കാണ് കാനഡ നീങ്ങുന്നത്. ഇതിനായി വിവിധ പ്രവിശ്യകളുമായും തദ്ദേശീയ പങ്കാളികളുമായും കേന്ദ്ര സർക്കാർ ചർച്ചകൾ നടത്തിവരികയാണ്. കഴിഞ്ഞ വർഷം കേന്ദ്രം തിരഞ്ഞെടുത്ത ‘പരിവർത്തന സ്വഭാവമുള്ള’ (Transformative) പ്രധാന പദ്ധതികളുടെ പട്ടികയിൽ ചർച്ചിൽ തുറമുഖ വിപുലീകരണം ഇടംപിടിച്ചിരുന്നു. എങ്കിലും, റെയിൽവേ പാതകൾ, പോർട്ട് ഇൻഫ്രാസ്ട്രക്ചർ എന്നിവയിൽ വലിയ തോതിലുള്ള നവീകരണം നടത്തിയാൽ മാത്രമേ ഈ ലക്ഷ്യം കൈവരിക്കാനാകൂ.
പദ്ധതിയുമായി മുന്നോട്ട് പോകാൻ നിശ്ചിത സമയപരിധി പാലിക്കണമെന്ന അന്ത്യശാസനമായാണ് പ്രധാനമന്ത്രിയുടെ വാക്കുകളെ താൻ കാണുന്നതെന്ന് വാബ് കിന്യൂ വ്യക്തമാക്കി. “വലിയ പദ്ധതികൾ വേഗത്തിൽ നടപ്പിലാക്കാനാണ് കേന്ദ്ര സർക്കാർ ആഗ്രഹിക്കുന്നത്. നിശ്ചിത സമയത്തിനുള്ളിൽ ഇത് പൂർത്തിയായില്ലെങ്കിൽ മാനിറ്റോബയ്ക്കും പടിഞ്ഞാറൻ കാനഡയുടെ സമ്പദ്വ്യവസ്ഥയ്ക്കും ലഭിക്കേണ്ട വലിയൊരു അവസരം നഷ്ടമാകും,” അദ്ദേഹം കൂട്ടിച്ചേർത്തു.
നിലവിൽ ഹഡ്സൺ ഉൾക്കടൽ തീരത്തെ ഈ ചെറിയ തുറമുഖം വഴി ആർട്ടിക് സമുദ്രത്തിലൂടെ യൂറോപ്പിലേക്ക് എളുപ്പത്തിൽ ചരക്കുനീക്കം നടത്താൻ സാധിക്കുമെന്നത് പദ്ധതിയുടെ പ്രാധാന്യം വർധിപ്പിക്കുന്നു. അമേരിക്കയുമായുള്ള വ്യാപാര തർക്കങ്ങൾ നിലനിൽക്കുന്ന പശ്ചാത്തലത്തിൽ, പടിഞ്ഞാറൻ കാനഡയിൽ നിന്നുള്ള ഊർജ്ജ കയറ്റുമതിക്ക് പുതിയ വഴികൾ കണ്ടെത്തേണ്ടത് രാജ്യത്തിന്റെ ആവശ്യമാണ്.
കപ്പൽ ഗതാഗതത്തിന് തടസ്സമാകുന്ന മഞ്ഞുപാളികൾ നീക്കം ചെയ്ത് സീസൺ ദൈർഘ്യം വർദ്ധിപ്പിക്കുന്നതിനെക്കുറിച്ചുള്ള പഠനങ്ങളും സ്വകാര്യ മേഖലയുടെ താൽപ്പര്യവും ഇപ്പോൾ സജീവമായി പരിശോധിച്ചുവരികയാണ്. അതേസമയം, സമയപരിധിയെക്കുറിച്ചുള്ള ഔദ്യോഗിക പ്രതികരണത്തിന് പ്രധാനമന്ത്രിയുടെ ഓഫീസ് തയ്യാറായിട്ടില്ല. കേന്ദ്ര ഊർജ്ജ മന്ത്രി ടിം ഹോഡ്സൺ പ്രവിശ്യാ സർക്കാരുമായി ചേർന്ന് പദ്ധതിയുടെ എല്ലാ വശങ്ങളും പരിശോധിച്ചു വരികയാണെന്ന് അദ്ദേഹത്തിന്റെ ഓഫീസ് അറിയിച്ചു.
Federal government issues strict directive to Manitoba to export LNG via Churchill by 2030
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
