കോയമ്പത്തൂർ: തമിഴ് സൂപ്പർതാരം വിജയിയുടെ പുതിയ ചിത്രമായ ‘ജനനായകൻ’ അനധികൃതമായി സംപ്രേഷണം ചെയ്ത സംഭവത്തിൽ തമിഴ്നാട് പോലീസ് ചാനൽ ഉടമയെ അറസ്റ്റ് ചെയ്തു. കോയമ്പത്തൂരിലെ രാശി പ്രൈം മൂവി ചാനൽ ഉടമയും കരുമത്തംപെട്ടി സ്വദേശിയുമായ എസ്. പളനിസ്വാമിയെയാണ് (44) പോലീസ് അറസ്റ്റ് ചെയ്തത്. വിജയിയുടെ രാഷ്ട്രീയ പാർട്ടിയായ തമിഴക വെട്രി കഴകം (ടിവികെ) നൽകിയ ഔദ്യോഗിക പരാതിയെത്തുടർന്നാണ് പോലീസിന്റെ ഈ അടിയന്തര നടപടി.
സെൻസർ ബോർഡിന്റെ അനുമതി കാത്തിരിക്കുന്നതും ഇതുവരെ റിലീസ് ചെയ്തിട്ടില്ലാത്തതുമായ ചിത്രം ഏപ്രിൽ 11-നാണ് പളനിസ്വാമിയുടെ ഉടമസ്ഥതയിലുള്ള ചാനലിലൂടെ സംപ്രേഷണം ചെയ്തത്. ടിവികെ കോയമ്പത്തൂർ ഈസ്റ്റ് യൂണിറ്റ് ഡെപ്യൂട്ടി സെക്രട്ടറി മോഹനപ്രിയ നൽകിയ പരാതിയുടെ അടിസ്ഥാനത്തിൽ ജില്ലാ പോലീസ് മേധാവി കെ. കാർത്തികേയൻ രണ്ട് പ്രത്യേക സംഘങ്ങളെ അന്വേഷണത്തിനായി നിയോഗിച്ചിരുന്നു. സിനിമയുടെ പകർപ്പ് നിയമവിരുദ്ധമായി കൈക്കലാക്കി പ്രദർശിപ്പിച്ചു എന്ന് പോലീസ് സ്ഥിരീകരിച്ചു. പ്രതിയുടെ ഓഫീസിൽ നിന്ന് കമ്പ്യൂട്ടറും അഞ്ച് ഹാർഡ് ഡിസ്കുകളും പിടിച്ചെടുക്കുകയും ഓഫീസ് സീൽ ചെയ്യുകയും ചെയ്തിട്ടുണ്ട്.
ചിത്രത്തിന്റെ എച്ച്ഡി പ്രിന്റ് നേരത്തെ ഓൺലൈനിൽ ചോർന്നത് സിനിമാ മേഖലയിൽ വലിയ ആശങ്കയുണ്ടാക്കിയിരുന്നു. ഏപ്രിൽ 9-ന് സിനിമയുടെ ചില രംഗങ്ങൾ പ്രചരിച്ചതിന് പിന്നാലെയാണ് മുഴുവൻ ദൃശ്യങ്ങളും ഇന്റർനെറ്റിലെത്തിയത്. സംഭവവുമായി ബന്ധപ്പെട്ട് സൈബർ ക്രൈം വിഭാഗം ആറ് പേരെ കൂടി അറസ്റ്റ് ചെയ്തിട്ടുണ്ട്. എച്ച്. വിനോദ് സംവിധാനം ചെയ്യുന്ന ‘ജനനായകൻ’ വിജയിയുടെ അഭിനയ ജീവിതത്തിലെ അവസാന ചിത്രമായതിനാൽ വലിയ പ്രതീക്ഷയോടെയാണ് ആരാധകർ സിനിമയെ കാത്തിരിക്കുന്നത്. പകർപ്പവകാശ ലംഘനം നടത്തുന്നവർക്കെതിരെ വരും ദിവസങ്ങളിലും കർശന നടപടി തുടരുമെന്ന് പോലീസ് അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Vijay's 'Jananayakan' aired before release; Channel owner arrested
