ന്യൂഡൽഹി: പ്രധാനമന്ത്രി നരേന്ദ്ര മോദിയും അമേരിക്കൻ പ്രസിഡന്റ് ഡോണാൾഡ് ട്രംപും തമ്മിൽ 40 മിനിറ്റ് നീണ്ട ഫോൺ സംഭാഷണം നടത്തി. പശ്ചിമേഷ്യയിലെ നിലവിലെ സാഹചര്യങ്ങളും യുഎസ്-ഇറാൻ വെടിനിർത്തലിന് ശേഷമുള്ള മാറ്റങ്ങളുമാണ് പ്രധാനമായും ചർച്ചയായത്. വെടിനിർത്തൽ പ്രഖ്യാപിച്ചതിന് ശേഷം ഇരുനേതാക്കളും തമ്മിൽ നടത്തുന്ന ആദ്യ സംഭാഷണമാണിതെന്ന് പ്രധാനമന്ത്രി എക്സിലൂടെ (X) അറിയിച്ചു. പശ്ചിമേഷ്യയിൽ സമാധാനം പുനഃസ്ഥാപിക്കേണ്ടതിന്റെ ആവശ്യകത ചർച്ചയിൽ ഇരുവരും ഊന്നിപ്പറഞ്ഞു.
ആഗോള ഊർജ്ജ വിപണിയെ സ്വാധീനിക്കുന്ന ഹോർമുസ് കടലിടുക്കിലെ സുരക്ഷയെക്കുറിച്ച് പ്രധാനമന്ത്രി മോദി ആശങ്ക അറിയിച്ചു. ഹോർമുസ് കടലിടുക്ക് വഴിയുള്ള ചരക്കുനീക്കം സുരക്ഷിതമായും തടസ്സമില്ലാതെയും നിലനിർത്തേണ്ടത് ഇന്ത്യയുടെ കൂടി ആവശ്യമാണെന്ന് അദ്ദേഹം വ്യക്തമാക്കി. പശ്ചിമേഷ്യയിലെ സംഘർഷങ്ങൾ ലഘൂകരിക്കാനും മേഖലയിൽ സ്ഥിരത ഉറപ്പാക്കാനുമുള്ള എല്ലാ സമാധാന ശ്രമങ്ങൾക്കും ഇന്ത്യയുടെ പൂർണ്ണ പിന്തുണ മോദി വാഗ്ദാനം ചെയ്തു.
ഇന്ത്യയും അമേരിക്കയും തമ്മിലുള്ള സമഗ്ര ആഗോള തന്ത്രപരമായ പങ്കാളിത്തം കൂടുതൽ ശക്തിപ്പെടുത്താൻ നേതാക്കൾ പ്രതിജ്ഞാബദ്ധത പുതുക്കി. വിവിധ മേഖലകളിൽ ഇരുരാജ്യങ്ങളും കൈവരിച്ച പുരോഗതി ചർച്ചയിൽ വിലയിരുത്തി. സമാധാനവും സ്ഥിരതയും നിലനിർത്താൻ സംയുക്തമായി പ്രവർത്തിക്കാൻ ധാരണയായതായും പ്രധാനമന്ത്രി കുറിച്ചു. അമേരിക്കൻ പ്രസിഡന്റിനെ ‘മൈ ഫ്രണ്ട്’ എന്ന് അഭിസംബോധന ചെയ്തുകൊണ്ടാണ് മോദി ചർച്ചയുടെ വിശദാംശങ്ങൾ പങ്കുവെച്ചത്.
This is power! Trump’s first call after ceasefire reached Modi; Hormuz crisis discussed
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
