ഒന്റാറിയോ: ഒന്റാറിയോയിലെ സ്കൂൾ ബോർഡുകളുടെ ഘടനയിലും പ്രവർത്തനത്തിലും മാറ്റം വരുത്തുന്ന പുതിയ ബില്ല് ഏപ്രിൽ 13 തിങ്കളാഴ്ച അവതരിപ്പിക്കുമെന്ന് വിദ്യാഭ്യാസ മന്ത്രി പോൾ കലന്ദ്ര അറിയിച്ചു. കഴിഞ്ഞ 50 വർഷമായി ഉത്തരവാദിത്തങ്ങൾ സ്കൂൾ ബോർഡുകൾക്ക് കൈമാറുന്ന രീതിയാണ് മന്ത്രാലയം പിന്തുടരുന്നതെന്നും, മന്ത്രാലയത്തിന്റെ നേതൃത്വവും ഉത്തരവാദിത്തവും തിരികെ കൊണ്ടുവരാനാണ് പുതിയ നീക്കമെന്നും അദ്ദേഹം വ്യക്തമാക്കി.
ഒട്ടാവ കാൾട്ടൺ ഡിസ്ട്രിക്റ്റ് സ്കൂൾ ബോർഡ് (OCDSB) ഉൾപ്പെടെയുള്ള ബോർഡുകളിലെ ട്രസ്റ്റിമാരുടെ അധികാരം പുനഃസ്ഥാപിക്കപ്പെടുമോ എന്ന കാര്യത്തിൽ പുതിയ നിയമത്തോടെ വ്യക്തത വരുമെന്നാണ് വിലയിരുത്തൽ. സാമ്പത്തിക ക്രമക്കേടുകൾ ചൂണ്ടിക്കാട്ടി കഴിഞ്ഞ ജൂണിൽ ഒസിഡിഎസ്ബി ട്രസ്റ്റിമാരെ സസ്പെൻഡ് ചെയ്യുകയും പകരം സൂപ്പർവൈസറെ നിയമിക്കുകയും ചെയ്തിരുന്നു.
തിരഞ്ഞെടുക്കപ്പെട്ട ട്രസ്റ്റിമാരുടെ പങ്ക് ജനാധിപത്യപരമായി സുപ്രധാനമാണെന്ന് ഒസിഡിഎസ്ബി ട്രസ്റ്റി ലൈറ ഇവാൻസ് അഭിപ്രായപ്പെട്ടു. പ്രാദേശിക പ്രശ്നങ്ങൾക്ക് പരിഹാരം കാണാൻ ജനങ്ങളോട് നേരിട്ട് ഉത്തരവാദിത്തമുള്ള ട്രസ്റ്റിമാർ വേണമെന്ന് രക്ഷിതാക്കളും ആവശ്യപ്പെടുന്നുണ്ട്. ക്ലാസ് മുറികളിലെ കുട്ടികളുടെ എണ്ണം കുറയ്ക്കുക, സ്പെഷ്യൽ നീഡ്സ് വിദ്യാർത്ഥികൾക്കായി കൂടുതൽ പ്രോഗ്രാമുകൾ അനുവദിക്കുക, എഡ്യൂക്കേഷണൽ അസിസ്റ്റന്റുമാരുടെ എണ്ണം വർദ്ധിപ്പിക്കുക തുടങ്ങിയ കാര്യങ്ങളിൽ പുതിയ നിയമം വ്യക്തത വരുത്തുമെന്ന് കരുതപ്പെടുന്നു. ട്രസ്റ്റി സ്ഥാനം അടുത്ത തദ്ദേശ സ്വയംഭരണ തിരഞ്ഞെടുപ്പിൽ ബാലറ്റ് പേപ്പറിൽ ഉണ്ടാകുമോ എന്ന കാര്യത്തിലും നിയമനിർമ്മാണത്തിലൂടെ മറുപടി ലഭിക്കുമെന്നാണ് റിപ്പോർട്ട്.
Critical change in Ontario school boards; future of OCDSB trustees uncertain
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
