വിന്നിപെഗ്: 2026-ലെ ഫിഫ ലോകകപ്പ് ഫുട്ബോളിന്റെ ആവേശം പങ്കുവെച്ച് ലോകകപ്പ് ട്രോഫി വിന്നിപെഗ് നഗരത്തിൽ പ്രദർശനത്തിന് എത്തിക്കുന്നു. കൊക്കക്കോള സ്പോൺസർ ചെയ്യുന്ന ഫിഫ വേൾഡ് കപ്പ് ട്രോഫി ടൂറിന്റെ ഭാഗമായി കാനഡയിലെ ഏഴ് നഗരങ്ങളിൽ നടത്തുന്ന സന്ദർശനവേളയിലാണ് വിന്നിപെഗിലും ട്രോഫി എത്തുന്നത്.
തിങ്കളാഴ്ച രാവിലെ 10 മണി മുതൽ രാത്രി 10 മണി വരെ മെമ്മോറിയൽ പാർക്കിലാണ് പൊതുജനങ്ങൾക്ക് ട്രോഫി ദർശിക്കാനുള്ള സൗകര്യം ഒരുക്കിയിട്ടുള്ളത്. പാർക്കിലെത്തുന്ന സന്ദർശകർക്ക് യഥാർത്ഥ ലോകകപ്പ് ട്രോഫിയോടൊപ്പം ഫോട്ടോ എടുക്കാനുള്ള അപൂർവ്വ അവസരവും ഉണ്ടായിരിക്കും. പ്രദർശനത്തോടനുബന്ധിച്ച് വിവിധ കായിക വിനോദങ്ങൾ, സമ്മാനങ്ങൾ, സംഗീത പരിപാടികൾ എന്നിവയും കൊക്കക്കോളയുടെ പ്രത്യേക സ്റ്റാളുകളും അവിടെ സജ്ജീകരിക്കും.
ഈ പ്രദർശനം പൂർണ്ണമായും സൗജന്യമാണെങ്കിലും പ്രവേശനത്തിന് മുൻകൂട്ടിയുള്ള ടിക്കറ്റുകൾ നിർബന്ധമാണ്. ടിക്കറ്റുകളെ സംബന്ധിച്ച കൂടുതൽ വിവരങ്ങൾ ഓൺലൈൻ വെബ്സൈറ്റിൽ ലഭ്യമാണ്. 2026 ജൂൺ 11 മുതൽ ജൂലൈ 19 വരെ കാനഡ, അമേരിക്ക, മെക്സിക്കോ എന്നീ രാജ്യങ്ങളുടെ സംയുക്ത ആതിഥേയത്വത്തിലാണ് ഫിഫ ലോകകപ്പ് മത്സരങ്ങൾ നടക്കുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
2026 FIFA World Cup Trophy to be displayed at Memorial Park in Winnipeg on Monday
