ഒട്ടാവ: അമേരിക്കയും ക്യൂബയും തമ്മിലുള്ള നയതന്ത്ര തർക്കങ്ങൾ പരിഹരിക്കാൻ കനേഡിയൻ സർക്കാർ അടിയന്തരമായി ഇടപെടണമെന്ന് രാജ്യത്തെ ഭൂരിഭാഗം ജനങ്ങളും ആവശ്യപ്പെടുന്നതായി നാനോസ് റിസർച്ച് സർവേ. കാനഡ സർക്കാർ വിഷയത്തിൽ മധ്യസ്ഥത വഹിക്കണമെന്നും ക്യൂബയിലെ ഇന്ധന പ്രതിസന്ധിക്ക് കാരണമായ അമേരിക്കൻ ഉപരോധങ്ങളിൽ ഇളവ് വരുത്താൻ സമ്മർദ്ദം ചെലുത്തണമെന്നുമാണ് സർവേയിൽ പങ്കെടുത്ത 54 ശതമാനം പേർ അഭിപ്രായപ്പെട്ടത്.
ഈ വർഷം ആദ്യം യുഎസ് പ്രസിഡന്റ് ഡോണൾഡ് ട്രംപ് ഏർപ്പെടുത്തിയ എണ്ണ കയറ്റുമതി നിയന്ത്രണങ്ങളെത്തുടർന്ന് ക്യൂബയിൽ ദേശീയതലത്തിൽ വൈദ്യുതി വിതരണം തകരാറിലായ പശ്ചാത്തലത്തിലാണ് സർവേ റിപ്പോർട്ട് പുറത്തുവന്നത്. നിലവിൽ ക്യൂബ നേരിടുന്ന കടുത്ത ഇന്ധനക്ഷാമം ഒരു കോടിയോളം ജനങ്ങളുടെ ദൈനംദിന ജീവിതത്തെ ബാധിക്കുകയും രാജ്യം ഇരുട്ടിലാകുകയും ചെയ്തിരിക്കുകയാണ്. അമേരിക്കൻ ഉപരോധം ക്യൂബയുടെ സമ്പദ്വ്യവസ്ഥയെ തകർക്കുന്നുവെന്ന വിമർശനം ശക്തമാകുന്നതിനിടെയാണ് കാനഡയുടെ ഇടപെടൽ ജനങ്ങൾ ആഗ്രഹിക്കുന്നത്. എന്നാൽ, വിഷയത്തിൽ ഇടപെടേണ്ടതില്ലെന്ന് 38 ശതമാനം പേർ നിലപാടെടുത്തു.
ഊർജ്ജ പ്രതിസന്ധി രൂക്ഷമായതോടെ ക്യൂബയിലെ ആശുപത്രികളുടെ പ്രവർത്തനം അവതാളത്തിലാവുകയും ടൂറിസം മേഖല തകരുകയും ചെയ്തിട്ടുണ്ട്. സുരക്ഷാ പ്രശ്നങ്ങൾ കണക്കിലെടുത്ത് കാനഡയിൽ നിന്നുള്ള വിമാന സർവീസുകൾ നേരത്തെ നിർത്തിവെച്ചിരുന്നു. ടൂറിസം മേഖലയെ ആശ്രയിച്ചു കഴിയുന്ന ക്യൂബൻ ജനതയ്ക്ക് ഈ സാഹചര്യം വലിയ തിരിച്ചടിയാണെന്ന് യാത്രാ വിദഗ്ധർ ചൂണ്ടിക്കാട്ടുന്നു. തടസ്സപ്പെട്ട വിമാന സർവീസുകൾ പുനരാരംഭിക്കണമെന്നും മാനുഷിക പരിഗണന മുൻനിർത്തി നയതന്ത്ര പരിഹാരം കാണണമെന്നുമാണ് കനേഡിയൻ പൗരന്മാരുടെ പൊതുവികാരം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Cuba crisis: Canadians support lifting US embargo in Nanos survey
