ഇസ്ലാമാബാദ്: പശ്ചിമേഷ്യയിലെ സംഘർഷങ്ങൾക്ക് അറുതി വരുത്തുകയെന്ന ലക്ഷ്യത്തോടെ അമേരിക്കയും ഇറാനും തമ്മിലുള്ള നിർണായക ചർച്ചകൾ ഇന്ന് പാകിസ്താൻ തലസ്ഥാനമായ ഇസ്ലാമാബാദിൽ നടക്കും. ഇറാൻ വിദേശകാര്യമന്ത്രി അബ്ബാസ് അരാഗ്ചിയും പാർലമെന്റ് സ്പീക്കർ മുഹമ്മദ് ബാഗർ ഗലിബാഫും ഉൾപ്പെടുന്ന 71 അംഗ ഉന്നതതല പ്രതിനിധി സംഘം ഇതിനോടകം പാകിസ്താനിലെത്തിയിട്ടുണ്ട്. യുഎസ് വൈസ് പ്രസിഡന്റ് ജെ.ഡി. വാൻസിന്റെ നേതൃത്വത്തിലുള്ള അമേരിക്കൻ സംഘവും ചർച്ചയിൽ പങ്കെടുക്കും. ദശാബ്ദങ്ങൾക്ക് ശേഷം ഇരുരാജ്യങ്ങളും തമ്മിൽ നടത്തുന്ന ഏറ്റവും സുപ്രധാനമായ നയതന്ത്ര നീക്കമായാണ് ഈ കൂടിക്കാഴ്ചയെ ലോകം നോക്കിക്കാണുന്നത്.
ചർച്ചകൾക്ക് മുന്നോടിയായി കടുത്ത നിബന്ധനകളാണ് ഇറാൻ മുന്നോട്ടുവെച്ചിരിക്കുന്നത്. ലെബനനിൽ ഇസ്രയേൽ നടത്തുന്ന ആക്രമണങ്ങൾ ഉടൻ അവസാനിപ്പിക്കണമെന്നും അമേരിക്ക മരവിപ്പിച്ച ഇറാന്റെ സ്വത്തുക്കൾ വിട്ടുനൽകണമെന്നും ഇറാൻ ആവശ്യപ്പെട്ടു. എന്നാൽ, നിബന്ധനകൾ വെക്കാൻ ഇറാന് ഇനി കഴിയില്ലെന്ന കർശന നിലപാടിലാണ് യുഎസ് പ്രസിഡന്റ് ഡൊണാൾഡ് ട്രംപ്. ചർച്ചകൾ പരാജയപ്പെട്ടാൽ ഇറാനെതിരെ ശക്തമായ സൈനിക നീക്കം നടത്തുമെന്നും ഇറാന്റെ അടിസ്ഥാന സൗകര്യങ്ങൾ തകർക്കുമെന്നും ട്രംപ് മുന്നറിയിപ്പ് നൽകി. ചർച്ചകളിലൂടെ കരാറിലെത്തുക മാത്രമാണ് ഇറാന് മുന്നിലുള്ള ഏക വഴിയെന്ന് അദ്ദേഹം ട്രൂത്ത് സോഷ്യലിലൂടെ വ്യക്തമാക്കി.
അതേസമയം, നയതന്ത്ര നീക്കങ്ങൾക്കിടയിലും ലെബനനിൽ ഇസ്രയേൽ ആക്രമണം തുടരുന്നത് ആശങ്ക വർധിപ്പിക്കുന്നുണ്ട്. ചർച്ചകളിൽ പ്രതീക്ഷയുണ്ടെങ്കിലും ഇറാൻ കബളിപ്പിക്കാൻ ശ്രമിച്ചാൽ അമേരിക്ക വഴങ്ങില്ലെന്ന് ജെ.ഡി. വാൻസ് വ്യക്തമാക്കിയിട്ടുണ്ട്. ഹോർമുസ് കടലിടുക്കിലെ ഗതാഗത തടസ്സവും ഇറാന്റെ ആണവ പദ്ധതിയുമടക്കം പശ്ചിമേഷ്യയിലെ സമാധാനം പുനഃസ്ഥാപിക്കുന്നതിനുള്ള പ്രധാന വിഷയങ്ങൾ ഇന്നത്തെ ചർച്ചയിൽ വിഷയമാകും. പാകിസ്താൻ പ്രധാനമന്ത്രി ഷെഹ്ബാസ് ഷെരീഫിന്റെ മധ്യസ്ഥതയിലാണ് ഈ ചരിത്ര ചർച്ചകൾ അരങ്ങേറുന്നത്.
The West is watching: Crucial US-Iran talks in Islamabad today
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
