മോണ്ട്രിയൽ: ന്യൂയോർക്കിലെ ജൂത കേന്ദ്രത്തിൽ വെടിവെപ്പ് നടത്താൻ പദ്ധതിയിട്ട കേസിൽ പ്രതി കുറ്റസമ്മതം നടത്തിയ പശ്ചാത്തലത്തിൽ, കാനഡയുടെയും അമേരിക്കയുടെയും സുരക്ഷാ സേനകൾ തമ്മിലുള്ള ഏകോപനത്തെ പ്രശംസിച്ച് കാനഡ പൊതു സുരക്ഷാ മന്ത്രി ഗാരി ആനന്ദസംഗരി. 2024-ൽ ക്യുബെക്കിൽ വെച്ച് പിടിയിലായ പാകിസ്താൻ പൗരൻ മുഹമ്മദ് ഷാസെബ് ഖാൻ (21) ബുധനാഴ്ച കോടതിയിൽ കുറ്റം സമ്മതിച്ചതിനെ തുടർന്നാണ് മന്ത്രിയുടെ പ്രതികരണം ഉണ്ടായത്.
അതിർത്തി കടന്നുള്ള കുറ്റകൃത്യങ്ങൾ തടയുന്നതിൽ ഇരു രാജ്യങ്ങളിലെയും അന്വേഷണ ഏജൻസികൾ മാതൃകാപരമായ പ്രവർത്തനമാണ് കാഴ്ചവെച്ചതെന്ന് മന്ത്രി വ്യക്തമാക്കി. 2023 ഒക്ടോബർ 7-ലെ ഹമാസ് ആക്രമണത്തിന്റെ വാർഷികത്തോടനുബന്ധിച്ച് ബ്രൂക്ക്ലിനിലെ ജൂത കേന്ദ്രത്തിൽ കൂട്ടക്കൊല നടത്താനായിരുന്നു ഖാന്റെ ലക്ഷ്യമെന്ന് അമേരിക്കൻ അധികൃതർ അറിയിച്ചു. ഒന്റാറിയോയിൽ താമസിച്ചിരുന്ന ഇയാൾ മനുഷ്യക്കടത്ത് സംഘത്തിന്റെ സഹായത്തോടെ യു.എസ്. അതിർത്തി കടക്കാൻ ശ്രമിക്കവെയാണ് 2024 സെപ്റ്റംബർ 4-ന് റോയൽ കനേഡിയൻ മൗണ്ടഡ് പോലീസിന്റെ (RCMP) പിടിയിലായത്. ‘ഫൈവ് ഐസ്’ ഇന്റലിജൻസ് കൂട്ടായ്മയുടെ സഹായത്തോടെ കാനഡയുടെ അതിർത്തി സുരക്ഷ ശക്തമാണെന്നും കൃത്യമായ വിവരങ്ങൾ കൈമാറിയതാണ് പ്രതിയെ പിടികൂടാൻ സഹായിച്ചതെന്നും മന്ത്രി കൂട്ടിച്ചേർത്തു.
ഇസ്രായേൽ-ഗാസ യുദ്ധത്തിന് പ്രതികാരമായി ഇസ്ലാമിക് സ്റ്റേറ്റിനെ സഹായിക്കാനാണ് താൻ പദ്ധതിയിട്ടതെന്ന് ജഡ്ജി പോൾ ജി. ഗാർഡെഫെ മുമ്പാകെ ഖാൻ മൊഴി നൽകി. ജൂത കേന്ദ്രത്തിന് സമീപം സ്ഥലം വാടകയ്ക്കെടുക്കുന്നതടക്കമുള്ള നീക്കങ്ങൾ നടത്തിയിരുന്നതായും എന്നാൽ ഇപ്പോൾ തന്റെ പ്രവൃത്തിയിൽ ഖേദമുണ്ടെന്നും പ്രതി കോടതിയിൽ പറഞ്ഞു. കേസിൽ കുറ്റക്കാരനെന്ന് കണ്ടെത്തിയ ഖാന് ജീവപര്യന്തം തടവ് വരെ ശിക്ഷ ലഭിക്കാൻ സാധ്യതയുണ്ട്. ശിക്ഷാ വിധി ഓഗസ്റ്റ് 12-ന് കോടതി പ്രഖ്യാപിക്കും.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Public Safety Minister Gary Anandasangari commends Canada-US investigative agencies for joint efforts to stop shooting
