ഇസ്ലാമാബാദ് : മിഡിൽ ഈസ്റ്റിലെ സംഘർഷങ്ങൾക്ക് അറുതി വരുത്താൻ ലക്ഷ്യമിട്ടുള്ള നിർണ്ണായകമായ യുഎസ്-ഇറാൻ ചർച്ചകൾക്ക് പാകിസ്താൻ ആതിഥേയത്വം വഹിക്കുന്നു. ഏപ്രിൽ 11-ന് നടക്കുന്ന ചർച്ചയുടെ ഭാഗമായി തലസ്ഥാനമായ ഇസ്ലാമാബാദിൽ കനത്ത സുരക്ഷാ ക്രമീകരണങ്ങളാണ് ഒരുക്കിയിരിക്കുന്നത്. നഗരത്തിലുടനീളം ചെക്ക്പോയിന്റുകൾ സ്ഥാപിക്കുകയും പ്രധാന റോഡുകളിലും സർക്കാർ സ്ഥാപനങ്ങളുടെ പരിസരങ്ങളിലും സുരക്ഷാ സേനയുടെ പട്രോളിങ് ശക്തമാക്കുകയും ചെയ്തിട്ടുണ്ട്. സമാധാന ചർച്ചയുടെ ഭാവി അറിയാൻ ലോകരാജ്യങ്ങൾ മുഴുവൻ ഇപ്പോൾ പാകിസ്താനിലേക്ക് ഉറ്റുനോക്കുകയാണ്.
പാർലമെന്റ്, വിദേശ എംബസികൾ, പ്രധാന സർക്കാർ ഓഫീസുകൾ എന്നിവ സ്ഥിതി ചെയ്യുന്ന ‘റെഡ് സോൺ’ പൂർണ്ണമായും സുരക്ഷാ ഉദ്യോഗസ്ഥരുടെ നിയന്ത്രണത്തിലാണ്. ഇവിടേക്ക് സാധാരണക്കാർ പ്രവേശിക്കുന്നതിന് കർശന വിലക്ക് ഏർപ്പെടുത്തി. പ്രധാന റോഡുകളിൽ സിവിലിയൻ വാഹനങ്ങൾ നിരോധിച്ചതായും റിപ്പോർട്ടുകളുണ്ട്. ചർച്ചയിൽ പങ്കെടുക്കാൻ എത്തുന്ന പ്രതിനിധികളുടെ സുരക്ഷ ഉറപ്പാക്കുന്നതിനായി നഗരത്തിലെ റെഡ് സോൺ മേഖലയിലെ റോഡുകളിൽ ഗതാഗതം വഴിതിരിച്ചുവിട്ടിരിക്കുകയാണ്.
സുരക്ഷാ ക്രമീകരണങ്ങൾ വിലയിരുത്തുന്നതിനായി അമേരിക്കയിൽ നിന്നുള്ള മുപ്പതംഗ വിദഗ്ധ സംഘം ഇതിനോടകം ഇസ്ലാമാബാദിൽ എത്തിക്കഴിഞ്ഞു. ചർച്ചയ്ക്ക് മുന്നോടിയായി വ്യാഴം, വെള്ളി ദിവസങ്ങളിൽ തലസ്ഥാന നഗരിയിൽ അധികൃതർ പൊതു അവധി പ്രഖ്യാപിച്ചു. ഇതിന്റെ ഭാഗമായി സ്കൂളുകളും പ്രധാന മാർക്കറ്റുകളും വ്യാപാര സ്ഥാപനങ്ങളും അടച്ചിട്ടിരിക്കുകയാണ്. നഗരത്തിലെ ആഡംബര ഹോട്ടലുകൾക്കും വിദേശ സംഘടനാ ഓഫീസുകൾക്കും പ്രത്യേക കാവൽ ഏർപ്പെടുത്തിയിട്ടുണ്ട്.
അതേസമയം, ചർച്ചയുടെ ഭാഗമായി എത്തുന്ന വിദേശ പ്രതിനിധികൾക്കും അന്താരാഷ്ട്ര മാധ്യമപ്രവർത്തകർക്കും തടസ്സമില്ലാതെ വിസ അനുവദിക്കാൻ പാക് ആഭ്യന്തര മന്ത്രാലയം തീരുമാനിച്ചു. വിമാനത്താവളങ്ങളിൽ ഇവർക്കായി പ്രത്യേക സൗകര്യങ്ങൾ ഒരുക്കിയിട്ടുണ്ട്. രണ്ടാഴ്ചത്തെ വെടിനിർത്തൽ കരാറിന്റെ ഭാവി നിശ്ചയിക്കുന്ന ഈ ചർച്ചകൾ മേഖലയിൽ സമാധാനം കൊണ്ടുവരുമെന്ന പ്രതീക്ഷയിലാണ് അന്താരാഷ്ട്ര സമൂഹം. പാകിസ്താൻ സ്വീകരിച്ചിരിക്കുന്ന അസാധാരണമായ ഈ സുരക്ഷാ മുൻകരുതലുകൾ ചർച്ചയുടെ ഗൗരവമാണ് വെളിപ്പെടുത്തുന്നത്.
US-Iran peace talks: Islamabad in security zone; strict control in the city
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
