ലോകത്തെ ഏറ്റവും പ്രധാനപ്പെട്ട എണ്ണക്കടത്തു പാതകളിലൊന്നായ ഹോർമുസ് കടലിടുക്കിലൂടെയുള്ള കപ്പൽ ഗതാഗതത്തിന് ഇറാൻ കർശന നിയന്ത്രണം ഏർപ്പെടുത്തി. പുതിയ നിയന്ത്രണങ്ങൾ പ്രകാരം പ്രതിദിനം 15 കപ്പലുകൾക്ക് മാത്രമാണ് പാതയിലൂടെ കടന്നുപോകാൻ അനുമതിയുള്ളതെന്ന് റഷ്യൻ വാർത്താ ഏജൻസിയായ ‘ടാസ്’ റിപ്പോർട്ട് ചെയ്തു. യുദ്ധത്തിന് മുമ്പ് ശരാശരി 140 ഓളം കപ്പലുകൾ ദിവസേന സഞ്ചരിച്ചിരുന്ന ഈ പാതയിൽ, പുതിയ തീരുമാനത്തോടെ ഗതാഗതത്തിൽ 90 ശതമാനത്തോളം ഇടിവുണ്ടാകും. അമേരിക്കയുമായുള്ള വെടിനിർത്തൽ കരാറിന്റെ ഭാഗമായി പാത തുറന്നുകൊടുക്കാൻ തീരുമാനിച്ചെങ്കിലും, പഴയതുപോലെ സ്വതന്ത്രമായ ഗതാഗതം അനുവദിക്കില്ലെന്ന് ഇറാൻ വ്യക്തമാക്കിയിട്ടുണ്ട്.
ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സിന്റെ (IRGC) കർശനമായ മേൽനോട്ടത്തിലായിരിക്കും ഇനി കപ്പലുകളുടെ സഞ്ചാരം. ഈ പാതയിലൂടെ കടന്നുപോകുന്ന കപ്പലുകൾ ഇറാനിൽ നിന്ന് മുൻകൂട്ടി അനുമതി വാങ്ങുകയും പ്രത്യേക ഫീസ് നൽകുകയും വേണം. കഴിഞ്ഞ ഫെബ്രുവരിയിൽ അമേരിക്കയും ഇസ്രായേലും സൈനിക നടപടി ആരംഭിച്ചത് മുതൽ ഈ ജലപാതയിലൂടെയുള്ള ഗതാഗതം തടസ്സപ്പെട്ടിരുന്നു. ഇത് ആഗോള വിപണിയിൽ എണ്ണവില കുത്തനെ കൂടാനും വിതരണ ശൃംഖല താറുമാറാകാനും കാരണമായി. ബുധനാഴ്ച ഒപ്പുവെച്ച വെടിനിർത്തൽ കരാറിലെ പ്രധാന വ്യവസ്ഥകളിലൊന്ന് പാത വീണ്ടും തുറക്കുക എന്നതായിരുന്നുവെങ്കിലും ഇറാന്റെ പുതിയ നിബന്ധനകൾ ആഗോള വിപണിയെ ആശങ്കയിലാക്കുന്നുണ്ട്.
രണ്ടാഴ്ചത്തെ വെടിനിർത്തൽ കാലയളവിൽ കടലിടുക്ക് കടക്കുന്ന കപ്പലുകളിൽ നിന്ന് ബാരലിന് ഒരു ഡോളർ വീതം ട്രാൻസിറ്റ് ഫീസായി ഈടാക്കാൻ ഇറാൻ പദ്ധതിയിടുന്നു. ഇത് ക്രിപ്റ്റോ കറൻസി വഴി നൽകണമെന്നാണ് റിപ്പോർട്ടുകൾ സൂചിപ്പിക്കുന്നത്. മേഖലയിലെ സുരക്ഷാ ചെലവുകൾ തിരിച്ചുപിടിക്കാനാണ് ഈ നീക്കമെന്നാണ് ഇറാന്റെ വാദം.
അതേസമയം, ഹോർമുസ് കടലിടുക്കിലെ ഗതാഗതം നിയന്ത്രിക്കുന്നതിനും ഫീസ് ഈടാക്കുന്നതിനുമായി ഇറാനുമായി ചേർന്ന് ഒരു ‘സംയുക്ത സംരംഭം’ രൂപീകരിക്കുന്നതിനെക്കുറിച്ച് വാഷിംഗ്ടൺ ആലോചിക്കുന്നുണ്ടെന്ന് യുഎസ് പ്രസിഡന്റ് ഡൊണാൾഡ് ട്രംപ് പ്രതികരിച്ചു. ഗതാഗത തടസ്സങ്ങൾ നീക്കി പാത സുരക്ഷിതമാക്കുന്നതിനുള്ള പദ്ധതികൾ അവതരിപ്പിക്കാൻ യൂറോപ്യൻ പങ്കാളികളോട് അമേരിക്ക ആവശ്യപ്പെട്ടിട്ടുണ്ട്.
പെട്രോളിയം ഉൽപ്പന്നങ്ങൾ കൂടാതെ വളം, പെട്രോകെമിക്കൽസ് തുടങ്ങിയവയുടെ കൈമാറ്റത്തിനും നിർണ്ണായകമായ ഈ പാതയിലെ തടസ്സങ്ങൾ ലോക സമ്പദ്വ്യവസ്ഥയെ സാരമായി ബാധിക്കും. വെടിനിർത്തൽ കരാർ നിലവിൽ വന്ന് മണിക്കൂറുകൾക്കുള്ളിൽ തന്നെ, ലെബനനിൽ ഇസ്രായേൽ നടത്തിയ ആക്രമണങ്ങളിൽ പ്രതിഷേധിച്ച് ഇറാൻ എണ്ണക്കപ്പലുകൾ തടഞ്ഞത് കരാറിന്റെ നിലനിൽപ്പിനെക്കുറിച്ചുള്ള ആശങ്കകൾ വർധിപ്പിച്ചിരുന്നു. ഹോർമുസ് കടലിടുക്കിന്റെ നിയന്ത്രണം പൂർണ്ണമായും തങ്ങളുടെ കൈപ്പിടിയിലാണെന്ന് ഉറപ്പിക്കാനാണ് പുതിയ പ്രോട്ടോക്കോളിലൂടെ ഇറാൻ ലക്ഷ്യമിടുന്നത്. ഇതിനെതിരെ അന്താരാഷ്ട്ര തലത്തിൽ വലിയ പ്രതിഷേധങ്ങൾ ഉയരാൻ സാധ്യതയുണ്ട്.
Iran tightens control in Strait of Hormuz; only 15 ships allowed per day
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
