കാലിഫോർണിയ: ലോകപ്രശസ്ത പേപ്പർ ഉൽപ്പന്ന ബ്രാൻഡുകളായ ഹഗ്ഗീസ് (Huggies), ക്ലീനെക്സ് (Kleenex) എന്നിവയുടെ ഉടമസ്ഥരായ കിംബർലി-ക്ലാർക്കിന്റെ കാലിഫോർണിയയിലെ കൂറ്റൻ വെയർഹൗസ് തീപിടുത്തത്തിൽ പൂർണ്ണമായും നശിച്ചു. ഏപ്രിൽ 7-ന് പുലർച്ചെ കാലിഫോർണിയയിലെ ഒന്റാറിയോയിലുള്ള ഗോഡൗണിലാണ് തീപിടുത്തമുണ്ടായത്. ടോയ്ലറ്റ് പേപ്പർ, ടിഷ്യൂ തുടങ്ങിയവ സൂക്ഷിച്ചിരുന്ന 1.2 മില്യൺ ചതുരശ്ര അടി വിസ്തീർണ്ണമുള്ള കെട്ടിടമാണ് അഗ്നിക്കിരയായത്. സംഭവവുമായി ബന്ധപ്പെട്ട് 29-കാരനായ ചമേൽ അബ്ദുൾകരീം എന്ന ജീവനക്കാരനെ പോലീസ് അറസ്റ്റ് ചെയ്തു. ഇയാൾ മനഃപൂർവ്വം തീയിട്ടതാണെന്നാണ് പ്രാഥമിക അന്വേഷണത്തിലെ കണ്ടെത്തൽ.
പുലർച്ചെ 1:45-ഓടെ പടർന്നുപിടിച്ച തീ നിയന്ത്രണവിധേയമാക്കാൻ 140-ഓളം അഗ്നിശമന സേനാംഗങ്ങൾക്ക് മണിക്കൂറുകളോളം പരിശ്രമിക്കേണ്ടി വന്നു. പേപ്പർ ഉൽപ്പന്നങ്ങൾ ധാരാളമായി ഉണ്ടായിരുന്നതിനാൽ തീ അതിവേഗം പടരുകയും കെട്ടിടത്തിന്റെ മേൽക്കൂര ഭാഗികമായി തകർന്നു വീഴുകയും ചെയ്തു. അപകടസമയത്ത് ഗോഡൗണിലുണ്ടായിരുന്ന 20 ജീവനക്കാരെയും സുരക്ഷിതമായി പുറത്തെത്തിച്ചതിനാൽ വലിയൊരു ദുരന്തം ഒഴിവായി. ആർക്കും പരിക്കേറ്റിട്ടില്ലെന്ന് അഗ്നിരക്ഷാ സേന സ്ഥിരീകരിച്ചു.
ഏകദേശം 5 കോടി ജനങ്ങളിലേക്ക് ഉൽപ്പന്നങ്ങൾ എത്തിക്കുന്ന കിംബർലി-ക്ലാർക്കിന്റെ പ്രധാന വിതരണ കേന്ദ്രങ്ങളിലൊന്നാണ് ഈ വെയർഹൗസ്. അതിനാൽ തന്നെ വരും ദിവസങ്ങളിൽ വിപണിയിൽ ഉൽപ്പന്നങ്ങളുടെ ലഭ്യത കുറയുമെന്നും വിതരണ ശൃംഖലയെ ഇത് സാരമായി ബാധിക്കുമെന്നും ആശങ്കയുണ്ട്. വാർത്ത പുറത്തുവന്നതിന് പിന്നാലെ കമ്പനിയുടെ ഓഹരി വിലയിലും ഇടിവ് രേഖപ്പെടുത്തിയിട്ടുണ്ട്. സംഭവത്തിൽ വിശദമായ അന്വേഷണം തുടരുകയാണെന്ന് പോലീസ് അറിയിച്ചു.
Massive fire breaks out at Kimberly-Clark warehouse, maker of Huggies; employee suspected of setting fire
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
