ബ്രസീൽ: തെക്കൻ ബ്രസീലിലെ റിയോ ഗ്രാൻഡെ ഡോ സുളിൽ ചെറുവിമാനം ജനവാസ മേഖലയിലെ റസ്റ്ററന്റിന് മുകളിലേക്ക് തകർന്നു വീണുണ്ടായ അപകടത്തിൽ പൈലറ്റും മൂന്ന് യാത്രക്കാരുമടക്കം നാല് പേർ കൊല്ലപ്പെട്ടു. കാപ്പാവോ ഡാ കനോവ വിമാനത്താവളത്തിൽ ഇറങ്ങാൻ ശ്രമിക്കുന്നതിനിടെ റൺവേയ്ക്ക് സമീപമുള്ള വൈദ്യുത തൂണിലിടിച്ച വിമാനം നിയന്ത്രണം വിട്ട് റസ്റ്ററന്റിലേക്ക് പതിക്കുകയായിരുന്നു. അപകടത്തിന് പിന്നാലെ വിമാനത്തിന് തീപിടിക്കുകയും പ്രദേശം കറുത്ത പുകയാൽ മൂടപ്പെടുകയും ചെയ്തു.
അപകടസമയത്ത് റസ്റ്ററന്റ് അടഞ്ഞുകിടന്നിരുന്നതിനാൽ കെട്ടിടത്തിനുള്ളിൽ ഉണ്ടായിരുന്നവർക്ക് പരിക്കേൽക്കാതെ വലിയൊരു ദുരന്തം ഒഴിവായി. വിമാനം താഴേക്ക് പതിക്കുന്ന സമയത്ത് സമീപത്തുണ്ടായിരുന്ന രണ്ട് പേർ തലനാരിഴയ്ക്ക് ഓടി രക്ഷപ്പെടുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.
അപകടത്തിന് പിന്നാലെ സിവിൽ ഡിഫൻസ് സംഘം സ്ഥലത്തെത്തി സമീപവാസികളെ സുരക്ഷിത സ്ഥാനങ്ങളിലേക്ക് മാറ്റി. സംഭവത്തിൽ അന്വേഷണം ആരംഭിച്ചതായും സുരക്ഷാ സേന സജ്ജമാണെന്നും സംസ്ഥാന ഗവർണർ എഡ്വേർഡോ ലൈറ്റ് അറിയിച്ചു. മധ്യ മെക്സിക്കോയിൽ സമാനമായ മറ്റൊരു വിമാനാപകടത്തിൽ നാല് പേർ മരിച്ച് 24 മണിക്കൂർ തികയുന്നതിന് മുൻപാണ് ബ്രസീലിലും ദുരന്തം ആവർത്തിച്ചത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
A small plane crashed into a restaurant in southern Brazil, causing a fire and killing four people.
