കാനഡയിൽ ലിസ്റ്റീരിയ ബാധ ഭീതി; ചീസും സാലഡും മീൽ കിറ്റുകളും തിരിച്ചുവിളിക്കുന്നു; ജാഗ്രതാനിർദേശം

ഒട്ടാവ: കാനഡയിൽ വിപണിയിലിറങ്ങിയ വിവിധയിനം ചീസുകൾ, റെഡി-ടു-ഈറ്റ് സാലഡുകൾ, മീൽ കിറ്റുകൾ എന്നിവയിൽ മാരകമായ ലിസ്റ്റീരിയ (Listeria) ബാക്ടീരിയയുടെ സാന്നിധ്യം കണ്ടെത്തിയതിനെത്തുടർന്ന് ഉൽപ്പന്നങ്ങൾ വിപണിയിൽ നിന്ന് അടിയന്തരമായി തിരിച്ചുവിളിക്കുന്നു. രാജ്യത്തെ പ്രമുഖ ബ്രാൻഡുകളുടെ ഉൽപ്പന്നങ്ങൾക്കാണ് കനേഡിയൻ ഫുഡ് ഇൻസ്പെക്ഷൻ ഏജൻസി (CFIA) നിലവിൽ വിലക്കേർപ്പെടുത്തിയിരിക്കുന്നത്. രോഗബാധ സംശയിക്കുന്ന പശ്ചാത്തലത്തിൽ ഈ ഉൽപ്പന്നങ്ങൾ ഒരുകാരണവശാലും ഉപയോഗിക്കരുതെന്ന് ഏജൻസി ജനങ്ങൾക്ക് കർശന നിർദേശം നൽകി.

കാനഡയിലെ വിവിധ പ്രവിശ്യകളിൽ വിതരണം ചെയ്ത പ്രമുഖ ബ്രാൻഡുകളുടെ ഉൽപ്പന്നങ്ങളിലാണ് ലിസ്റ്റീരിയ ബാക്ടീരിയയുടെ സാന്നിധ്യം സംശയിക്കുന്നത്. ആൽബർട്ട, ബ്രിട്ടീഷ് കൊളംബിയ, മാനിറ്റോബ, നോർത്ത് വെസ്റ്റ് ടെറിട്ടറീസ്, സസ്‌കാച്ചെവൻ എന്നിവിടങ്ങളിൽ വിറ്റഴിച്ച ‘കോ-ഓപ്പ്’ (Co-Op) ബ്രാൻഡിന്റെ ക്രീമി ഗാർലിക് ആൻഡ് സ്പിനാച്ച് സാലഡുകളാണ് ഇതിലൊന്ന്. മാർച്ച് 24 നും ഏപ്രിൽ 4 നും ഇടയിൽ കാലാവധി രേഖപ്പെടുത്തിയ ഈ സാലഡ് പാക്കറ്റുകൾ ഉപയോഗിക്കരുതെന്ന് നിർദേശമുണ്ട്. ഇതിന് പുറമെ കാനഡയിലുടനീളം ലഭ്യമായ ബോത്ത്‌വെൽ (Bothwell) ബ്രാൻഡിന്റെ വിവിധ അളവുകളിലുള്ള ത്രീ-ചീസ് നാച്ചോ ബ്ലെൻഡ്, ഗോൾഡ്‌സ്ട്രീം ബ്രാൻഡിന്റെ ചെഡ്ഡാർ സ്റ്റൈൽ ഷ്രെഡഡ് ചീസ്, പാരഡൈസ് ഐലൻഡിന്റെ അസിയാഗോ ഷ്രെഡഡ് ചീസ് എന്നിവയും തിരിച്ചുവിളിച്ചവയിൽ ഉൾപ്പെടുന്നു.

രാജ്യത്ത് ഏറെ ജനപ്രിയമായ ‘ഹലോ ഫ്രഷ്’ (Hello Fresh) മീൽ കിറ്റുകളിലെ ചീസ് ഉൽപ്പന്നങ്ങളിലേക്കും പരിശോധന വ്യാപിപ്പിച്ചിട്ടുണ്ട്. കഴിഞ്ഞ തിങ്കളാഴ്ച മീൽ കിറ്റുകളിലെ ചില ചീസ് ചേരുവകളെക്കുറിച്ച് പുറപ്പെടുവിച്ച മുന്നറിയിപ്പാണ് ഇപ്പോൾ വിപുലീകരിച്ചിരിക്കുന്നത്. ഭക്ഷ്യ സുരക്ഷാ മുൻകരുതലുകളുടെ ഭാഗമായിട്ടാണ് ഈ നടപടിയെന്ന് സിഎഫ്‌ഐഎ അറിയിച്ചു. ഏതൊക്കെ ബാച്ചുകളിലെ ഉൽപ്പന്നങ്ങളാണ് ബാധിക്കപ്പെട്ടിട്ടുള്ളത് എന്നതിന്റെ പൂർണ്ണമായ വിവരങ്ങൾ കനേഡിയൻ ഫുഡ് ഇൻസ്പെക്ഷൻ ഏജൻസിയുടെ ഔദ്യോഗിക വെബ്‌സൈറ്റിൽ ലഭ്യമാക്കിയിട്ടുണ്ട്.

ഭക്ഷണസാധനങ്ങൾ കേടായതായി ഒറ്റനോട്ടത്തിൽ തോന്നാത്ത രീതിയിലും ലിസ്റ്റീരിയ ബാക്ടീരിയകൾ അവയെ ബാധിക്കാമെന്നതാണ് ഏറ്റവും വലിയ വെല്ലുവിളി. സാധാരണയായി ഇത്തരം ബാക്ടീരിയ കലർന്ന ഭക്ഷണം കഴിക്കുന്നതിലൂടെ കഠിനമായ പനി, തലവേദന, ഛർദ്ദി, ദഹനപ്രശ്നങ്ങൾ തുടങ്ങിയ ലക്ഷണങ്ങൾ പ്രകടമാകാം. എന്നാൽ നിലവിൽ രാജ്യത്ത് ഈ ഉൽപ്പന്നങ്ങൾ കഴിച്ച് ആർക്കെങ്കിലും രോഗബാധ ഉണ്ടായതായി റിപ്പോർട്ട് ചെയ്യപ്പെട്ടിട്ടില്ലെന്നും മുൻകരുതൽ നടപടിയെന്ന നിലയിലാണ് വിപണിയിൽ നിന്ന് ഇവ പിൻവലിക്കുന്നതെന്നും ഫുഡ് ഇൻസ്പെക്ഷൻ ഏജൻസി വ്യക്തമാക്കി.

Listeria outbreak scare in Canada; Cheese, salad, and meal kits recalled; Caution issued

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt