ഫോണിൽ വരുന്ന ലിങ്കിൽ തൊട്ടാൽ അക്കൗണ്ട് കാലിയാകും; കാനഡയിൽ പാലിന്റെ പേരിൽ നടക്കുന്ന പുതിയ ഓൺലൈൻ ചതിക്കുഴി

ഒട്ടാവ: കാനഡയിലെമ്പാടും ഉപഭോക്താക്കളെ ലക്ഷ്യമിട്ട് പുതിയ രീതിയിലുള്ള ഓൺലൈൻ സാമ്പത്തിക തട്ടിപ്പ് വ്യാപകമാകുന്നു. പാൽ ഉൽപ്പന്നങ്ങൾ വാങ്ങിയവർക്ക് കോടതി വഴി വലിയ തുക നഷ്ടപരിഹാരം ലഭ്യമാക്കിയിട്ടുണ്ടെന്നും അതിനായി അപേക്ഷിക്കണമെന്നും ആവശ്യപ്പെട്ടാണ് മൊബൈൽ ഫോണുകളിലേക്ക് വ്യാജ സന്ദേശങ്ങൾ (എസ്എംഎസ്) വരുന്നത്. എന്നാൽ ഇത്തരത്തിൽ ഒരു കേസോ നഷ്ടപരിഹാര വിതരണമോ നിലവിലില്ലെന്നും വ്യക്തിഗത വിവരങ്ങളും ബാങ്ക് അക്കൗണ്ട് വിവരങ്ങളും ചോർത്താനുള്ള തട്ടിപ്പ് സംഘങ്ങളുടെ പുതിയ തന്ത്രമാണിതെന്നും സൈബർ സുരക്ഷാ വിദഗ്ധരും നിയമപാലകരും മുന്നറിയിപ്പ് നൽകുന്നു.

സർക്കാർ വെബ്സൈറ്റുകളെ വെല്ലുന്ന വ്യാജൻ

മൊബൈൽ ഫോണിൽ വരുന്ന ലിങ്കുകളിൽ ക്ലിക്ക് ചെയ്യുന്നതോടെ കനേഡിയൻ സർക്കാരിന്റെ ഔദ്യോഗിക വെബ്സൈറ്റുകളെ അനുസ്മരിപ്പിക്കുന്ന വിധം കൃത്യമായി ഡിസൈൻ ചെയ്ത പേജുകളിലേക്കാണ് ആളുകൾ എത്തിപ്പെടുന്നത്. അവിടെ പേര്, മേൽവിലാസം എന്നിവയ്ക്കൊപ്പം ക്രെഡിറ്റ് കാർഡ് വിവരങ്ങളും ആളുകളോട് ആവശ്യപ്പെടുന്നു.

തനിക്ക് നേരിട്ട അനുഭവം ഒന്റാരിയോ സ്വദേശിയായ ക്രിസ് ഹെർമൻ പങ്കുവെച്ചത് ഇങ്ങനെയാണ്: “കേന്ദ്ര സർക്കാരിന്റെ അതേ ചിഹ്നങ്ങളും ഗ്രാഫിക്സുമാണ് ആ വെബ്സൈറ്റിൽ ഉണ്ടായിരുന്നത്. മുൻപ് യഥാർത്ഥ നഷ്ടപരിഹാര തുകകൾ ഇത്തരത്തിൽ മൊബൈൽ സന്ദേശങ്ങൾ വഴി എനിക്ക് ലഭിച്ചിട്ടുണ്ട്. അതുകൊണ്ട് തന്നെ ആദ്യ നോട്ടത്തിൽ എനിക്ക് സംശയം തോന്നിയില്ല. എന്നാൽ ഒടുവിൽ അവർ എന്റെ ക്രെഡിറ്റ് കാർഡ് വിവരങ്ങൾ ചോദിച്ചപ്പോഴാണ് ഇത് തട്ടിപ്പാണെന്ന് മനസ്സിലായത്.” സമാനമായ അനുഭവം ഉണ്ടായ ഒന്റാരിയോയിലെ ഡോൺ സ്റ്റോൺമാൻ എന്നയാൾ സന്ദേശത്തിൽ കണ്ട നമ്പരിലേക്ക് വിളിച്ചെങ്കിലും ലഭിച്ചില്ല. തുടർന്ന് നടത്തിയ പരിശോധനയിലാണ് അത് നോവ സ്കോട്ടിയയിലെ വ്യാജ നമ്പരാണെന്ന് തിരിച്ചറിഞ്ഞത്.

പഴയ കേസുകളുടെ മറവിൽ പുതിയ തട്ടിപ്പ്

മുൻപ് കാനഡയിൽ നടന്ന ബ്രെഡ് വിലവർദ്ധനവുമായി ബന്ധപ്പെട്ട യഥാർത്ഥ നഷ്ടപരിഹാര കേസുകളെ മുൻനിർത്തിയാണ് തട്ടിപ്പുകാർ ജനങ്ങളുടെ വിശ്വാസ്യത പിടിച്ചുപറ്റുന്നത്. ഇത്തരം തട്ടിപ്പുകൾക്കായി ആളുകളുടെ ഫോൺ നമ്പറുകളും ഇമെയിൽ വിലാസങ്ങളും ചോർത്തി വലിയ തോതിൽ വ്യാജ സന്ദേശങ്ങൾ അയക്കുകയാണ് ഇപ്പോൾ ചെയ്യുന്നതെന്ന് സൈബർ സുരക്ഷാ വിദഗ്ധനായ ടെറി കട്ലർ വ്യക്തമാക്കി.
ഓൺലൈൻ തട്ടിപ്പുകാർക്ക് ഒളിഞ്ഞിരുന്ന് പ്രവർത്തിക്കാൻ ഇന്റർനെറ്റ് കൂടുതൽ പഴുതുകൾ നൽകുന്നുണ്ടെന്നും കട്ലർ പറയുന്നു.

ഒരിക്കൽ പണം നഷ്ടപ്പെട്ടാൽ അത് തിരികെ ലഭിക്കാനുള്ള സാധ്യത വളരെ കുറവാണ്. അതുകൊണ്ട് തന്നെ ജാഗ്രത മാത്രമാണ് ഏക പ്രതിവിധി. ഫോണിൽ വരുന്ന ഇത്തരം ലിങ്കുകളിൽ ആരും ക്ലിക്ക് ചെയ്യരുതെന്നും സംശയമുള്ള കേസുകളുടെ പേര് ഗൂഗിളിൽ സെർച്ച് ചെയ്ത് ഔദ്യോഗിക വിവരങ്ങൾ ഉറപ്പുവരുത്തണമെന്നും അദ്ദേഹം നിർദേശിച്ചു.

യഥാർത്ഥ നഷ്ടപരിഹാരങ്ങൾ എങ്ങനെ ലഭിക്കും?

യഥാർത്ഥത്തിൽ കോടതികൾ വഴി ലഭ്യമാകുന്ന നഷ്ടപരിഹാരങ്ങൾക്ക് കൃത്യമായ നടപടിക്രമങ്ങളുണ്ടെന്ന് സിസ്കിൻഡ്സ് ലോ ഫേമിലെ പങ്കാളിയായ ലിൻഡ വിസ്സർ വ്യക്തമാക്കുന്നു. അർഹരായ ആളുകൾക്ക് തുക അനുവദിക്കുന്നതിന് മുൻപ് ഇമെയിൽ വഴി കൃത്യമായ അറിയിപ്പുകൾ ലഭിക്കും. അപേക്ഷ ഫോമിൽ അടിസ്ഥാന വിവരങ്ങൾ മാത്രമേ ചോദിക്കാറുള്ളൂ. ഒരിക്കലും വ്യക്തിഗതമായ ബാങ്കിംഗ് വിവരങ്ങളോ ക്രെഡിറ്റ് കാർഡ് വിവരങ്ങളോ ആവശ്യപ്പെടില്ലെന്നും അവർ കൂട്ടിച്ചേർത്തു.

കനേഡിയൻ ആന്റി ഫ്രോഡ് സെന്ററിന്റെ കണക്കുകൾ പ്രകാരം 2022 മുതൽ ഇതുവരെ കാനഡയിൽ മാത്രം 2.4 ബില്യൺ ഡോളറിലധികം (ഏകദേശം 240 കോടി ഡോളർ) തുക വിവിധ സൈബർ തട്ടിപ്പുകളിലൂടെ ജനങ്ങൾക്ക് നഷ്ടമായിട്ടുണ്ട്. യഥാർത്ഥത്തിൽ നടക്കുന്ന തട്ടിപ്പുകളുടെ 5 മുതൽ 10 ശതമാനം വരെയുള്ള സംഭവങ്ങൾ മാത്രമാണ് പോലീസിൽ റിപ്പോർട്ട് ചെയ്യപ്പെടുന്നത് എന്നതിനാൽ യഥാർത്ഥ നഷ്ടം ഇതിലും എത്രയോ ഇരട്ടിയാകാമെന്നാണ് അധികൃതർ ചൂണ്ടിക്കാണിക്കുന്നത്.

അജ്ഞാത സന്ദേശങ്ങളോട് പ്രതികരിക്കാതിരിക്കുകയും ബാങ്കുകളിൽ നിന്നെന്ന പേരിൽ വരുന്ന സന്ദേശങ്ങളുടെ സത്യാവസ്ഥ ബാങ്കുകളുടെ ഔദ്യോഗിക ആപ്പുകൾ വഴിയോ ശാഖകൾ വഴിയോ മാത്രം ഉറപ്പുവരുത്തുകയോ ചെയ്യുക എന്നതാണ് ഇത്തരം വലകളിൽ വീഴാതിരിക്കാനുള്ള വഴി.

'Compensation for those who bought milk'; New online scam in Canada; Caution warning

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt