ഒട്ടാവ : കാനഡയിൽ പ്രകൃതിദുരന്തങ്ങൾ നേരിട്ട് ബാധിച്ച താൽക്കാലിക താമസക്കാർക്കായി പ്രത്യേക ഇമ്മിഗ്രേഷൻ നടപടികൾ പ്രഖ്യാപിച്ച് ഫെഡറൽ സർക്കാർ. അന്താരാഷ്ട്ര വിദ്യാർത്ഥികൾ, താൽക്കാലിക വിദേശ തൊഴിലാളികൾ, സന്ദർശകർ എന്നിവരടങ്ങുന്ന വിഭാഗങ്ങൾക്ക് ആശ്വാസം നൽകുന്നതാണ് പുതിയ തീരുമാനമെന്ന് ഇമ്മിഗ്രേഷൻ വകുപ്പ് പ്രതിനിധി ജാനിസ് റോഡ്രിഗ്സ് അറിയിച്ചു.
കാട്ടുതീ, പ്രളയം, കൊടുങ്കാറ്റ്, ഭൂകമ്പം തുടങ്ങിയ പ്രകൃതിക്ഷോഭങ്ങൾ മൂലം താമസമോ രേഖകളോ നഷ്ടപ്പെട്ടവർക്ക് ഇതിന്റെ പ്രയോജനം ലഭിക്കും. സാധാരണയായി വിസ സ്റ്റാറ്റസ് പുനഃസ്ഥാപിക്കാൻ നൽകുന്ന 90 ദിവസത്തെ സാവകാശം പുതിയ നയപ്രകാരം ആറ് മാസമായി ഉയർത്തിയിട്ടുണ്ട്. 2026 ഏപ്രിൽ ഒന്നിന് പ്രാബല്യത്തിൽ വന്ന ഈ നിയമം 2028 നവംബർ 30 വരെ തുടരുമെന്നാണ് പ്രതീക്ഷിക്കുന്നത്.
ദുരന്തം ബാധിച്ച സമയത്ത് കാനഡയിൽ സാധുവായ വിസയുള്ളവർക്കാണ് ഈ ആനുകൂല്യം ലഭിക്കുക. അപേക്ഷകൾ പരിഗണിക്കുന്ന കാലയളവിൽ ഇവർക്ക് കാനഡയിൽ തുടരാനും ജോലി ചെയ്യാനും നിയമപരമായ അനുമതി (Maintained Status) ഉണ്ടായിരിക്കും. നഷ്ടപ്പെട്ട സ്റ്റാറ്റസ് രേഖകൾ വീണ്ടെടുക്കാനും വിസ ദീർഘിപ്പിക്കാനുമുള്ള സൗകര്യം ഇതിലൂടെ ലഭ്യമാകും.
ഓൺലൈനായും തപാൽ വഴിയും അപേക്ഷകൾ സമർപ്പിക്കാവുന്നതാണ്. അപേക്ഷയോടൊപ്പം ദുരന്തം ബാധിച്ചതിന്റെ തെളിവുകളും ‘NaturalDisaster2026’ എന്ന കോഡ് ഉൾപ്പെടുത്തിയ വിശദീകരണ കത്തും നൽകണം. അടിയന്തര സാഹചര്യമുള്ളവർക്ക് ഐ.ആർ.സി.സി (IRCC) വെബ്ഫോം വഴി മുൻഗണനാ ക്രമത്തിൽ അപേക്ഷകൾ തീർപ്പാക്കാനുള്ള സൗകര്യവും ഒരുക്കിയിട്ടുണ്ട്.
കൂടാതെ, പ്രകൃതിദുരന്തം ഉണ്ടാകുമ്പോൾ കാനഡയെ സഹായിക്കാൻ വിദേശത്തുനിന്നും എത്തുന്ന അടിയന്തര സേവന പ്രവർത്തകർക്ക് (Emergency Workers) അപേക്ഷാ ഫീസും ബയോമെട്രിക് ഫീസും ഇനി നൽകേണ്ടതില്ല. കഴിഞ്ഞ വർഷം കാനഡയിലെ കാട്ടുതീ അണയ്ക്കാൻ ആയിരത്തിലധികം വിദേശികൾ സഹായിക്കാനെത്തിയിരുന്നു. ഇത് കണക്കിലെടുത്താണ് അവർക്ക് വേഗത്തിൽ രാജ്യത്തേക്ക് എത്താൻ പുതിയ ഇളവുകൾ പ്രഖ്യാപിച്ചത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Lost your visa documents? New benefits announced in Canada; Who will get them?
