കാനഡ പോസ്റ്റ് ഡോർ ടു ഡോർ ഡെലിവറി നിർത്തലാക്കാൻ ഒരുങ്ങുന്നു; നാല് മില്യൺ കുടുംബങ്ങളെ ബാധിക്കുമെന്ന് റിപ്പോർട്ട്

ഒട്ടാവ : കാനഡയിലെ ഏകദേശം നാല് മില്യൺ വീടുകളിലേക്ക് നേരിട്ട് തപാൽ എത്തിക്കുന്ന ‘ഹോം ഡെലിവറി’ സേവനം നിർത്തലാക്കാൻ കാനഡ പോസ്റ്റ് പുനസംഘടന പദ്ധതി തയ്യാറാക്കുന്നു. നിലവിൽ വീട്ടുപടിക്കൽ സേവനം ലഭിക്കുന്ന വിലാസങ്ങളെ കമ്മ്യൂണിറ്റി മെയിൽ ബോക്സുകളിലേക്ക് മാറ്റാനാണ് കോർപ്പറേഷൻ ലക്ഷ്യമിടുന്നത്. പദ്ധതിയുമായി ബന്ധപ്പെട്ട് ബാർഗെയ്‌നിംഗ് ഏജന്റുമാർ, മുനിസിപ്പൽ ഉദ്യോഗസ്ഥർ, മറ്റ് സ്റ്റേക്ക് ഹോൾഡർമാർ എന്നിവരുമായി ചർച്ചകൾ നടത്തിയ ശേഷമേ അന്തിമ തീരുമാനം എടുക്കൂ എന്ന് അധികൃതർ വ്യക്തമാക്കി.

2018 മുതൽ കാനഡ പോസ്റ്റ് നേരിടുന്ന അഞ്ച് ബില്യൺ ഡോളറിലധികം വരുന്ന സാമ്പത്തിക നഷ്ടം പരിഹരിക്കുന്നതിന്റെ ഭാഗമായാണ് ഫെഡറൽ ഗവൺമെന്റ് ഇത്തരമൊരു നിർദ്ദേശം മുന്നോട്ടുവെച്ചത്. ഹോം ഡെലിവറിക്ക് പകരം കമ്മ്യൂണിറ്റി മെയിൽ ബോക്സുകൾ സ്ഥാപിക്കുന്നതിലൂടെ പ്രതിവർഷം 400 മില്യൺ ഡോളറോളം ലാഭിക്കാൻ കഴിയുമെന്ന് അധികൃതർ അറിയിച്ചു. നിലവിൽ കാനഡയിലെ മുക്കാൽ ഭാഗം ജനങ്ങളും അപ്പാർട്ട്മെന്റ് അല്ലെങ്കിൽ റൂറൽ മെയിൽ ബോക്സുകൾ വഴിയാണ് തപാൽ സേവനങ്ങൾ സ്വീകരിക്കുന്നത്.

തൊഴിലവസരങ്ങൾ കുറയ്ക്കുമെന്നും ഗ്രാമീണ മേഖലകളെയും വിദൂര പ്രദേശങ്ങളെയും ഇത് പ്രതികൂലമായി ബാധിക്കുമെന്നും ചൂണ്ടിക്കാട്ടി കനേഡിയൻ യൂണിയൻ ഓഫ് പോസ്റ്റൽ വർക്കേഴ്സ് (CUPW) ഈ നീക്കത്തെ ശക്തമായി എതിർത്തു. മുതിർന്ന പൗരന്മാർക്കും ഭിന്നശേഷിക്കാർക്കും ഈ തീരുമാനം വലിയ പ്രയാസമുണ്ടാക്കുമെന്ന് സാമൂഹിക പ്രവർത്തകരും ചൂണ്ടിക്കാട്ടുന്നു. 2014-ൽ സമാനമായ രീതിയിൽ 8,30,000 വീടുകളിൽ ഹോം ഡെലിവറി നിർത്തലാക്കിയെങ്കിലും ജനരോഷത്തെത്തുടർന്ന് 2015-ൽ ആ തീരുമാനം പിൻവലിച്ചിരുന്നു.

സ്വകാര്യ കൊറിയർ കമ്പനികളായ ഫെഡെക്സ്, യുപിഎസ്, ഡിഎച്ച്എൽ എന്നിവയെ അപേക്ഷിച്ച് കുറഞ്ഞ നിരക്കിലാണ് കാനഡ പോസ്റ്റ് സേവനങ്ങൾ നൽകുന്നത്. കാനഡ പോസ്റ്റിന് കീഴിലുള്ള പ്യൂറോളേറ്റർ (Purolator) എന്ന കമ്പനിയുടെ 91 ശതമാനം ഓഹരികളും കോർപ്പറേഷന്റെ കൈവശമാണ്. നിലവിൽ തിങ്കൾ മുതൽ വെള്ളി വരെ തപാൽ വിതരണം നടക്കുന്നുണ്ടെങ്കിലും ഹോം ഡെലിവറി നിർത്തലാക്കുന്നതോടെ വിതരണത്തിന്റെ എണ്ണത്തിൽ മാറ്റം വരുമോ എന്ന കാര്യത്തിൽ കാനഡ പോസ്റ്റ് വ്യക്തത വരുത്തിയിട്ടില്ല.

നിലവിലെ നിബന്ധനകൾ പ്രകാരം നഗരപ്രദേശങ്ങളിൽ രണ്ട് പ്രവൃത്തി ദിവസങ്ങൾക്കുള്ളിലും വിദൂര ഉത്തരമേഖലകളിൽ 13 ദിവസങ്ങൾക്കുള്ളിലും തപാൽ വിതരണം പൂർത്തിയാക്കേണ്ടതുണ്ട്. ഹോം ഡെലിവറി നിർത്തലാക്കിയാലും ഈ സമയപരിധിയിൽ മാറ്റമുണ്ടാകുമോ എന്ന കാര്യത്തിൽ ഔദ്യോഗിക അറിയിപ്പുകൾ വന്നിട്ടില്ല. കാനഡ പോസ്റ്റിന്റെ നിലനിലപ്പിനായി ചിലവ് കുറഞ്ഞ മാർഗങ്ങൾ സ്വീകരിക്കുക എന്ന ലക്ഷ്യത്തോടെയാണ് ഈ പുനസംഘടന പദ്ധതിയെന്ന് പബ്ലിക് സർവീസസ് ആൻഡ് പ്രൊക്യുർമെന്റ് കാനഡയുടെ റിപ്പോർട്ടുകൾ വ്യക്തമാക്കുന്നു.

Canada Post to stop door-to-door delivery; Report says four million families will be affected

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt