ആർട്ടെമിസ് ദൗത്യം വിജയകരം; മനുഷ്യൻ വീണ്ടും ചന്ദ്രനിലേക്ക് ;ചരിത്രമെഴുതാൻ കനേഡിയൻ ബഹിരാകാശ സഞ്ചാരി ജെറമി ഹാൻസനും

ഫ്ലോറിഡ: മനുഷ്യനെ വീണ്ടും ചന്ദ്രനിലെത്തിക്കാനുള്ള നാസയുടെ നിർണായക ബഹിരാകാശ ദൗത്യമായ ‘ആർട്ടെമിസ് 2’ വിജയകരമായി വിക്ഷേപിച്ചു. അമേരിക്കയിലെ ഫ്ലോറിഡയിലുള്ള കെന്നഡി സ്പേസ് സെന്ററിൽ നിന്ന് ബുധനാഴ്ചയായിരുന്നു വിക്ഷേപണം. നാല് ബഹിരാകാശ സഞ്ചാരികൾ അടങ്ങുന്ന സംഘം പേടകത്തിൽ സുരക്ഷിതരാണ്. വിക്ഷേപണം കഴിഞ്ഞ് ഏതാനും സെക്കൻഡുകൾക്കകം തന്നെ ദൗത്യസംഘം ഭൂമിയിലെ കൺട്രോൾ റൂമുമായി ആദ്യമായി സംസാരിച്ചു. റേഡിയോ സന്ദേശത്തിൽ കേട്ട “റോൾ പിച്ച്” (Roll pitch) എന്ന വാക്കുകളും അതിന് ലഭിച്ച മറുപടിയുമാണ് ഇപ്പോൾ ശാസ്ത്രലോകത്ത് ചർച്ചയാകുന്നത്.

എന്താണ് ‘റോൾ പിച്ച്’?

വിക്ഷേപണ തറയിൽ നിന്ന് കുതിച്ചുയരുന്ന ഒരു റോക്കറ്റ് നിശ്ചിത ഉയരത്തിലെത്തിയാൽ അതിന്റെ ദിശയിലും കോണിലും വരുത്തുന്ന ചില പ്രത്യേക ക്രമീകരണങ്ങളെയാണ് ബഹിരാകാശ ശാസ്ത്രത്തിൽ ‘റോൾ പിച്ച്’ എന്ന് വിളിക്കുന്നത്. ഭൂമിയുടെ അന്തരീക്ഷം ഭേദിച്ച് കൃത്യമായ ഭ്രമണപഥത്തിൽ എത്തുന്നതിനാണ് റോക്കറ്റുകൾ ഈ വഴി സ്വീകരിക്കുന്നത്. കുത്തനെ മുകളിലേക്ക് മാത്രം സഞ്ചരിച്ചാൽ ഭൂമിയുടെ ഗുരുത്വാകർഷണ ബലത്തെ മറികടക്കാൻ റോക്കറ്റിന് കൂടുതൽ ഇന്ധനം ഉപയോഗിക്കേണ്ടി വരും. ഇത് ഒഴിവാക്കാനായി നിശ്ചിത ഉയരത്തിൽ വെച്ച് റോക്കറ്റ് ചെറുതായി തിരിയുകയും (Roll) പിന്നീട് അതിന്റെ മുൻഭാഗം പതുക്കെ ചരിഞ്ഞ് വശങ്ങളിലേക്ക് നീങ്ങുകയും (Pitch) ചെയ്യുന്നു. ഇത്തരത്തിൽ ചരിഞ്ഞ് സഞ്ചരിക്കുന്നതിലൂടെ ഭൂമിയുടെ ഗുരുത്വാകർഷണത്തെ അനുകൂലമാക്കി മാറ്റി വേഗത വർദ്ധിപ്പിക്കാൻ റോക്കറ്റിന് സാധിക്കും. വായുവിന്റെ പ്രതിരോധവും മർദ്ദവും നിയന്ത്രിക്കാൻ ഈ തന്ത്രപരമായ മാറ്റം അനിവാര്യമാണ്.

ചരിത്രമെഴുതാൻ കനേഡിയൻ യാത്രികനും

വിക്ഷേപണത്തിന് ശേഷം നാസയുടെ എസ്.എൽ.എസ് (SLS) റോക്കറ്റിൽ നിന്നും വേർപെട്ട ‘ഓറിയോൺ’ പേടകം നിലവിൽ ബഹിരാകാശത്ത് എത്തിക്കഴിഞ്ഞു. ദൗത്യത്തിന്റെ ആദ്യ ഘട്ടമെന്ന നിലയിൽ ഭൂമിയെ രണ്ട് തവണ ഓറിയോൺ പേടകം വലയം ചെയ്യും. പേടകത്തിലെ എല്ലാ സംവിധാനങ്ങളും സുരക്ഷിതമാണെന്ന് ഉറപ്പുവരുത്തിയ ശേഷമായിരിക്കും ഇത് ചന്ദ്രനിലേക്കുള്ള യാത്ര തിരിക്കുക. ഏകദേശം 10 ദിവസം നീണ്ടുനിൽക്കുന്നതാണ് ഈ ദൗത്യം.

പദ്ധതി വിജയകരമായാൽ ഒരു അമേരിക്കക്കാരനല്ലാതെ ബഹിരാകാശത്തിന്റെ ആഴങ്ങളിലേക്ക് (Deep space) യാത്ര ചെയ്യുന്ന ആദ്യ വ്യക്തിയെന്ന റെക്കോർഡ് കനേഡിയൻ ബഹിരാകാശ സഞ്ചാരിയായ ജെറമി ഹാൻസന് സ്വന്തമാകും. ചന്ദ്രന്റെ ഭ്രമണപഥം ചുറ്റി സഞ്ചാരികൾ സുരക്ഷിതമായി ഭൂമിയിൽ തിരിച്ചെത്തുന്നതോടെ മനുഷ്യനെ വീണ്ടും ചന്ദ്രനിൽ ഇറക്കാനുള്ള നാസയുടെ അടുത്ത ദൗത്യങ്ങൾക്ക് ഇത് വഴിതുറക്കും.

artemis-2-moon-mission-launch-orion-spacecraft-crew-updates

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt