ഒട്ടാവ: കാനഡ റവന്യൂ ഏജൻസിയിലെ (CRA) നൂറുകണക്കിന് ജീവനക്കാരുടെ ജോലി പ്രതിസന്ധിയിലെന്ന് റിപ്പോർട്ട്. വിവിധ വകുപ്പുകളിലായി 450-ലധികം ജീവനക്കാർക്ക് തങ്ങളുടെ തസ്തികകൾ വെട്ടിക്കുറയ്ക്കാൻ സാധ്യതയുണ്ടെന്ന ഔദ്യോഗിക മുന്നറിയിപ്പ് ഈ ആഴ്ച ലഭിച്ചു. പിഎസ്എസി (PSAC) അംഗങ്ങളായ 284 പേർക്കും പിഐപിഎസ്സി (PIPSC) അംഗങ്ങളായ 195 പേർക്കും ഉൾപ്പെടെയുള്ളവർക്കാണ് ഈ തൊഴിൽ ഭീഷണി നേരിടുന്നത്.
ഡിജിറ്റൽ സർവീസ് ടാക്സ്, ഫെഡറൽ ഫ്യൂവൽ ചാർജ്, കാനഡ കാർബൺ റിബേറ്റ്, ലക്ഷ്വറി ടാക്സ് തുടങ്ങിയ പ്രധാന നികുതി പദ്ധതികൾ നിർത്തലാക്കാനുള്ള ഗവൺമെന്റ് തീരുമാനമാണ് ഈ പിരിച്ചുവിടലുകളിലേക്ക് നയിക്കുന്നത്. അടുത്ത മൂന്ന് വർഷത്തിനുള്ളിൽ ഭരണനിർവഹണ ചിലവിൽ 1.2 ബില്യൺ ഡോളറിന്റെ കുറവ് വരുത്താനാണ് ഏജൻസി ലക്ഷ്യമിടുന്നത്. ഇതിന്റെ ഭാഗമായി ഒട്ടാവയിലെ ഓഫീസ് ആസ്ഥാനത്തും വിവിധ പ്രാദേശിക ഓഫീസുകളിലുമുള്ള ജീവനക്കാർക്ക് നോട്ടീസ് നൽകിക്കഴിഞ്ഞു.
യൂണിയൻ ഓഫ് ടാക്സേഷൻ എംപ്ലോയീസ് ഈ നടപടിയെ ശക്തമായി അപലപിച്ചു. നികുതി നിയമങ്ങൾ നടപ്പിലാക്കുകയും സർക്കാരിലേക്ക് വരുമാനം എത്തിക്കുകയും ചെയ്യുന്ന ഉദ്യോഗസ്ഥരെ കുറയ്ക്കുന്നത് രാജ്യത്തിന്റെ സാമ്പത്തിക ഭദ്രതയെ ബാധിക്കുമെന്ന് യൂണിയൻ നേതാക്കൾ മുന്നറിയിപ്പ് നൽകുന്നു. 2024-25 കാലയളവിൽ ഏകദേശം 53,585 ജീവനക്കാരുണ്ടായിരുന്ന സിആർഎ, 2028-29 ആകുമ്പോഴേക്കും ജീവനക്കാരുടെ എണ്ണം 48,807 ആയി ചുരുക്കാനാണ് പദ്ധതിയിടുന്നത്. ഇത് കാനഡയിലെ പൊതുമേഖലാ തൊഴിൽ രംഗത്ത് വലിയ ആശങ്കയ്ക്ക് കാരണമായിട്ടുണ്ട്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
More than 450 Canada Revenue Agency employees warned jobs at risk
