ദുബായ്: ഇറാനിയൻ പൗരന്മാർക്ക് രാജ്യത്തേക്ക് പ്രവേശിക്കുന്നതിനും യാത്ര ചെയ്യുന്നതിനും യുഎഇ കർശന നിയന്ത്രണങ്ങൾ ഏർപ്പെടുത്തിയതായി പ്രമുഖ വിമാനക്കമ്പനികൾ അറിയിച്ചു. പശ്ചിമേഷ്യയിൽ യുദ്ധം രൂക്ഷമാകുന്ന സാഹചര്യത്തിലാണ് യുഎഇയുടെ ഈ നിർണ്ണായക നീക്കം. ബുധനാഴ്ചയാണ് പ്രമുഖ വിമാനക്കമ്പനികളായ എമിറേറ്റ്സ്, ഇത്തിഹാദ്, ഫ്ലൈദുബായ് എന്നിവർ തങ്ങളുടെ ഔദ്യോഗിക വെബ്സൈറ്റുകളിലൂടെ യാത്രാ വിലക്ക് സംബന്ധിച്ച വിവരം പുറത്തുവിട്ടത്.
യുഎഇയുടെ പ്രവേശന നിയമങ്ങളിൽ പെട്ടെന്നുണ്ടായ ഈ മാറ്റം വിമാനക്കമ്പനികളുടെ വെബ്സൈറ്റുകളിൽ വ്യക്തമായി പ്രദർശിപ്പിച്ചിട്ടുണ്ട്. എന്നാൽ, യുഎഇ ഭരണകൂടം ഇതുവരെ വിഷയത്തിൽ ഔദ്യോഗിക പ്രതികരണം നടത്തിയിട്ടില്ല. പുതിയ ഉത്തരവ് പ്രകാരം സാധാരണ വിസയുള്ള ഇറാനിയൻ പൗരന്മാർക്ക് രാജ്യത്തേക്ക് പ്രവേശനം അനുവദിക്കില്ലെങ്കിലും, പത്ത് വർഷത്തെ റെസിഡൻസി പെർമിറ്റായ ‘ഗോൾഡൻ വിസ’ കൈവശമുള്ളവർക്ക് ഇളവ് അനുവദിച്ചിട്ടുണ്ട്. ഇവർക്ക് നിലവിൽ തടസ്സങ്ങളില്ലാതെ യുഎഇയിലേക്ക് യാത്ര ചെയ്യാവുന്നതാണ്.
മേഖലയിലെ മാറുന്ന രാഷ്ട്രീയ സാഹചര്യങ്ങളുടെ പശ്ചാത്തലത്തിൽ ദുബായിലെ പ്രധാന ഇറാനിയൻ സ്ഥാപനങ്ങളായ ഇറാനിയൻ ആശുപത്രിയും ഇറാനിയൻ ക്ലബ്ബും ഇതിനകം തന്നെ പ്രവർത്തനം നിർത്തിവെച്ചിട്ടുണ്ട്. ദശാബ്ദങ്ങളായി ദുബായിൽ പ്രവർത്തിച്ചിരുന്ന ഈ സ്ഥാപനങ്ങളുടെ അടച്ചുപൂട്ടലിന് പിന്നാലെയാണ് ഇപ്പോൾ യാത്രാ വിലക്കും പ്രാബല്യത്തിൽ വന്നിരിക്കുന്നത്. അമേരിക്കയുൾപ്പെടെയുള്ള രാജ്യങ്ങളുമായി ചേർന്ന് പുതിയ പ്രാദേശിക സഖ്യങ്ങൾ രൂപപ്പെടുന്ന സാഹചര്യത്തിൽ, യുഎഇയുടെ ഈ നടപടിക്ക് വലിയ രാഷ്ട്രീയ പ്രാധാന്യമുണ്ടെന്നാണ് വിലയിരുത്തപ്പെടുന്നത്.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
UAE bans entry of Iranian citizens; airlines announce restrictions
