സൗദി: സെപ്റ്റംബർ 23-ന് ആഘോഷിക്കുന്ന സൗദി ദേശീയ ദിനത്തോടനുബന്ധിച്ച് പുതിയ വിഷ്വൽ ഐഡൻറിറ്റിയും ലോഗോയും സൗദി ജനറൽ എൻറർടൈൻമെൻറ് അതോറിറ്റി ചെയർമാൻ തുർക്കി ആലുശൈഖ് പ്രഖ്യാപിച്ചു. കഴിഞ്ഞ വർഷം ഏറെ ശ്രദ്ധനേടിയ ‘നമ്മുടെ അഭിമാനം നമ്മുടെ സ്വഭാവത്തിലാണ്’ (Nahlm wa Nuhqi) എന്ന മുദ്രാവാക്യം തന്നെയാണ് ഈ വർഷവും ആഘോഷങ്ങൾക്കായി തിരഞ്ഞെടുത്തത്. രാജ്യത്തിന്റെ സാംസ്കാരിക പാരമ്പര്യവും ദേശീയ ഐക്യവും വിളിച്ചോതുന്ന രീതിയിലാണ് ഇത്തവണത്തെ ലോഗോയും വിഷ്വൽ ഗൈഡും രൂപകൽപ്പന ചെയ്തിരിക്കുന്നത്.
സൗദി സമൂഹത്തിന്റെ അടിസ്ഥാന മൂല്യങ്ങളായ ധൈര്യം, ദീർഘവീക്ഷണം, തനിമ, നിശ്ചയദാർഢ്യം, ഔദാര്യം, ആതിഥ്യമര്യാദ എന്നിവയെ കേന്ദ്രീകരിച്ചാണ് ആഘോഷപരിപാടികൾ ആസൂത്രണം ചെയ്യുന്നത്. പ്രധാന മുദ്രാവാക്യത്തിന് കീഴിൽ, പൗരന്മാരുടെ ഈ സവിശേഷ സ്വഭാവഗുണങ്ങളെ എടുത്തുകാട്ടുന്ന ഉപ-സന്ദേശങ്ങളും ഉൾപ്പെടുത്തിയിട്ടുണ്ട്. സൗദിയുടെ പരമ്പരാഗത നെയ്ത്തുകലയിൽ നിന്ന് പ്രചോദനം ഉൾക്കൊണ്ട ജ്യാമിതീയ വരകളും പ്രത്യേകമായി രൂപകൽപ്പന ചെയ്ത ‘സൗദി ഫോണ്ടും’ ലോഗോയുടെ ഭാഗമാണ്.
ദേശീയ ദിനാഘോഷങ്ങൾ രാജ്യവ്യാപകമായി ഒരേ രീതിയിൽ നടപ്പിലാക്കുന്നതിനായി അതോറിറ്റി സമഗ്രമായ വിഷ്വൽ ഗൈഡ് പുറത്തിറക്കി. സർക്കാർ, സ്വകാര്യ, ലാഭരഹിത സ്ഥാപനങ്ങൾ തങ്ങളുടെ ആഘോഷങ്ങളിലും മാധ്യമ പ്രചാരണ സാമഗ്രികളിലും ഔദ്യോഗിക ലോഗോയും നിർദ്ദേശങ്ങളും മാത്രം ഉപയോഗിക്കണമെന്ന് അധികൃതർ കർശന നിർദ്ദേശം നൽകി. ആഘോഷങ്ങൾക്ക് ഏകീകൃത സ്വഭാവം നൽകുന്നതിലൂടെ രാജ്യത്തിന്റെ ദേശീയ ഐഡൻറിറ്റിയെയും സാംസ്കാരിക തനിമയെയും കൂടുതൽ കരുത്തുറ്റതാക്കാനാണ് അതോറിറ്റി ലക്ഷ്യമിടുന്നത്.
Saudi National Day: Official logo and slogan unveiled
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
