ഒട്ടാവ: കാനഡയിലെ പ്രൊവിൻഷ്യൽ നോമിനി പ്രോഗ്രാം അപേക്ഷകർക്ക് ആശ്വാസമായി ഇമിഗ്രേഷൻ നിയമങ്ങളിൽ വലിയ മാറ്റം വന്നിരിക്കുന്നു. 2026 മാർച്ച് 30 മുതൽ പ്രാബല്യത്തിൽ വന്ന പുതിയ പരിഷ്കാരം അനുസരിച്ച് പി.എൻ.പി അപേക്ഷകളിൽ ഇനി മുതൽ അതത് പ്രവിശ്യകൾക്കും ടെറിട്ടറികൾക്കുമായിരിക്കും അന്തിമ അധികാരം. ഒരു അപേക്ഷകൻ കാനഡയിൽ സാമ്പത്തികമായി നിലനിൽക്കാൻ പ്രാപ്തനാണോ എന്നും അവർക്ക് പ്രവിശ്യയിൽ താമസിക്കാൻ താല്പര്യമുണ്ടോ എന്നും തീരുമാനിക്കാനുള്ള അധികാരം ഫെഡറൽ സർക്കാരിൽ നിന്നും പ്രവിശ്യകൾക്ക് പൂർണ്ണമായി കൈമാറിക്കഴിഞ്ഞു.
മുൻപ് ഒരു പ്രവിശ്യ ഉദ്യോഗാർത്ഥിയെ നോമിനേറ്റ് ചെയ്താലും ഫെഡറൽ ഇമിഗ്രേഷൻ ഓഫീസർക്ക് ആ വ്യക്തിയുടെ താമസിക്കാനുള്ള താല്പര്യത്തെക്കുറിച്ചോ സാമ്പത്തിക ശേഷിയെക്കുറിച്ചോ സംശയം തോന്നിയാൽ അപേക്ഷ നിരസിക്കാൻ കഴിയുമായിരുന്നു. എന്നാൽ പുതിയ നിയമപ്രകാരം പ്രവിശ്യ നൽകുന്ന നോമിനേഷൻ സർട്ടിഫിക്കറ്റ് ഈ കാര്യങ്ങൾക്കുള്ള അന്തിമ തെളിവായി ഫെഡറൽ സർക്കാർ കണക്കാക്കും. ഇമിഗ്രേഷൻ ഓഫീസർമാർക്ക് സ്വന്തം നിലയിൽ ഇനി ഈ രണ്ട് കാര്യങ്ങളിൽ പ്രത്യേകം പരിശോധന നടത്താനോ തീരുമാനമെടുക്കാനോ കഴിയില്ല എന്നത് അപേക്ഷകർക്ക് വലിയ ആശ്വാസമാണ്.
2026 മാർച്ച് 30-ന് മുൻപ് അപേക്ഷ സമർപ്പിച്ചവരും എന്നാൽ എലിജിബിലിറ്റി ഘട്ടം പിന്നിടാത്തവരുമായ എല്ലാ അപേക്ഷകർക്കും ഈ പുതിയ നിയമം ബാധകമായിരിക്കും. തീരുമാനങ്ങൾ പ്രവിശ്യകൾക്ക് കൈമാറിയെങ്കിലും അപേക്ഷകന്റെ വ്യക്തിവിവരങ്ങൾ നോമിനേഷൻ സർട്ടിഫിക്കറ്റിന്റെ സാധുത കുറ്റകൃത്യങ്ങൾ സുരക്ഷാ പ്രശ്നങ്ങൾ ആരോഗ്യം തുടങ്ങിയ കാര്യങ്ങൾ ഫെഡറൽ സർക്കാർ തുടർന്നും പരിശോധിക്കും.
നോമിനേഷൻ ഘട്ടത്തിൽ തന്നെ പ്രവിശ്യകൾ ഇനി കൂടുതൽ കർശനമായ പരിശോധനകൾ നടത്താൻ സാധ്യതയുള്ളതിനാൽ അപേക്ഷകർ പ്രവിശ്യയുമായുള്ള ബന്ധം തെളിയിക്കുന്ന രേഖകൾ കൃത്യമായി സമർപ്പിക്കാൻ ശ്രദ്ധിക്കണം. ഫെഡറൽ തലത്തിലുള്ള അനാവശ്യമായ അപേക്ഷാ നിരസിക്കലുകൾ കുറയാൻ ഈ നിയമമാറ്റം സഹായിക്കും. പ്രവിശ്യയുടെ അംഗീകാരം ലഭിച്ചാൽ കനേഡിയൻ പി.ആർ എന്ന സ്വപ്നം ഇനി കൂടുതൽ സുരക്ഷിതമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Ottawa shifts key PNP eligibility decisions to provinces and territories
