തളർച്ച മാറ്റാൻ ഫ്ലുവോക്സാമിൻ; ലോങ് കോവിഡ് ചികിത്സയിൽ വഴിത്തിരിവാകാൻ പുതിയ കണ്ടെത്തൽ, പഠന റിപ്പോർട്ട് പുറത്ത്

ഒന്റാറിയോ: ലോങ് കോവിഡ് ബാധിതരിലുണ്ടാകുന്ന കഠിനമായ തളർച്ച പരിഹരിക്കാൻ സാധാരണയായി ഉപയോഗിക്കുന്ന ‘ഫ്ലുവോക്സാമിൻ’ (Fluvoxamine) എന്ന മരുന്ന് ഫലപ്രദമാണെന്ന് പുതിയ പഠനം വ്യക്തമാക്കുന്നു. ഒന്റാറിയോയിലെ മക്മാസ്റ്റർ സർവകലാശാലയിലെ ഗവേഷകർ സംയുക്തമായി നടത്തിയ ക്ലിനിക്കൽ ട്രയലിലാണ് ഈ കണ്ടെത്തൽ. ‘ലുവോക്സ്’ (Luvox) എന്ന പേരിൽ അറിയപ്പെടുന്ന ഈ മരുന്ന് ലോങ് കോവിഡ് ലക്ഷണങ്ങൾ കുറയ്ക്കുന്നതായി കണ്ടെത്തുന്ന ആദ്യ ഔദ്യോഗിക പഠനങ്ങളിൽ ഒന്നാണിത്.

ലോങ് കോവിഡ് ബാധിതരായ 399 മുതിർന്ന വ്യക്തികളിലാണ് പഠനം നടത്തിയത്. ലക്ഷണങ്ങൾ ലഘൂകരിക്കുന്നതിന് നിലവിൽ ശാസ്ത്രീയമായ ഓപ്ഷനുകൾ തേടുന്ന രോഗികൾക്ക് ഈ കണ്ടെത്തൽ വലിയ ചുവടുവെപ്പാണെന്ന് മക്മാസ്റ്റർ സർവകലാശാലയിലെ പ്രൊഫസർ എഡ്വേർഡ് മിൽസ് വാർത്താക്കുറിപ്പിൽ അറിയിച്ചു. വ്യാപകമായി ഉപയോഗിക്കപ്പെടുന്നതും പാർശ്വഫലങ്ങളെക്കുറിച്ച് കൃത്യമായ ധാരണയുള്ളതുമായ മരുന്നായതിനാൽ ഇതിന്റെ ക്ലിനിക്കൽ ഉപയോഗം എളുപ്പമാകുമെന്നും അദ്ദേഹം വ്യക്തമാക്കി.

ലോകമെമ്പാടും ഏകദേശം 6.5 കോടി ആളുകൾക്ക് ലോങ് കോവിഡ് ബാധിച്ചിട്ടുണ്ടെന്നാണ് കണക്കാക്കുന്നത്. കോവിഡ് ബാധിച്ച ആറിൽ ഒരാൾക്ക് എന്ന നിലയിൽ രോഗലക്ഷണങ്ങൾ മൂന്ന് മാസത്തിലധികം നീണ്ടുനിൽക്കാറുണ്ട്. കഠിനമായ തളർച്ച, ശ്വാസതടസ്സം, പേശീവേദന, ഉറക്കമില്ലായ്മ എന്നിവയാണ് പ്രധാന ലക്ഷണങ്ങളെന്ന് ലോകാരോഗ്യ സംഘടന ചൂണ്ടിക്കാട്ടുന്നു. ഇത് രോഗികളുടെ ദൈനംദിന പ്രവൃത്തികളെയും ജോലിയെയും സാമൂഹിക ജീവിതത്തെയും പ്രതികൂലമായി ബാധിക്കുന്നുണ്ട്.

പ്രമേഹത്തിനുള്ള മരുന്നായ മെറ്റ്‌ഫോർമിനും (Metformin) ഇതോടൊപ്പം പരീക്ഷണത്തിന് വിധേയമാക്കിയിരുന്നു. കോവിഡ് ബാധയുടെ സമയത്ത് മെറ്റ്‌ഫോർമിൻ കഴിക്കുന്നത് ലോങ് കോവിഡ് വരാനുള്ള സാധ്യത കുറയ്ക്കുമെന്ന് മുൻപ് തെളിയിക്കപ്പെട്ടിട്ടുണ്ട്. എന്നാൽ ലോങ് കോവിഡ് ബാധിച്ചവരിലെ തളർച്ച മാറ്റാൻ ഈ മരുന്ന് ഫലപ്രദമല്ലെന്ന് പുതിയ പഠനത്തിൽ കണ്ടെത്തി. കുറഞ്ഞ ചെലവിൽ എളുപ്പത്തിൽ ലഭ്യമാകുന്ന മരുന്നുകളിലാണ് ഗവേഷകർ ശ്രദ്ധ കേന്ദ്രീകരിച്ചത്.

കാനഡ, ബ്രസീൽ, യുഎസ് എന്നിവിടങ്ങളിലെ ഗവേഷകർ പങ്കെടുത്ത പഠനം 60 ദിവസമാണ് നീണ്ടുനിന്നത്. പ്ലാസിബോ ഗ്രൂപ്പിനേക്കാൾ 99 ശതമാനം കൂടുതൽ ഫലപ്രാപ്തി ഫ്ലുവോക്സാമിൻ നൽകുന്നതായി പരീക്ഷണത്തിൽ വ്യക്തമായി. ഗുളിക ഒന്നിന് ഒരു ഡോളറിൽ താഴെ മാത്രം വിലവരുന്ന ഈ ജനറിക് മരുന്ന് രോഗികളുടെ ജീവിതനിലവാരം മെച്ചപ്പെടുത്താൻ സഹായിക്കുമെന്നാണ് ഗവേഷകരുടെ വിലയിരുത്തൽ. പഠന റിപ്പോർട്ട് മാർച്ച് 31-ന് ‘അന്നൽസ് ഓഫ് ഇന്റേണൽ മെഡിസിൻ’ എന്ന ജേണലിൽ പ്രസിദ്ധീകരിക്കും.

Fluvoxamine to relieve fatigue; New discovery could lead to breakthrough in long-term COVID treatment, study report released

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt