അമേരിക്കയിൽ പ്രതിഷേധമിരമ്പി; ട്രംപിനെതിരെ ‘നോ കിങ്സ്’ റാലികളിൽ വൻ ജനാവലി!

വാഷിംഗ്ടൺ: അമേരിക്കൻ പ്രസിഡന്റ് ഡൊണാൾഡ് ട്രംപിന്റെ നയങ്ങൾക്കെതിരെ രാജ്യവ്യാപകമായി ‘നോ കിങ്സ്’ റാലികൾ സംഘടിപ്പിച്ചു. ഇറാൻ യുദ്ധം, കർക്കശമായ കുടിയേറ്റ നിയന്ത്രണങ്ങൾ, ട്രാൻസ്‌ജെൻഡർ അവകാശങ്ങൾ വെട്ടിക്കുറയ്ക്കൽ എന്നിവയ്‌ക്കെതിരെ ശനിയാഴ്ച നടന്ന പ്രതിഷേധങ്ങളിൽ ദശലക്ഷക്കണക്കിന് ആളുകൾ പങ്കെടുത്തതായി അന്താരാഷ്ട്ര വാർത്താ ഏജൻസികൾ റിപ്പോർട്ട് ചെയ്തു. 50 പ്രവിശ്യകളിലായി 3,100-ലധികം കേന്ദ്രങ്ങളിലാണ് പരിപാടികൾ രജിസ്റ്റർ ചെയ്തിരുന്നത്. വാഷിംഗ്ടൺ ഡി.സിയിലെ ലിങ്കൺ മെമ്മോറിയൽ മുതൽ നാഷണൽ മാൾ വരെ നടന്ന മാർച്ചിൽ “ഭരണമാറ്റം വീട്ടിൽ നിന്ന് തുടങ്ങണം” എന്നതടക്കമുള്ള മുദ്രാവാക്യങ്ങൾ ഉയർന്നു.

കുടിയേറ്റ വിരുദ്ധ നടപടികൾക്കെതിരെ നടന്ന മിനസോട്ടയിലെ പ്രകടനമാണ് റാലികളിൽ ഏറെ ശ്രദ്ധേയമായത്. സെന്റ് പോളിലെ ക്യാപിറ്റൽ പുൽത്തകിടിയിൽ നടന്ന പരിപാടിയിൽ പ്രശസ്ത ഗായകൻ ബ്രൂസ് സ്പ്രിംഗ്‌സ്റ്റീൻ മുഖ്യാതിഥിയായി പങ്കെടുത്തു. അതിശൈത്യത്തെ അവഗണിച്ചും യു.എസ് കസ്റ്റംസ് ആൻഡ് എമിഗ്രേഷൻ എൻഫോഴ്‌സ്‌മെന്റ് ഏജന്റുമാരുടെ നടപടികൾക്കെതിരെ തെരുവിലിറങ്ങിയ ജനങ്ങളെ അദ്ദേഹം പ്രശംസിച്ചു. തന്റെ ഗാനങ്ങളിലൂടെ പ്രക്ഷോഭകർക്ക് ഐക്യദാർഢ്യം പ്രഖ്യാപിച്ച അദ്ദേഹം ജനക്കൂട്ടത്തെ ആവേശം കൊള്ളിച്ചു.

ഇറാൻ-ഇസ്രായേൽ സംഘർഷത്തിലെ അമേരിക്കൻ ഇടപെടലിനെതിരെയും ട്രാൻസ്‌ജെൻഡർ അവകാശങ്ങൾ വെട്ടിക്കുറയ്ക്കുന്നതിനെതിരെയുമാണ് പ്രതിഷേധക്കാർ പ്രധാനമായും ശബ്ദമുയർത്തിയത്. വാഷിംഗ്ടണിലെ ലിങ്കൺ മെമ്മോറിയലിന് മുന്നിലും സാൻ ഡീഗോയിലും ആയിരക്കണക്കിന് ആളുകൾ അണിനിരന്നു. “കിരീടം താഴെയിടൂ, കോമാളി”, “ഭരണമാറ്റം വീട്ടിൽ നിന്ന് ആരംഭിക്കുന്നു” തുടങ്ങിയ പ്ലക്കാർഡുകൾ ഏന്തിയ പ്രതിഷേധക്കാർ വൈറ്റ് ഹൗസ് നയങ്ങൾക്കെതിരെ രൂക്ഷവിമർശനം ഉന്നയിച്ചു. 9 ദശലക്ഷത്തോളം പേർ ഇത്തവണത്തെ റാലികളിൽ പങ്കെടുത്തതായാണ് സംഘാടകരുടെ കണക്ക്.

അതേസമയം, രാജ്യവ്യാപകമായി നടക്കുന്ന ഈ പ്രതിഷേധങ്ങളെ റിപ്പബ്ലിക്കൻ പാർട്ടിയും വൈറ്റ് ഹൗസും തള്ളി. ഇവ “ഇടതുപക്ഷ ഫണ്ടിംഗ് ശൃംഖലകളുടെ” സൃഷ്ടിയാണെന്ന് വൈറ്റ് ഹൗസ് വക്താവ് അബിഗയിൽ ജാക്സൺ ആരോപിച്ചു. ഇത്തരം റാലികൾ തീവ്ര ഇടതുപക്ഷത്തിന്റെ അക്രമാസക്തമായ ഫാന്റസികൾക്ക് വേദിയൊരുക്കുകയാണെന്ന് എൻ.ആർ.സി.സി വക്താവ് മൗറീൻ ഒറ്റൂൾ പരിഹസിച്ചു. എന്നാൽ ജനകീയ പ്രതിഷേധം അവഗണിക്കാനാവാത്ത വിധം രാജ്യത്തുടനീളം പടരുകയാണ്.

Protests erupt in America; Huge crowds gather at ‘No Kings’ rallies against Trump!

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt