ഒന്റാറിയോ: ബ്ലൂ വാട്ടർ ബ്രിഡ്ജ് അതിർത്തിയിൽ കഴിഞ്ഞ ഏഴ് ദിവസമായി നടത്തിയ കർശന പരിശോധനയിൽ 4.5 മില്യൺ ഡോളർ വിലമതിക്കുന്ന നിരോധിത ഉൽപ്പന്നങ്ങൾ പിടിച്ചെടുത്തതായി കാനഡ ബോർഡർ സർവീസസ് ഏജൻസി (CBSA). ഒന്റാറിയോയിലെ സാർണിയയിലുള്ള പോയിന്റ് എഡ്വേഡ് എൻട്രി പോർട്ട് വഴി അമേരിക്കയിൽ നിന്ന് കാനഡയിലേക്ക് കടത്താൻ ശ്രമിച്ച അനധികൃത പുകയില ഉൽപ്പന്നങ്ങളും നിക്കോട്ടിൻ വേപ്പുകളുമാണ് ഉദ്യോഗസ്ഥർ കണ്ടെടുത്തത്.
അന്താരാഷ്ട്ര കള്ളക്കടത്ത് സംഘങ്ങളെയും സംഘടിത കുറ്റകൃത്യ ശൃംഖലകളെയും തകർക്കുന്നതിന്റെ ഭാഗമായാണ് അതിർത്തിയിൽ പരിശോധന ശക്തമാക്കിയതെന്ന് സി.ബി.എസ്.എ പ്രസ്താവനയിൽ അറിയിച്ചു. കഴിഞ്ഞ ഒരാഴ്ചയായി തുടരുന്ന പ്രത്യേക പരിശോധനയിലാണ് ഇത്രയും വലിയ ശേഖരം പിടികൂടാനായത്. പിടിച്ചെടുത്ത സാധനങ്ങളിൽ ഭൂരിഭാഗവും വിപണിയിൽ വലിയ മൂല്യമുള്ള നിക്കോട്ടിൻ അനുബന്ധ ഉൽപ്പന്നങ്ങളാണെന്ന് അധികൃതർ വ്യക്തമാക്കി.
രാജ്യത്തെ നിയമവ്യവസ്ഥയെ മറികടന്ന് അനധികൃത ഉൽപ്പന്നങ്ങൾ അതിർത്തി കടത്തുന്നത് തടയാൻ കർശനമായ നടപടികൾ തുടരുമെന്ന് ഏജൻസി സോഷ്യൽ മീഡിയയിലൂടെ അറിയിച്ചു. സംഭവത്തിൽ കൂടുതൽ അന്വേഷണം നടന്നു വരികയാണെന്നും സുരക്ഷാ കാരണങ്ങളാൽ പിടിച്ചെടുത്ത ഉൽപ്പന്നങ്ങളെക്കുറിച്ചോ കള്ളക്കടത്തിന് പിന്നിൽ പ്രവർത്തിച്ചവരെക്കുറിച്ചോ ഉള്ള കൂടുതൽ വിവരങ്ങൾ ഇപ്പോൾ പുറത്തുവിടാൻ സാധിക്കില്ലെന്നും അധികൃതർ കൂട്ടിിച്ചേർത്തു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Massive drug smuggling at Blue Water Bridge: $4.5 million worth of contraband seized
