ഒട്ടാവ: എക്സ്പ്രസ് എൻട്രി പ്രോഗ്രാമുകളിലൂടെ സ്ഥിരതാമസത്തിന് (PR) അപേക്ഷിക്കുന്നവർ വർക്ക് എക്സ്പീരിയൻസുമായി ബന്ധപ്പെട്ട വിവരങ്ങൾ രേഖപ്പെടുത്തുമ്പോൾ അതീവ ജാഗ്രത പാലിക്കണമെന്ന മുന്നറിയിപ്പുമായി കുടിയേറ്റ വിദഗ്ധർ. കനേഡിയൻ എക്സ്പിരിയൻസ് ക്ലാസ് (CEC), ഫെഡറൽ സ്കിൽഡ് വർക്കർ പ്രോഗ്രാം (FSW), ഫെഡറൽ സ്കിൽഡ് ട്രേഡ്സ് പ്രോഗ്രാം (FSTP) എന്നീ പദ്ധതികൾക്ക് കീഴിൽ അപേക്ഷിക്കുന്നവർ സാധാരണയായി വരുത്തുന്ന പിഴവുകളാണ് വിദഗ്ധർ ചൂണ്ടിക്കാട്ടുന്നത്.
ജോലിയുടെ പേര് (Job Title) മാത്രം നോക്കി എൻ.ഒ.സി (NOC) കോഡുകൾ തിരഞ്ഞെടുക്കുന്നതാണ് ഉദ്യോഗാർത്ഥികൾ വരുത്തുന്ന പ്രധാന പിഴവ്. നാഷണൽ ഒക്യുപേഷൻ ക്ലാസിഫിക്കേഷൻ പ്രകാരം അപേക്ഷകൻ ചെയ്ത പ്രധാന ഉത്തരവാദിത്തങ്ങൾ കൂടി പരിഗണിച്ചുവേണം കോഡുകൾ നിശ്ചയിക്കാൻ. ഇതിൽ മാറ്റം വന്നാൽ ഇൻവിറ്റേഷൻ ടു അപ്ലൈ (ITA) ലഭിച്ചവർക്ക് പോലും പിന്നീട് അത് നഷ്ടമാകുന്ന സാഹചര്യമുണ്ടാകും.
പഠനകാലയളവിൽ ചെയ്ത ജോലികൾ പലരും സി.ഇ.സി (CEC) വിഭാഗത്തിൽ ഉൾപ്പെടുത്താറുണ്ട്. എന്നാൽ കാനഡയിൽ പഠിക്കുമ്പോൾ ചെയ്യുന്ന ജോലികൾ സി.ആർ.എസ് (CRS) സ്കോറിനായി പരിഗണിക്കില്ലെന്നത് അപേക്ഷകർ ശ്രദ്ധിക്കണം. കൂടാതെ, പ്രവർത്തിപരിചയം കണക്കാക്കുന്നത് മാസങ്ങളുടെ അടിസ്ഥാനത്തിലല്ല, മറിച്ച് മണിക്കൂറുകളുടെ അടിസ്ഥാനത്തിലാണ്. ഒരു വർഷത്തെ പ്രവൃത്തിപരിചയമായി കണക്കാക്കാൻ ചുരുങ്ങിയത് 1560 മണിക്കൂർ (ആഴ്ചയിൽ 30 മണിക്കൂർ വീതം) ജോലി ചെയ്തിരിക്കണം. അധികസമയം (Overtime) ജോലി ചെയ്താലും നിശ്ചിത കാലയളവിനുള്ളിൽ മാത്രമേ ഇത് പരിഗണിക്കുകയുള്ളൂ.
ശമ്പളമില്ലാത്ത ജോലികൾ, നിയമപരമായ അനുമതിയില്ലാതെ ചെയ്തവ, കാനഡയ്ക്ക് പുറത്തിരുന്ന് കനേഡിയൻ കമ്പനികൾക്കായി ചെയ്ത റിമോട്ട് ജോലികൾ എന്നിവയും എക്സ്പ്രസ് എൻട്രിയിൽ പ്രവൃത്തിപരിചയമായി കണക്കാക്കില്ല. കാറ്റഗറി അടിസ്ഥാനത്തിലുള്ള ഡ്രോകളിൽ പങ്കെടുക്കുന്നവർ 12 മാസമെങ്കിലും നിശ്ചിത തൊഴിൽ മേഖലയിൽ ജോലി ചെയ്തിട്ടുണ്ടെന്ന് ഉറപ്പുവരുത്തണം. കൃത്യമായ പരിശോധനകളിലൂടെ ഇത്തരം പിഴവുകൾ ഒഴിവാക്കുന്നത് കുടിയേറ്റ നടപടികൾ വേഗത്തിലാക്കാൻ സഹായിക്കുമെന്ന് വിദഗ്ധർ വ്യക്തമാക്കുന്നു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Warning to Express Entry applicants: These mistakes could ruin your trip to Canada
