ഒന്റാറിയോയിൽ ഭവന നിർമ്മാണ മേഖലയ്ക്ക് ഉണർവ് നൽകുന്നതിനും സാധാരണക്കാർക്ക് വീട് വാങ്ങുന്നത് കൂടുതൽ എളുപ്പമാക്കുന്നതിനുമായി പുതിയ വീടുകളുടെ HST (Harmonized Sales Tax) ഒരു വർഷത്തേക്ക് താൽക്കാലികമായി ഒഴിവാക്കാൻ സർക്കാർ തീരുമാനിച്ചു. പ്രീമിയർ ഡഗ് ഫോർഡ് ആണ് ഈ സുപ്രധാന പ്രഖ്യാപനം നടത്തിയത്. ഈ വർഷത്തെ പ്രൊവിൻഷ്യൽ ബജറ്റിൽ ഈ നിർദ്ദേശം ഔദ്യോഗികമായി ഉൾപ്പെടുത്തും. 2026 ഏപ്രിൽ 1 മുതൽ 2027 മാർച്ച് 31 വരെയുള്ള കാലയളവിൽ വാങ്ങുന്ന പുതിയ വീടുകൾക്കാണ് ഈ ആനുകൂല്യം ലഭ്യമാകുക.
പുതിയ പദ്ധതി പ്രകാരം 1 മില്യൺ ഡോളർ വരെ വിലയുള്ള വീടുകൾക്ക് 13 ശതമാനം HST പൂർണ്ണമായും ഒഴിവാക്കും. 1.5 മില്യൺ ഡോളർ വരെ വിലയുള്ള വീടുകൾ വാങ്ങുന്നവർക്ക് പരമാവധി 1,30,000 ഡോളർ വരെ നികുതിയിനത്തിൽ ലാഭിക്കാൻ ഈ ഇളവ് സഹായിക്കും. വീടിന്റെ വില കൂടുന്നതിനനുസരിച്ച് ഇളവ് തുകയിൽ മാറ്റമുണ്ടാകുമെങ്കിലും 1.85 മില്യൺ ഡോളർ വരെയുള്ള വീടുകൾക്ക് ഭാഗികമായ നികുതി ഇളവുകൾ ലഭ്യമാകും. ഈ നീക്കത്തിലൂടെ ഏകദേശം 2.2 ബില്യൺ ഡോളറിന്റെ നികുതി ആശ്വാസം ജനങ്ങൾക്ക് നൽകാൻ കഴിയുമെന്ന് സർക്കാർ കണക്കാക്കുന്നു.
വർദ്ധിച്ചുവരുന്ന നികുതികളും നിർമ്മാണ ചിലവുകളും സാമ്പത്തിക അനിശ്ചിതത്വവും കാരണം പല കുടുംബങ്ങൾക്കും സ്വന്തമായി ഒരു വീട് എന്നത് അപ്രാപ്യമായിക്കൊണ്ടിരിക്കുകയാണെന്ന് പ്രീമിയർ ഡഗ് ഫോർഡ് ചൂണ്ടിക്കാട്ടി. ഈ നികുതി ഇളവിനെ “13 ശതമാനം ഡിസ്കൗണ്ട്” എന്ന നിലയിലാണ് അദ്ദേഹം വിശേഷിപ്പിച്ചത്. ഒരു വർഷത്തേക്ക് നീണ്ടുനിൽക്കുന്ന ഈ അവസരം പ്രയോജനപ്പെടുത്താൻ അദ്ദേഹം ആഗ്രഹിക്കുന്നവരെ ആഹ്വാനം ചെയ്തു. നികുതി വർദ്ധിപ്പിക്കുന്നതിനേക്കാൾ ചിലവ് കുറയ്ക്കുന്നതിലാണ് തന്റെ സർക്കാർ ശ്രദ്ധ കേന്ദ്രീകരിക്കുന്നതെന്നും അദ്ദേഹം വ്യക്തമാക്കി.
ഈ പുതിയ നയം വഴി ഒന്റാറിയോയിൽ 8,000 പുതിയ വീടുകളുടെ നിർമ്മാണം അധികമായി നടക്കുമെന്നും 21,000 പേർക്ക് തൊഴിൽ ലഭിക്കുമെന്നും പ്രവിശ്യാ ഭരണകൂടം പ്രതീക്ഷിക്കുന്നു. സാമ്പത്തിക മേഖലയ്ക്ക് 270 കോടി ഡോളറിന്റെ അധിക വരുമാനം ഇത് നൽകുമെന്നാണ് കണക്കാക്കുന്നത്. എങ്കിലും 2031-ഓടെ 15 ലക്ഷം വീടുകൾ നിർമ്മിക്കുക എന്ന ഒന്റാറിയോയുടെ ലക്ഷ്യത്തിലെത്താൻ ഇനിയും കൂടുതൽ നടപടികൾ ആവശ്യമാണെന്ന് ധനമന്ത്രി പീറ്റർ ബെത്ലൻഫാൽവി പറഞ്ഞു.
നിശ്ചിത സമയപരിധിക്കുള്ളിൽ വീട് വാങ്ങുന്നവർക്കും നിർമ്മാണം പൂർത്തിയാക്കുന്നവർക്കും മാത്രമേ ഈ ആനുകൂല്യം ലഭിക്കൂ. പ്രൈമറി റെസിഡൻസുകൾക്കും വാടകയ്ക്ക് നൽകുന്ന പ്രോപ്പർട്ടികൾക്കും നിർമ്മാണ സമയപരിധി ബാധകമായിരിക്കും. കേന്ദ്ര സർക്കാരുമായി സഹകരിച്ചാണ് പദ്ധതി നടപ്പിലാക്കുന്നത് എന്നതിനാൽ നികുതിയിലെ അഞ്ച് ശതമാനം വരുന്ന ഫെഡറൽ വിഹിതവും ഇളവ് ചെയ്യപ്പെടും. നിർമ്മാണ മേഖലയിലെ പ്രമുഖരും വിവിധ സംഘടനകളും സർക്കാരിന്റെ ഈ തീരുമാനത്തെ സ്വാഗതം ചെയ്തു.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
HST exemption for new homes in Ontario;
