ഹ്യൂസ്റ്റൺ: ടെക്സസിലെ പോർട്ട് ആർതറിലുള്ള വലേറോ എനർജി കമ്പനിയുടെ ഉടമസ്ഥതയിലുള്ള എണ്ണ ശുദ്ധീകരണ ശാലയിൽ ശക്തമായ സ്ഫോടനവും തീപിടുത്തവും ഉണ്ടായതായി റിപ്പോർട്ട്. മാർച്ച് 23-ന് വൈകിട്ടോടെ റിഫൈനറിയിലെ ഡീസൽ ഹൈഡ്രോട്രീറ്റർ യൂണിറ്റിലുണ്ടായ അപകടത്തിൽ ആർക്കും പരിക്കേറ്റിട്ടില്ലെങ്കിലും പ്ലാന്റിന്റെ പ്രവർത്തനം പൂർണ്ണമായും തടസ്സപ്പെട്ടു. ശുദ്ധീകരണ പ്രക്രിയയിലുള്ള ദ്രാവകം അപ്രതീക്ഷിതമായി പുറത്തേക്ക് ഒഴുകിയതാണ് സ്ഫോടനത്തിന് കാരണമായതെന്ന് കമ്പനി സ്റ്റേറ്റ് പൊലൂഷൻ കണ്ട്രോൾ ഏജൻസിയെ അറിയിച്ചിട്ടുണ്ട്.
സ്ഫോടനത്തെത്തുടർന്ന് പ്ലാന്റിലെ ക്രൂഡ് ഡിസ്റ്റില്ലേഷൻ, ഗ്യാസോലിൻ ഉത്പാദന യൂണിറ്റുകൾ ഉൾപ്പെടെയുള്ള പ്രധാന വിഭാഗങ്ങളെല്ലാം താൽക്കാലികമായി അടച്ചു. തീ പടരുന്നത് തടയാൻ ഇന്ധന വിതരണം നിർത്തിവെച്ചതും വെള്ളത്തിന്റെയും സ്റ്റീമിന്റെയും ലഭ്യതക്കുറവും പ്രവർത്തനങ്ങളെ ബാധിച്ചു. മാർച്ച് 24-ഓടെ തീ പൂർണ്ണമായും നിയന്ത്രണവിധേയമാക്കിയതായും പ്രദേശവാസികൾക്ക് നൽകിയിരുന്ന ജാഗ്രതാ നിർദ്ദേശം പിൻവലിച്ചതായും ജെഫേഴ്സൺ കൗണ്ടി ഷെരിഫ് ഓഫിസ് വ്യക്തമാക്കി. സ്ഫോടനത്തിന്റെ ആഘാതം 18 കിലോമീറ്റർ ദൂരത്തോളം അനുഭവപ്പെട്ടെങ്കിലും ഇതൊരു അട്ടിമറി നീക്കമാണെന്നതിന് തെളിവുകളൊന്നും ലഭിച്ചിട്ടില്ലെന്ന് അധികൃതർ കൂട്ടിച്ചേർത്തു.
പ്രതിദിനം 3,80,000 ബാരൽ ഉൽപ്പാദന ശേഷിയുള്ള വലേറോയുടെ ഏറ്റവും വലിയ പ്ലാന്റുകളിലൊന്നാണ് ഈ അപകടത്തെത്തുടർന്ന് നിശ്ചലമായത്. ഇറാൻ ഹോർമൂസ് കടലിടുക്ക് അടച്ചതോടെ അന്താരാഷ്ട്ര വിപണിയിൽ ഇന്ധനവില ഉയർന്നുനിൽക്കുന്ന സാഹചര്യത്തിൽ ഈ റിഫൈനറിയുടെ അടച്ചുപൂട്ടൽ വലിയ പ്രാധാന്യത്തോടെയാണ് കാണുന്നത്. തകരാറിലായ യൂണിറ്റുകളുടെ അറ്റകുറ്റപ്പണികൾ പൂർത്തിയാക്കി റിഫൈനറി എന്ന് വീണ്ടും പ്രവർത്തനം തുടങ്ങുമെന്ന് കമ്പനി ഇതുവരെ വ്യക്തമാക്കിയിട്ടില്ല.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Explosion at oil refinery in Texas: Major damage, production halted
