ഒട്ടാവ: കാനഡയിൽ പിആർ ഉള്ളവർക്കും പൗരത്വമുള്ളവർക്കും തങ്ങളുടെ മാതാപിതാക്കളെയും മുത്തശ്ശീമുത്തച്ഛന്മാരെയും ദീർഘകാലത്തേക്ക് കൂടെ താമസിപ്പിക്കാൻ സഹായിക്കുന്ന ‘സൂപ്പർ വിസ’ (Super Visa) നിയമങ്ങളിൽ ഇമിഗ്രേഷൻ വിഭാഗം (IRCC) ഇളവുകൾ പ്രഖ്യാപിച്ചു. 2026 മാർച്ച് 31 മുതൽ പ്രാബല്യത്തിൽ വരുന്ന പുതിയ മാറ്റങ്ങൾ പ്രകാരം വിസ ലഭിക്കാനുള്ള വരുമാന പരിധിയിൽ (Income Requirement) വലിയ ഇളവുകളാണ് വരുത്തിയിരിക്കുന്നത്. കുടുംബങ്ങളെ ഒന്നിപ്പിക്കുക എന്ന ലക്ഷ്യത്തോടെയാണ് ഈ പരിഷ്കാരം.
പുതിയ നിയമപ്രകാരം വരുമാനം കണക്കാക്കുന്നതിൽ രണ്ട് പ്രധാന മാറ്റങ്ങളാണ് വരുത്തിയിരിക്കുന്നത്. ആദ്യത്തേത്, അപേക്ഷ നൽകുന്നതിന് തൊട്ടുമുമ്പുള്ള രണ്ട് വർഷങ്ങളിലെ ഏതെങ്കിലും ഒരു വർഷത്തെ ടാക്സ് റിപ്പോർട്ട് വരുമാന തെളിവായി ഹാജരാക്കാം. നേരത്തെ തൊട്ടുമുമ്പുള്ള ഒരു വർഷത്തെ വരുമാനം മാത്രമേ പരിഗണിച്ചിരുന്നുള്ളൂ. രണ്ടാമത്തെയും ഏറ്റവും പ്രധാനപ്പെട്ടതുമായ മാറ്റം, ഹോസ്റ്റ് ചെയ്യുന്ന മക്കളുടെയോ കൊച്ചുമക്കളുടെയോ വരുമാനം നിശ്ചിത ശതമാനത്തിൽ എത്തിയെങ്കിൽ ബാക്കി തുക കാണിക്കാൻ സന്ദർശകരായി എത്തുന്ന മാതാപിതാക്കളുടെയോ മുത്തശ്ശീമുത്തച്ഛന്മാരുടെയോ വരുമാനം കൂടി കൂട്ടിച്ചേർക്കാൻ സാധിക്കും എന്നതാണ്.
നിലവിൽ പ്രോസസിംഗിൽ ഇരിക്കുന്ന അപേക്ഷകൾക്കും മാർച്ച് 31 മുതൽ നൽകുന്ന പുതിയ അപേക്ഷകൾക്കും ഈ നിയമം ബാധകമായിരിക്കും. പഴയ നിയമപ്രകാരം യോഗ്യതയുള്ളവർക്ക് അത് തുടരാമെങ്കിലും, വരുമാന പരിധിയിൽ തടസ്സം നേരിട്ടവർക്ക് പുതിയ മാറ്റങ്ങൾ പ്രയോജനപ്പെടുത്തി ആവശ്യമായ രേഖകൾ സമർപ്പിക്കാവുന്നതാണ്. കാനഡയിലെ ഉയർന്ന ജീവിതച്ചെലവ് കാരണം മാതാപിതാക്കളെ കൊണ്ടുവരാൻ പ്രയാസപ്പെട്ടിരുന്ന നിരവധി കുടുംബങ്ങൾക്ക് ഈ തീരുമാനം വലിയ ആശ്വാസമാകും.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Canada Super Visa income limit relaxed, effective from march 31
