ന്യൂഡൽഹി: സമൂഹമാധ്യമങ്ങളിലൂടെ ശ്രദ്ധേയയായ മോണാലിസയും ഭർത്താവ് ഫർമാൻ ഖാനും തങ്ങൾക്ക് നേരെ വധഭീഷണിയുണ്ടെന്ന് ആരോപിച്ച് രംഗത്ത്. തങ്ങളെ അപായപ്പെടുത്താൻ ശ്രമം നടക്കുന്നുണ്ടെന്നും അടിയന്തരമായി ഇടപെടണമെന്നും ആവശ്യപ്പെട്ട് ഇരുവരും പങ്കുവെച്ച വീഡിയോ ഇപ്പോൾ ചർച്ചയായിരിക്കുകയാണ്. തങ്ങളെ കൊല്ലുമെന്നും അംഗഭംഗം വരുത്തുമെന്നും പരസ്യമായി ഭീഷണി മുഴക്കുന്ന സാഹചര്യത്തിൽ മുഖ്യമന്ത്രിയും പോലീസ് കമ്മീഷണറും വിഷയത്തിൽ ഇടപെടണമെന്ന് ദമ്പതികൾ വീഡിയോയിലൂടെ അഭ്യർത്ഥിച്ചു.
സുരക്ഷ ആവശ്യപ്പെട്ട് കേന്ദ്ര-സംസ്ഥാന സർക്കാരുകൾക്കും പോലീസ് അധികൃതർക്കും ഔദ്യോഗികമായി ഇമെയിലുകളും കത്തുകളും അയച്ചിട്ടുണ്ടെന്ന് മോണാലിസ വ്യക്തമാക്കി. 2025-ലെ മഹാ കുംഭമേളയ്ക്കിടെ രുദ്രാക്ഷം വിൽക്കുന്നതിനിടെ പകർത്തിയ ദൃശ്യങ്ങളിലൂടെയാണ് മോണാലിസ പ്രശസ്തയായത്. ഒരു സിനിമാ പ്രോജക്റ്റുമായി ബന്ധപ്പെട്ട പ്രവർത്തനങ്ങൾക്കിടയിലാണ് മോണാലിസയും ഫർമാനും പരിചയപ്പെടുന്നതും പിന്നീട് വിവാഹിതരാകുന്നതും. എന്നാൽ വിവാഹത്തിന് പിന്നാലെ ഇവർക്കെതിരെ വലിയ രീതിയിലുള്ള സൈബർ ആക്രമണങ്ങളും ഭീഷണികളും ഉയരുകയായിരുന്നു.
നേരത്തെ, കേരളത്തിൽ വെച്ച് നടന്ന ഇവരുടെ വിവാഹത്തിന് സംസ്ഥാന സർക്കാർ നൽകിയ പിന്തുണയ്ക്ക് ദമ്പതികൾ നന്ദി അറിയിച്ചിരുന്നു. മാർച്ച് 11-ന് തിരുവനന്തപുരം അരുമാനൂർ ശ്രീ നൈനാർ ദേവ ക്ഷേത്രത്തിൽ വെച്ചായിരുന്നു ഇവരുടെ വിവാഹം നടന്നത്. വിദ്യാഭ്യാസ മന്ത്രി ഉൾപ്പെടെയുള്ള പ്രമുഖർ പങ്കെടുത്ത ചടങ്ങിൽ വലിയ ജനപങ്കാളിത്തവും ഉണ്ടായിരുന്നു. മതം മാറാൻ താൻ ഉദ്ദേശിക്കുന്നില്ലെന്നും പ്രണയവിവാഹത്തെ തെറ്റായ രീതിയിൽ ചിത്രീകരിക്കരുതെന്നും മോണാലിസ നേരത്തെ വ്യക്തമാക്കിയിരുന്നു. നിലവിലെ ഭീഷണി കണക്കിലെടുത്ത് കർശന സുരക്ഷ വേണമെന്നാണ് ഇവരുടെ ആവശ്യം.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Death threats against Mona Lisa, who became famous through Kumbh Mela: Couple seeks help from Chief Minister and Commissioner
