ഒട്ടാവ : പേർഷ്യൻ ഗൾഫിൽ ഇറാൻ കപ്പലുകൾ തടഞ്ഞതിനെത്തുടർന്ന് കുടുങ്ങിപ്പോയ മൂന്ന് കനേഡിയൻ പൗരന്മാർ സുരക്ഷിതമായി തിരിച്ചെത്തിയതായി ക്യുബെക് ഷിപ്പിംഗ് കമ്പനിയായ ഡെസ്ഗാഗ്നസ് (Desgagnés). ക്യുബെക്കിലെ മറൈൻ ഇൻസ്റ്റിറ്റ്യൂട്ടിലെ പരിശീലനാർത്ഥികളായ (Trainees) ഇവർ കോളേജ് പഠനത്തിന്റെ ഭാഗമായാണ് കമ്പനിയുടെ രണ്ട് കപ്പലുകളിൽ ജോലി ചെയ്തിരുന്നതെന്ന് ഔദ്യോഗിക വാർത്താക്കുറിപ്പിൽ വ്യക്തമാക്കുന്നു.
കഴിഞ്ഞ ഫെബ്രുവരി 28 മുതൽ ഹോർമുസ് കടലിടുക്കിലൂടെയുള്ള അന്താരാഷ്ട്ര കപ്പൽ ഗതാഗതം ഇറാൻ തടഞ്ഞതോടെയാണ് ഇവരുടെ യാത്ര മുടങ്ങിയത്. കപ്പലുകൾ പേർഷ്യൻ ഗൾഫിൽ കുടുങ്ങിയെങ്കിലും സൗദി അറേബ്യൻ സർക്കാരിന്റെ പ്രത്യേക സഹായത്തോടെ ഇവരെ വിമാനമാർഗ്ഗം ആദ്യം യൂറോപ്പിലും അവിടെനിന്ന് കാനഡയിലുമെത്തിക്കുകയായിരുന്നു.
നിലവിൽ പേർഷ്യൻ ഗൾഫിൽ മറ്റ് കനേഡിയൻ കപ്പലുകളൊന്നും കുടുങ്ങിക്കിടക്കുന്നതായി വിവരമില്ലെന്ന് ട്രാൻസ്പോർട്ട് കാനഡ അറിയിച്ചു. ഗൾഫ് മേഖലയിലെ സുരക്ഷാ പ്രശ്നങ്ങൾ നിരീക്ഷിച്ചു വരികയാണെന്നും അധികൃതർ വ്യക്തമാക്കി. വിദേശ പതാകകളിൽ സർവീസ് നടത്തുന്ന കപ്പലുകളിലെ കനേഡിയൻ പൗരന്മാരുടെ സുരക്ഷ ഉറപ്പാക്കാൻ ആവശ്യമായ നടപടികൾ സ്വീകരിക്കുമെന്നും ഷിപ്പിംഗ് കമ്പനി അറിയിച്ചു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Canadian citizens stranded in the Persian Gulf returned with Saudi assistance
