വാഷിംഗ്ടൺ: പശ്ചിമേഷ്യയിൽ സംഘർഷം മൂന്നാം വാരത്തിലേക്ക് കടക്കുന്നതിനിടെ, ലോകത്തിലെ ഏറ്റവും അത്യാധുനിക യുദ്ധവിമാനങ്ങളിൽ ഒന്നായ അമേരിക്കയുടെ എഫ്-35 (F-35) സ്റ്റെൽത്ത് വിമാനം വെടിവെച്ചിട്ടതായി ഇറാൻ. ഇറാന്റെ വ്യോമാതിർത്തിയിൽ വെച്ച് റവല്യൂഷണറി ഗാർഡ് കോർപ്സ് നടത്തിയ ആക്രമണത്തിൽ വിമാനത്തിന് സാരമായ കേടുപാടുകൾ സംഭവിച്ചതായാണ് റിപ്പോർട്ട്. ആക്രമണത്തിന് പിന്നാലെ വിമാനം മിഡിൽ ഈസ്റ്റിലെ യുഎസ് സൈനിക താവളത്തിൽ അടിയന്തരമായി ലാൻഡ് ചെയ്ത വിവരം യുഎസ് സെൻട്രൽ കമാൻഡ് സ്ഥിരീകരിച്ചിട്ടുണ്ട്.
റഡാറുകളുടെ കണ്ണ് വെട്ടിക്കാൻ ശേഷിയുള്ള അഞ്ചാം തലമുറ സ്റ്റെൽത്ത് വിമാനമായ എഫ്-35 ആക്രമിക്കപ്പെട്ടു എന്നത് അമേരിക്കയെ സംബന്ധിച്ചിടത്തോളം വലിയ തിരിച്ചടിയാണ്. ഏകദേശം 800 കോടി രൂപയിലധികം (100 ദശലക്ഷം ഡോളർ) വിലമതിക്കുന്ന ഈ വിമാനം ഇറാന് മുകളിൽ പറക്കുമ്പോഴാണ് അടിയന്തര ലാൻഡിംഗ് ആവശ്യമായി വന്നതെന്ന് സെൻട്രൽ കമാൻഡ് അറിയിച്ചു. വിമാനത്തിന് കേടുപാടുകൾ സംഭവിച്ചിട്ടുണ്ടെങ്കിലും പൈലറ്റ് സുരക്ഷിതനാണെന്നാണ് പ്രാഥമിക വിവരം. എന്നാൽ ഇറാന്റെ ആക്രമണത്തെക്കുറിച്ച് ഔദ്യോഗികമായി പ്രതികരിക്കാൻ അമേരിക്കൻ സൈന്യം ഇതുവരെ തയ്യാറായിട്ടില്ല.
സംഭവത്തെക്കുറിച്ച് വിശദമായ അന്വേഷണം ആരംഭിച്ചതായി ക്യാപ്റ്റൻ ടിം ഹോക്കിൻസിനെ ഉദ്ധരിച്ച് സിഎൻഎൻ റിപ്പോർട്ട് ചെയ്തു. ഇറാന്റെ വ്യോമ പ്രതിരോധ സംവിധാനങ്ങൾ തകർത്തുവെന്നും യുദ്ധത്തിൽ തങ്ങൾക്കാണ് മേൽക്കൈ എന്നും യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് അവകാശപ്പെടുമ്പോഴാണ് ഇറാന്റെ ഈ പ്രത്യാക്രമണം പുറത്തുവരുന്നത്. ഫെബ്രുവരി അവസാനം ആരംഭിച്ച യുദ്ധത്തിൽ ഇതുവരെ 10 റീപ്പർ ഡ്രോണുകൾ ഉൾപ്പെടെ 16 അമേരിക്കൻ വിമാനങ്ങൾക്ക് കേടുപാടുകൾ സംഭവിക്കുകയോ തകരുകയോ ചെയ്തിട്ടുണ്ട് എന്നത് യുഎസ് സൈനിക കേന്ദ്രങ്ങളിൽ ആശങ്ക വർദ്ധിപ്പിക്കുന്നു.
അമേരിക്കയും ഇസ്രായേലും ഇറാനെതിരായ നീക്കങ്ങൾക്ക് വ്യാപകമായി ഉപയോഗിക്കുന്ന വിമാനമാണ് എഫ്-35. ശത്രുക്കളുടെ റഡാറുകളിൽ പെടാതെ ചാരപ്പണി നടത്താനും കൃത്യതയോടെ ബോംബ് വർഷിക്കാനും ശേഷിയുള്ള ഈ വിമാനം ഇറാന്റെ പ്രതിരോധ സംവിധാനത്താൽ ലക്ഷ്യം വെക്കപ്പെട്ടത് മേഖലയിലെ യുദ്ധതന്ത്രങ്ങളിൽ വലിയ മാറ്റങ്ങൾക്ക് കാരണമായേക്കാം. കഴിഞ്ഞ ആഴ്ച ഇറാഖിൽ തകർന്നുവീണ കെസി-135 ടാങ്കർ വിമാനത്തിലെ ആറ് സൈനികർ കൊല്ലപ്പെട്ടതിന് പിന്നാലെയാണ് ഈ പുതിയ സംഭവം റിപ്പോർട്ട് ചെയ്തിരിക്കുന്നത്.
Iran claims to have shot down US F-35 fighter jet
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
