വിന്നിപെഗ്: മനിറ്റോബ പ്രവിശ്യയിലെ വിദ്യാഭ്യാസ പ്രോപ്പർട്ടി നികുതിയിൽ ഈ സാമ്പത്തിക വർഷം 23 ശതമാനത്തിന്റെ വർധനവുണ്ടായതായി സർക്കാർ പുറത്തുവിട്ട രണ്ടാം പാദ സാമ്പത്തിക റിപ്പോർട്ട്. കഴിഞ്ഞ വർഷം 833 മില്യൺ ഡോളറായിരുന്ന നികുതി വരുമാനം ഇത്തവണ 1.02 ബില്യൺ ഡോളറായാണ് ഉയർന്നത്. പ്രവിശ്യയിലെ വിവിധ സ്കൂൾ ഡിവിഷനുകൾ നേരിടുന്ന സാമ്പത്തിക പ്രതിസന്ധി പരിഹരിക്കാൻ നികുതി വർധിപ്പിക്കാൻ നിർബന്ധിതരായതാണ് ഈ മാറ്റത്തിന് പ്രധാന കാരണം.
എൻ.ഡി.പി സർക്കാർ വിദ്യാഭ്യാസ മേഖലയ്ക്ക് ആവശ്യമായ ഫണ്ടിംഗ് നൽകുന്നുണ്ടെന്ന് ധനമന്ത്രി അഡ്രിയാൻ സാല വാർത്താസമ്മേളനത്തിൽ അവകാശപ്പെട്ടു. മുൻ സർക്കാരിന്റെ കാലത്തെ അപേക്ഷിച്ച് 80 മില്യൺ ഡോളറിന്റെ വർധനവ് ഇത്തവണ അനുവദിച്ചിട്ടുണ്ടെന്നും പണപ്പെരുപ്പ നിരക്കിനേക്കാൾ കൂടുതൽ തുക വിദ്യാഭ്യാസത്തിനായി നീക്കിവെച്ചിട്ടുണ്ടെന്നും അദ്ദേഹം പറഞ്ഞു. ഗൃഹയുടമകൾക്ക് ആശ്വാസമായി പ്രോപ്പർട്ടി നികുതി ക്രെഡിറ്റ് 1,500 ഡോളറിൽ നിന്ന് 1,600 ഡോളറായി ഉയർത്തിയ കാര്യവും മന്ത്രി ചൂണ്ടിക്കാട്ടി.
എന്നാൽ, സർക്കാരിന്റെ സാമ്പത്തിക സഹായം ദൈനംദിന ചെലവുകൾക്ക് പോലും തികയുന്നില്ലെന്നാണ് സ്കൂൾ ബോർഡ് അസോസിയേഷന്റെ നിലപാട്. വിന്നിപെഗ് അടക്കമുള്ള പ്രമുഖ സ്കൂൾ ഡിവിഷനുകൾ പത്ത് ശതമാനത്തിനടുത്താണ് നികുതി വർധനവ് പ്രഖ്യാപിച്ചിരിക്കുന്നത്. വരാനിരിക്കുന്ന പ്രവിശ്യാ ബജറ്റിൽ വിദ്യാഭ്യാസ മേഖലയ്ക്ക് കൂടുതൽ പരിഗണന നൽകണമെന്നും സാധാരണക്കാരുടെ നികുതി ഭാരം കുറയ്ക്കാൻ സർക്കാർ ഇടപെടണമെന്നും അസോസിയേഷൻ പ്രസിഡന്റ് അലൻ കാംബെൽ ആവശ്യപ്പെട്ടു.
📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla
Education costs will rise; Manitoba to hike education taxes
