കാനഡയിൽ നികുതി ആനുകൂല്യങ്ങൾ ക്ലെയിം ചെയ്യുന്നതിൽ വൻ വീഴ്ച; കോടിക്കണക്കിന് ഡോളർ നഷ്ടമാകുന്നതായി റിപ്പോർട്ട്

ടൊറന്റോ: കാനഡയിലെ നികുതിദായകർ അർഹമായ ആനുകൂല്യങ്ങളും ക്രെഡിറ്റുകളും ക്ലെയിം ചെയ്യുന്നതിൽ വരുത്തുന്ന വീഴ്ച മൂലം ഓരോ വർഷവും കോടിക്കണക്കിന് ഡോളർ നഷ്ടപ്പെടുത്തുന്നതായി സാമ്പത്തിക വിദഗ്ധൻ ക്രിസ്റ്റഫർ ല്യൂ. സറ്റാറ്റിസ്റ്റിക്സ് കാനഡയുടെ പഠനമനുസരിച്ച് 2025-ൽ മാത്രം കാനഡ വർക്കേഴ്സ് ബെനഫിറ്റ് ഇനത്തിൽ 212 മില്യൺ ഡോളറോളം തുക ഗുണഭോക്താക്കൾ കൈപ്പറ്റിയിട്ടില്ലെന്ന് അദ്ദേഹം വ്യക്തമാക്കി. രാജ്യത്തെ സങ്കീർണ്ണമായ നികുതി വ്യവസ്ഥയിൽ നാനൂറിലധികം ക്രെഡിറ്റുകൾ നിലവിലുണ്ടെങ്കിലും പലരും ഇവയെക്കുറിച്ച് ബോധവാന്മാരല്ലെന്നാണ് കണ്ടെത്തൽ.

പ്രധാനമായും അഞ്ച് മേഖലകളിലെ നികുതി ഇളവുകളാണ് കാനഡക്കാർക്ക് നഷ്ടമാകുന്നത്. മെഡിക്കൽ ചെലവുകൾ, ഡിസബിലിറ്റി ടാക്സ് ക്രെഡിറ്റ് (DTC), കാനഡ വർക്കേഴ്സ് ബെനഫിറ്റ്, ഭവന നിർമ്മാണവുമായി ബന്ധപ്പെട്ട ആനുകൂല്യങ്ങൾ, പുതിയ ടോപ്പ്-അപ്പ് ടാക്സ് ക്രെഡിറ്റ് എന്നിവ ഇതിൽ ഉൾപ്പെടുന്നു. കാഴ്ച സഹായികൾ, മാനസികാരോഗ്യ സേവനങ്ങൾ, ചികിത്സയ്ക്കായുള്ള ദൂരയാത്രകൾ എന്നിവയ്ക്കായി ചെലവാക്കുന്ന തുകയ്ക്ക് നികുതിയിളവ് ലഭിക്കുമെങ്കിലും പലരും ഇത് ഫയൽ ചെയ്യാറില്ല. കൂടാതെ, എഡിഎച്ച്ഡി (ADHD), പ്രമേഹം തുടങ്ങിയ ആരോഗ്യപ്രശ്നങ്ങളുള്ളവർക്ക് ഡിസബിലിറ്റി ടാക്സ് ക്രെഡിറ്റ് വഴി പതിനായിരം ഡോളറിലധികം ആനുകൂല്യം ലഭിക്കാൻ അർഹതയുണ്ടെന്നും റിപ്പോർട്ട് ചൂണ്ടിക്കാട്ടുന്നു.

ആദ്യമായി വീട് വാങ്ങുന്നവർക്ക് പതിരായിരം ഡോളർ വരെയുള്ള ആനുകൂല്യങ്ങളും മുതിർന്ന പൗരന്മാർക്കായി വീടുകളിൽ വരുത്തുന്ന മാറ്റങ്ങൾക്ക് ലഭിക്കുന്ന പ്രത്യേക ഇളവുകളും ക്ലെയിം ചെയ്യപ്പെടാതെ പോകുന്നുണ്ട്. 2025 മുതൽ കുറഞ്ഞ നികുതി നിരക്കിലുണ്ടായ മാറ്റം പരിഹരിക്കാനായി സർക്കാർ കൊണ്ടുവന്ന ടോപ്പ്-അപ്പ് ടാക്സ് ക്രെഡിറ്റും നികുതിദായകർ ശ്രദ്ധിക്കേണ്ടതുണ്ട്. എച്ച് ആൻഡ് ആർ ബ്ലോക്ക് (H&R Block) നടത്തിയ സർവേയിൽ പത്തിൽ നാല് പേർക്കും മുൻകാലങ്ങളിൽ ലഭിക്കേണ്ടിയിരുന്ന ആനുകൂല്യങ്ങൾ നഷ്ടമായതായി കരുതുന്നു. ഇത്തരം സാഹചര്യങ്ങളിൽ ശരാശരി 3,000 ഡോളർ വരെ ഓരോ വ്യക്തിക്കും തിരികെ ലഭിക്കാൻ സാധ്യതയുണ്ടെന്നും വിദഗ്ധർ പറയുന്നു.

നികുതി റിട്ടേൺ ഫയൽ ചെയ്യുന്നതിന് മുൻപ് അർഹമായ എല്ലാ ക്രെഡിറ്റുകളും ഉൾപ്പെടുത്തിയിട്ടുണ്ടെന്ന് ഉറപ്പുവരുത്തണമെന്ന് ക്രിസ്റ്റഫർ ല്യൂ നിർദ്ദേശിച്ചു. വരുമാനം കുറവായതിനാൽ ഫയൽ ചെയ്യാതിരിക്കുന്നവർക്കും സർക്കാർ ആനുകൂല്യങ്ങൾ നഷ്ടമാകാൻ സാധ്യതയുണ്ട്. മുൻ വർഷങ്ങളിൽ ആനുകൂല്യങ്ങൾ ക്ലെയിം ചെയ്യാൻ വിട്ടുപോയവർക്ക് പത്ത് വർഷം വരെ പഴക്കമുള്ള റിട്ടേണുകൾ തിരുത്തി തുക കൈപ്പറ്റാൻ കാനഡ റെവന്യൂ ഏജൻസി (CRA) സൗകര്യം നൽകുന്നുണ്ട്. കൃത്യമായ പ്ലാനിംഗിലൂടെ നികുതി ഭാരം കുറയ്ക്കാനും സാമ്പത്തിക നേട്ടം കൈവരിക്കാനും നികുതിദായകർക്ക് സാധിക്കുമെന്ന് അദ്ദേഹം കൂട്ടിച്ചേർത്തു.

📢 കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=hq1tcla

Massive loophole in claiming tax benefits in Canada; Billions of dollars lost, report says