ചെന്നൈ: വിജയ്ക്കും അദ്ദേഹത്തിന്റെ പാർട്ടിയായ തമിഴക വെട്രി കഴകത്തിനും (TVK) ബിജെപി വമ്പൻ ഓഫറുകൾ നൽകിയെന്ന വെളിപ്പെടുത്തലുമായി പാർട്ടി നേതാവ് ആധവ് അർജുന രംഗത്ത്. തമിഴ്നാട് നിയമസഭാ തിരഞ്ഞെടുപ്പിൽ പകുതി സീറ്റുകളും വിജയ്ക്ക് രണ്ടര വർഷം മുഖ്യമന്ത്രി സ്ഥാനവും ബിജെപി വാഗ്ദാനം ചെയ്തതായാണ് ആധവ് അർജുന വ്യക്തമാക്കിയത്. എന്നാൽ “തമിഴ്നാട് ഒരിക്കലും ദില്ലിക്ക് മുന്നിൽ കീഴടങ്ങില്ല” എന്ന് മറുപടി നൽകിക്കൊണ്ട് വിജയ് ഈ ഓഫർ നിരസിച്ചെന്നും വരാനിരിക്കുന്ന തിരഞ്ഞെടുപ്പിൽ തമിഴ്നാട്ടിലെ 234 സീറ്റുകളിലും ടിവികെ ഒറ്റയ്ക്ക് മത്സരിക്കുമെന്നും അദ്ദേഹം കൂട്ടിച്ചേർത്തു. അതേസമയം, ബിജെപിയുമായി ഇത്തരമൊരു ചർച്ച നടത്തിയിട്ടില്ലെന്നാണ് വിജയ്യുടെ ഔദ്യോഗിക പ്രതികരണം.
രജനീകാന്തിന്റെ രാഷ്ട്രീയ പിന്മാറ്റവുമായി ബന്ധപ്പെട്ട് താൻ നടത്തിയ വിവാദ പരാമർശത്തിൽ ആധവ് അർജുന മാപ്പപേക്ഷിക്കുകയും ചെയ്തു. ഡിഎംകെ കുടുംബത്തിൽ നിന്നുള്ള ഭീഷണിയെത്തുടർന്നാണ് രജനീകാന്ത് രാഷ്ട്രീയത്തിൽ നിന്ന് പിന്മാറിയതെന്ന ആധവിന്റെ പ്രസ്താവന വലിയ രാഷ്ട്രീയ ചർച്ചകൾക്ക് വഴിവെച്ചിരുന്നു. രജനീകാന്ത് പാർട്ടി തുടങ്ങാൻ ശ്രമിച്ചപ്പോൾ തന്റെ നേതൃത്വത്തിൽ നടത്തിയ സർവേയിൽ 18 ശതമാനം വോട്ട് ലഭിക്കുമെന്ന് കണ്ടിരുന്നതായും, എന്നാൽ രാഷ്ട്രീയ എതിരാളികളുടെ കടന്നാക്രമണമാണ് ഉണ്ടായതെന്നുമാണ് താൻ ഉദ്ദേശിച്ചതെന്ന് അദ്ദേഹം വിശദീകരിച്ചു. തന്റെ വാക്കുകൾ രജനീകാന്തിന് പ്രയാസമുണ്ടാക്കിയെങ്കിൽ ക്ഷമ ചോദിക്കുന്നുവെന്നും ആധവ് വ്യക്തമാക്കി.
ആധവ് അർജുനയുടെ പ്രസ്താവനയ്ക്കെതിരെ എഐഎഡിഎംകെ നേതാവ് എടപ്പാടി പളനിസ്വാമി ഉൾപ്പെടെയുള്ള പ്രമുഖർ രംഗത്തെത്തിയിരുന്നു. രജനീകാന്തിനെപ്പോലെയുള്ള വ്യക്തിത്വങ്ങളെ അനാവശ്യ വിവാദങ്ങളിലേക്ക് വലിച്ചിഴയ്ക്കുന്നത് രാഷ്ട്രീയ മര്യാദയല്ലെന്ന് അദ്ദേഹം വിമർശിച്ചു. ആരോഗ്യപരമായ കാരണങ്ങളാലാണ് താൻ രാഷ്ട്രീയത്തിലേക്ക് ഇല്ലെന്ന് രജനീകാന്ത് 2020-ൽ വ്യക്തമാക്കിയത്. ആ തീരുമാനത്തെ ബഹുമാനിക്കണമെന്നും പളനിസ്വാമി പറഞ്ഞു. ‘മറുപടി നൽകാൻ കാലം കാത്തിരിക്കുന്നുണ്ട്’ എന്നായിരുന്നു വിവാദങ്ങളോടുള്ള രജനീകാന്തിന്റെ പ്രതികരണം.
“Chief Minister’s post, half the seats”; BJP’s big offer to Vijay? TVK leader reveals!
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
