ഒട്ടാവ: കാനഡയിൽ രാഷ്ട്രീയ വൃത്തങ്ങൾ ഉറ്റുനോക്കുന്ന മൂന്ന് നിർണ്ണായക ഉപതിരഞ്ഞെടുപ്പുകളുടെ തീയതി പ്രധാനമന്ത്രി മാർക്ക് കാർണി പ്രഖ്യാപിച്ചു. ഏപ്രിൽ 13-നാണ് വോട്ടെടുപ്പ് നടക്കുക. സ്കാർബറോ സൗത്ത് വെസ്റ്റ്, ടെറെബോൺ, യൂണിവേഴ്സിറ്റി-റോസ്ഡേൽ എന്നീ മണ്ഡലങ്ങളിലാണ് ജനവിധി തേടുന്നത്. നിലവിൽ 169 സീറ്റുകളുള്ള ലിബറൽ പാർട്ടിക്ക് കേവല ഭൂരിപക്ഷം ലഭിക്കാൻ മൂന്ന് സീറ്റുകൾ കൂടി ആവശ്യമാണ്. അതിനാൽ തന്നെ ഈ മൂന്ന് മണ്ഡലങ്ങളിലും വിജയിക്കാനായാൽ കാർണി സർക്കാരിന് പാർലമെന്റിൽ വ്യക്തമായ ഭൂരിപക്ഷം ഉറപ്പിക്കാൻ സാധിക്കും.
യൂണിവേഴ്സിറ്റി-റോസ്ഡേൽ മണ്ഡലത്തിൽ ദീർഘകാലം എംപിയായിരുന്ന മുൻ ഉപപ്രധാനമന്ത്രി ക്രിസ്റ്റിയ ഫ്രീലാൻഡ് ഉക്രെയ്ൻ പ്രസിഡന്റ് വൊളോഡിമിർ സെലെൻസ്കിയുടെ ഉപദേശക വേഷം സ്വീകരിച്ചതിനെ തുടർന്നാണ് അവിടെ ഒഴിവ് വന്നത്. മുൻ മന്ത്രി ബിൽ ബ്ലെയർ യു.കെയിലെ കാനഡയുടെ ഹൈക്കമ്മീഷണറായി നിയമിതനായതോടെയാണ് സ്കാർബറോ സൗത്ത് വെസ്റ്റിൽ തിരഞ്ഞെടുപ്പിന് കളമൊരുങ്ങിയത്. ക്യുബെക്കിലെ ടെറെബോൺ മണ്ഡലത്തിൽ ലിബറൽ സ്ഥാനാർത്ഥി തത്യാന അഗസ്റ്റെ ഒരു വോട്ടിന് വിജയിച്ചിരുന്നെങ്കിലും തപാൽ വോട്ടിലെ പിഴവുകൾ ചൂണ്ടിക്കാട്ടി സുപ്രീം കോടതി തിരഞ്ഞെടുപ്പ് ഫലം റദ്ദാക്കുകയായിരുന്നു.
നിലവിൽ 141 സീറ്റുകളുമായി കൺസർവേറ്റീവ് പാർട്ടിയാണ് പ്രധാന പ്രതിപക്ഷം. ബ്ലോക്ക് ക്യുബെക്കോയിസിന് 22 സീറ്റുകളും എൻ.ഡി.പിക്ക് 7 സീറ്റുകളുമാണുള്ളത്. ഏപ്രിലിൽ നടക്കാൻ പോകുന്ന ഈ പോരാട്ടം കാനഡയുടെ ഭരണസ്ഥിരതയിൽ ഏറെ നിർണ്ണായകമാകുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.
കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt
Carney announces byelections in these ridings
