കൂടുതൽ യോഗ്യത വിനയാകുന്നു; സിവിയിൽ നിന്ന് അനുഭവപരിചയം വെട്ടിമുറിച്ച് ഉദ്യോഗാർത്ഥികൾ

ന്യൂഡൽഹി: ആഗോള തൊഴിൽ വിപണിയിൽ ഉദ്യോഗാർത്ഥികൾക്കിടയിൽ അപ്രതീക്ഷിതമായ പുതിയൊരു പ്രവണത ശക്തിപ്പെടുന്നു. തങ്ങളുടെ കരിയറിലെ നേട്ടങ്ങളും വർഷങ്ങളായുള്ള പ്രവൃത്തിപരിചയവും പൂർണ്ണമായി വെളിപ്പെടുത്തുന്നതിന് പകരം, സിവിയിൽ നിന്ന് ഇവ മനഃപൂർവ്വം ഒഴിവാക്കുകയാണ് പലരും. നിലവിലെ കടുത്ത മത്സര അന്തരീക്ഷത്തിൽ അഭിമുഖങ്ങളിലേക്ക് തിരഞ്ഞെടുക്കപ്പെടാനുള്ള സാധ്യത വർദ്ധിപ്പിക്കാനാണ് ഉദ്യോഗാർത്ഥികൾ ഇത്തരമൊരു ‘റിവേഴ്സ് സ്ട്രാറ്റജി’ സ്വീകരിക്കുന്നത്. ജോലിക്ക് ആവശ്യമായതിൽ കൂടുതൽ യോഗ്യതയുണ്ടെന്ന് കണ്ടെത്തി അപേക്ഷകൾ നിരസിക്കപ്പെടുന്നത് ഒഴിവാക്കുക എന്നതാണ് ഇതിന്റെ പ്രധാന ലക്ഷ്യം.

പലപ്പോഴും ഉയർന്ന തസ്തികകളിൽ ജോലി ചെയ്തവരും വർഷങ്ങളുടെ പരിചയസമ്പത്തുള്ളവരും തങ്ങളുടെ പ്രവൃത്തിപരിചയ പട്ടിക ചുരുക്കിയും പഴയകാല നേട്ടങ്ങൾ നീക്കം ചെയ്തുമാണ് ഇപ്പോൾ അപേക്ഷിക്കുന്നത്. അമിത യോഗ്യതയുള്ളവർ ഉയർന്ന ശമ്പളം ആവശ്യപ്പെടുമെന്നും, ചെറിയ തസ്തികകളിൽ ഇവർക്ക് മടുപ്പ് അനുഭവപ്പെടുമെന്നും തൊഴിലുടമകൾ പൊതുവേ കരുതുന്നു. മെച്ചപ്പെട്ട മറ്റൊരു അവസരം ലഭിച്ചാൽ ഇവർ വേഗത്തിൽ ജോലി ഉപേക്ഷിച്ചു പോകുമെന്ന ഭയവും കമ്പനികൾക്കുണ്ട്. ഇത്തരം മുൻവിധികൾ കാരണം യോഗ്യരായ പലർക്കും അഭിമുഖത്തിനുള്ള അവസരം പോലും ലഭിക്കുന്നില്ല എന്ന തിരിച്ചറിവാണ് പുതിയ മാറ്റത്തിന് പിന്നിൽ.

അമേരിക്കയിലും യൂറോപ്പിലും മാത്രമല്ല, ഇന്ത്യയുൾപ്പെടെയുള്ള രാജ്യങ്ങളിലും ഈ പ്രവണത വ്യാപകമാകുന്നുണ്ടെന്നാണ് റിപ്പോർട്ടുകൾ സൂചിപ്പിക്കുന്നു. സാമ്പത്തിക അനിശ്ചിതത്വം നിലനിൽക്കുന്ന സാഹചര്യത്തിൽ വലിയ പദവികളേക്കാൾ ഉപരിയായി ജോലി സുരക്ഷയ്ക്കാണ് പലരും മുൻഗണന നൽകുന്നത്. ഇതിനായി പിജി ബിരുദങ്ങളും സീനിയർ തസ്തികകളും സിവിയിൽ നിന്ന് ഒഴിവാക്കാൻ ഇവർ മടിക്കുന്നില്ല. കമ്പനികൾ ഉപയോഗിക്കുന്ന ഓട്ടോമേറ്റഡ് റിക്രൂട്ട്‌മെന്റ് സോഫ്റ്റ്‌വെയറുകൾ നിശ്ചിത മാനദണ്ഡങ്ങൾക്കപ്പുറം യോഗ്യതയുള്ളവരെ ഫിൽട്ടർ ചെയ്ത് മാറ്റുന്നതും ഉദ്യോഗാർത്ഥികളെ ഈ കടുംകൈക്ക് പ്രേരിപ്പിക്കുന്നു.

സിവി ചുരുക്കുന്നത് അഭിമുഖത്തിന് വിളിക്കപ്പെടാൻ സഹായിക്കുമെങ്കിലും ഇതിൽ ചില അപകടസാധ്യതകളും ഒളിഞ്ഞിരിപ്പുണ്ടെന്ന് കരിയർ വിദഗ്ധർ മുന്നറിയിപ്പ് നൽകുന്നു. ജോലിയിൽ പ്രവേശിച്ച ശേഷം യഥാർത്ഥ വിവരങ്ങൾ തൊഴിലുടമ അറിഞ്ഞാൽ അത് വിശ്വാസ്യതയെ ബാധിച്ചേക്കാം. അതിനാൽ വിവരങ്ങൾ പൂർണ്ണമായി മറച്ചുവെക്കുന്നതിന് പകരം, അപേക്ഷിക്കുന്ന തസ്തികയ്ക്ക് അനുയോജ്യമായ രീതിയിൽ മാത്രം അനുഭവപരിചയത്തെ ഹൈലൈറ്റ് ചെയ്യുന്നതാണ് ബുദ്ധിപരമായ നീക്കമെന്ന് ഇവർ ചൂണ്ടിക്കാട്ടുന്നു. തൊഴിൽ വിപണി കൂടുതൽ സങ്കീർണ്ണമാകുന്ന കാലത്ത്, എന്ത് നേടി എന്നതിനേക്കാൾ അത് എങ്ങനെ അവതരിപ്പിക്കുന്നു എന്നതിനാണ് ഇപ്പോൾ പ്രാധാന്യം ഏറുന്നത്.

why-are-job-seekers-hiding-years-of-experience-on-their-cvs-a-growing-workplace-trend

കാനഡയിലെ ഏറ്റവും പുതിയ വാർത്തകൾക്കായി: https://chat.whatsapp.com/Ghtm5bIjsVN8SItyDlaj3Q?mode=wwt